1 याकुब ने भी अपनी रस्ता लि अरु परमेश्वर का दूत ओका से अय मिल्या. 2 उन खे देखते ही याकुब ने बल्यो, "यो तो परमेश्वर को दल आय" येकालिये ओने उ जगा को नाम महनैम* रख्यो. 3 त तब याकुब ने सेइर देश मे, अर्थात एदोम देश मे अपना भइ एसाव का पास अपना आगे एक संदेश वाहक खे भेजी दियो 4 अरु ओने उनके खे या आज्ञा दी "मरा प्रभु एसाव से यो बोलनु; कि तरो दास याकुब तरा से यो बोलस हइ कि मि लाबान का यहा परदेसी हुय खे अब तक र्‍हियो; 5 अरु मरा पास गाय बैल, गधो, मेडा बकरीहोन, अरु दास-दासीहोन हइ अरु मेने अपना प्रभु का पास येकालिये सन्देश बेज्यो हइ कि तरो अनुग्रह खे का नजर मरा पर हइ." 6 वे संदेश वाहक याकुब का पास पल्टीइ खे बोलन लग्यो, "हम तरा भइ एसाव का पास गया था, अरु उ भी तरा से भेट करन खे चार सौ इन्सान सात लि खे चली अय रो हइ." 7 तब याकुब बहुत डरी गयो, अरु संकट मे पड्यो; अरु यो सोची खे, अपना सोप्तोहोन खे, अरु मेडा बकरीहोन, अरु गाय बैलहोन, अरु उटहोन खे भी अलग दो दल करी लियो. 8 कि अगर एसाव अय खे पैयले दल खे मारन लग्या, तो दुसरा दल भागी खे बची जाये. 9 फिर याकुब ने बोल्यो, "हे यहोवा, हे मरा दादा अब्राहम को परमेश्वर, हे मरा बाप इसहाक को प परमेश्वर, तोने तो मरासे बोल्यो थो कि अपना देश अरु जन्म भूमी मे पल्टी जा, अरु मी तरी भलाइ कर्यु : 10 तोने जो जो काम अपननी करुणा अरु सच्चाइ से अपना दास का साथ कर्यो हइ, कि मी जो अपनी छडी ही लि खे या यरदन नद्दी का पार उतर आयो, अरु अब मरा दो दल हुय गया हइ, तरा असा कामहोन मे से मि एक खे भी योग्य तो नी हइ. 11 मरी बिनती सुनी खे मे खे मरा भइ जी एसाव का साथ से बच्यो मी तो ओका से डरुस हइ, बोल्यो असो नी हो कि उ अय खे मे खे अरु माय समेत पोर्याहोन खे भी मारी डाल्ये. 12 तो ने तो बोल्यो हइ, कि मी निश्चय तरी भलाइ कर्यु, अरु तरो कुल खे समुदर का रेती का कन का समान बहुत कर्यु, जो बहुतायत का मारे गिन्या नी जै सक्ये."* 13 ओने उय दिन की रात वही बितैइ; अरु जो कुछ ओका पास थो ओमे से अपना भइ असाव की भेट का लिये छाटि खे निकाल्यो; 14 अर्थात् दो सौ बकरीहोन, अरु बीस बकरा, अरु दो सौ मेडा, अरु बीस मेडी, 15 अरु बच्चाहोन समेथ दुध देनआली तीस उटनिहोन, अरु उनका दस बच्चा. 16 उन खे ओने झुण्ड करि खे, अपना दासहोन खे सोपी खे उनसे बोल्यो, "मरा आगे बढ जानु; अरु झुण्डहोन का बीच मे अन्तर रखनु." 17 फिर ओने अगला झुण्ड का रखवाला खे यो आज्ञा दी, जब मरा भइ यसाव मे खे, अरु पुछन लग्या, तू कोको दास आय, अरु कहा जास हइ, अरु ये जो तरा आगे आगे हइ, वे कोका जनवर आय? 18 तब बोलनु "यो तरो दास याकुब को आय, हे मरा प्रभु एसाव, यो भेट का लिये पास भेज्या गयो हइ, अरु उ खुद भी हमारा पीछे पीछे अय रो हइ. 19 अरु ओने दूसरा अरु तीसरा रखवाला का भी, वरन उन सभी खे जो झुण्डहोन खे पीछे पीछे था असी आज्ञा दी कि जब एसाव तूम खे मिल्ये तब यो प्रकार से ओकासे बोलनु. 20 अरु यो भी बोलनु, तरो दास याकुब हमारा पीछे पीछे अय रो हइ," क्युकि ओने यो सोच्यो कि यो उपहार जो मरा आगे आगे जास हइ, येका वजेसे मी ओका घुस्सा खे शान्त करी खे तब ओको दर्शन कर्यु; हुय सकस हइ उ म खे माफ करी दिये 21 येकालिये उ झुण्ड को मेडो याकुब से पैयले पार उतरी गय, अरु उ खुद उय रात खे छावनी मे र्‍हे.

22 उय रात खे उ उठ्यो अरु अपनी दोय बइहोन, अरु दोय दासीहोन, अरु ग्यारा पोर्याहोन का सात लि खे घाट से यब्बोक नद्दी का पार उतरी गया. 23 ओने उन खे उ नद्दी का पार उतारी दियो, वरन अपनो सब कुछ नद्दी पार उतारी दियो. 24 अरु याकुब खुद अ खेलो र्‍हि गयो; तब कोय इन्सान अय खे पाय फटना तक ओकासे मल्लयुध्य करतो र्‍हियो. 25 जब ओने देख्यो कि मि याकुब पर प्रबल नी होतो, तब ओकी जाघ की नस खे छियो; अरु याकुब कि जाघ की नस ओकासे मल्लयुध्द करता ही करता चढ गय. 26 तब ओने बोल्यो, "मे खे जान दे, क्युकि सुभह होनआलो हइ." याकुब ने बोल्यो, "जब तक तू मे खे आशिर्वाद नी देनु, तब तक मी तो खे जान नी दियु. 27 अरु ओने याकुब से पुछ्यो, तरो नाम का हइ? ओने बोल्यो, याकुब," 28 ओने बोल्यो "तरो नाम अब याकुब नी, पर इस्राएल* हुये क्युकि तू परमेश्वर से अरु इन्साहोन से भी युद्ध करी खे प्रबल हुयो हइ."* 29 याकुब ने बोल्यो, "मी बिनती करुस हइ मे खे अपनो नाम बता," ओने बोल्यो, "तू मरो नाम क्यु पूछस हइ?" तब ओने ओ खे वही आशिर्वाद दियो. * 30 तब याकुब ने यो बोली खे उ जगा को नाम पनीएल* रख्यो "परमेश्वर खे आमने-सामने देखना पर भी मरी जान बची गय." 31 पनुएल का पास सर चलता-सचलता सुरज उदय हुय गयो, अरु उ जाँघ कि नस चडन से लंगडतो थो. 32 इस्राएली जो जनवरहोन की जाँघ की जोडनाली जाँघनस खे आज का दिन तक नी खाय, योको कारण यही आय कि उ इन्सान ने याकुब की जाँघ खे जोड मे जाँघनस खे छियो थो.