1 फिर याकुब ने अपना बेटाहोन खे यो बोली खे बुलायो, एक सात हुय जानु, मी तुम खे बतायु, कि आखरी दिन मे तुम पर का का बीत्ये. 2 हे याकुब का बेटाहोन, एक सात हुय खे सुन्नु, अपना बाप इस्राएल का तरफ कान लगानु. 3 "हे रुबेन, तू मरो बडो, मरी ताकत, अरु मरो पौरुष को पैयलो फल आय; प्रतिष्ठा को अच्छो भाग, अरु शक्ति को अच्छो भाग, अरु शक्ति को भी अच्छो भाग तू ही हइ. 4 तू जो पाणी का जसो उबल आलो हइ, येकालिये दूसरा से बडो नी ठैर्ये; क्युकि तू अपना बाप की खटीया पर चड्यो, तब तोने ओ खे शुध्द कर्यो; उ मरा बिछाना पर चडी गयो. 5 शिमोन अरु लेवी तो भइ आय, उनकी तलवरहोन उपद्रव को हथियार आय. 6 हे मरा जीव, उनका मर्म मे न पड हे मरी महिमा, उनकी सभा मे मत मिल; क्युकि उनने घुस्सा से इन्सानहोन को खुन कर्यो, अरु अपनी ही इच्छा पर चली खे बैलहोन खे गुंग बनायो. 7 धिक्कार उनका घुस्सा खे, प्रचंड थो; अरु उनको रोष खे, जो निर्दय थो; मी उनने याकुब मे अलग अलग अरु इस्राएल मे तितर बितर करी दियु. 8 हे यहूदा, तरा भइ तरो धन्यवाद कर्ये, तरो हात तरा दूश्मन का गर्दन पर पड्ये तरा बाप का बेटो तो खे नमस्कार कर्ये. 9 यहूदा सेर को बच्चो आय हे मरा बेटा, तू अहेर करी खे गुफा मे गयो हइ उ सेर अथवा सेरनी का जसो दबी खे बठी गयो; फिर कौन ओ खे छेड्ये. 10 जब तक शीलो नी आय तब तक नी ते यहूदा से राजदण्ड छुठ्ये नी ओका कुल से व्यवस्था देनआलो अलग हुये; अरु राज्य राज्य का इन्सान ओका अधीन हुय जाये. 11 उ अपना जवान गधो खे अंगुर कि बेल मे अरु अपनी गदी का बच्चा को अच्छी जाती की दाखलता मे बाध्या कर्ये; ओने अपना कपडा मोरुस मे अरु अपना पेनाव मुरुस का रस मे धोयो हइ. 12 ओकी आखहोन मोरुस से चमकीली अरु ओका दात दूध से सपेत हुये. 13 जबूलून समुंदर किनार पर निवास कर्ये, उ जहाजहोन का लिये बन्दरगाह को काम दिये, अरु ओको परला भाग सीदोन का पास पहुच्ये. 14 इस्साकार एक बडो अरु बलवन्त गधाहोन हइ, जो जनवर का झुंड मे दबी खे र्‍हेस हइ. 15 ओने एक अराम कि जगा देखी खे, कि अच्छो हइ, अरु एक देश, की मनोहर हइ, अपना कंधा को बोझ उठान का लिये झुक्यो, अरु मजबुरी मे दास का जसो काम करन लग्यो. 16 दान इस्राएल को एक कुल हुय खे अपना जात भइहोन को फैसलो कर्ये. 17 दान मार्ग मे को एक साप अरु रस्ता मे को एक जहरीलो नाग हुये, जो घोडा की येडी खे डसस हइ, जेकासे ओको सवार पछाड खैख गिर पडस हइ. 18 हे यहोवा, मी तरा से उध्दार पान की रस्ता देखते आयो हइ. 19 गाद पर एक दल लडाइ कर्ये; पर उ उय दल का पिछला भाग पर छापो मार्ये. 20 आनेर से जो पैदा हुये उ अच्छो हुये, अरु उ राजा को अच्छो स्वादिष्ट खानो दियो कर्ये. 21 नप्ताली एक छुटी हुय हरनी आय; उ सुन्दर बातहोन बोलस हइ. 22 युसुफ बलवन्त लता की एक शाखा हइ, उ सोता का पास लगी हुय फलवन्त लता की एक शाखा हइ; ओकी डालीहोन दीवार पर से चडी खे फैली जास हइ. 23 धनुर्धारिहोन ने ओ खे खेदीत कर्यो, अरु ओका पर तीर मार्या, अरु ओका पिछे पड्या हइ. 24 पर ओको धनुष मजबुत र्‍हियो, अरु ओका भुज्जा अरु हाथ याकुब का उय शक्तिमान परमेश्वर का हाथहोन का वजेसे फुर्तीला हुया, जेका पास से उ चरवाहा आये, जो इस्राएल देश की चट्टान भी ठैर्ये. 25 यो तरो बाप का उ परमेश्वर को काम हइ, जो तरी मदत कर्ये, उ सर्वशक्तिमान को जो तो खे उपर से आकाश मे को आर्शिवाद, अरु नीच्चे से गहरा पाणी मे को आशिर्वाद अरु स्तनहोन, अरु गर्भ की आशिर्वाद दिये. 26 तरो बाप को आशिर्वाद मरा पितरो खे आशिर्वाद होन से बडी गया हइ अरु सनातन पहाडीहोन की मनचाहे चिजहोन को जसो बन्या र्हिये वे युसुफ का माथा पर, जो अपना भइहोन से अलग कर्यो गयो थो, ओका माथा का मुकुट पर फुले फल्ये. 27 बिन्यामिन फाडनआलो लाडग्यो हइ, फजर तो उ अहेर भक्षण कर्ये, अरु शाम खे लुट बाटी लिये." 28 इस्राएल का बारा कुल यो ही हइ अरु उनका बाप ने जो वचन से उन खे आशिर्वाद का अनुसार ओने आशिर्वाद दियो.

29 तब ओने यो बोली खे उन खे आज्ञा दी, "मी अपना इन्सानहोन का साथ मिलना पर हइ; येकालिये मे खे हित्ती एप्रोन की जमीनआली गूफ मे मरा बाप दादा का साथ मट्टी देनु. 30 अर्थात उय गुफा मे जो कनान देश मे मम्रे का जसोआली हइ मकपेलावाली जमीन मे हइ; वाइ जमीन खे अब्राहम ने हित्ती एप्रोन का हाथ से येकालिये मोल लियो थो, कि उ वहा कब्रिस्तान का लिये ओकी खुद जमीन हो.* 31 व्हा अब्राहम अरु ओकी लुगय सारा खे मट्टी दी गय थी; अरु वही इसहाक अरु ओकी लुगय रिबका खे भी मट्टी दी गय अरु वही मेने लिआ खे भी मट्टी दी.* 32 वहा जमीन अरु ओमे की गुफा हित्तीहोन का हाथ से मोल ली गय." 33 याकुब जब अपना बेटाहोन खे या आज्ञा दि हुया, तब अपना पाय खटीया पर समेत जान छोड्यो, अरु अपन इन्सानहोन मे जै मिल्यो.*