अब्राम अरु लूत को अलगहोन को वर्णन
1 तब अब्राम अपनी लुगय, अरु अपनी पुरी सम्पत्ति लि खे, लूत खे भी संग लि खे हुये, मिस्र खे छोडी खे कनान का दक्षिण देश मे आयो. 2 अब्राम मेडा-बकरी, गाय-बैल, अरु सोन्नो-चांदी को बडो धनी थो. 3 फिर उ दक्षिण देश से चली खे, बेतेल का पास उय जगा खे पहुच्यो, जहाँ उ पैयले ओने अपनो तम्बु खडो कऱ्यो थो, जो बेतेल तरफ अय का बीच मे हइ. 4 या जगा वा वेदी की हइ, जे खे ओने पैयले बनायो थो, अरु व्हा अब्राम ने फिर परमेश्वर से प्रार्थना करी.
5 लूत का पास भी, जो अब्राम का साथ चलतो थो, मेडा-बकरी, गाय-बैल, अरु झोपडी थी. 6 येकालिए उ देश मे उन दोय का लिए पर्याप्त चरान कि जगा नी थी कि वे जमा र्हिये क्युकि उनका पास भोत संपत्ति थी येकालिए वे जमा नी र्हि सक्या. 7 अब्राम, अरु लूत का मेडा-बकरी, अरु गाय-बैल का चरान आला मे झगडो हुयो, उय टेम्मे कनानी, अरु परिज्जी इन्सान, उ देश मे र्हेता था. 8 तब अब्राम लूत से बोलन लग्यो, "मरा अरु तरा बीच, अरु मरा अरु तरा चरान आला का बीच मे झगडो नी होन खे हुनु; क्युकि हम इन्सान भइबन्धु हइ. 9 का पुरो देश तरा सामने नी? मरा से अलग हो, अगर तू बाया तरफ जाये ते मी दाया तरफ जायु; अरु अगर तू दाया तरफ जाये ते मी बाया तरफ जायु." 10 तब लूत ने आँख उठैइ खे, यरदन नद्दी का पास आली पुरी तराइ खे देख्यो कि उ सब सिंची हुय हइ, जब तक परमेश्वर ने सदोम अरु गमोरा खे खत्म नी कर्यो थो, तब तक सुव्वर का रस्ता तक उ तराइ परमेश्वर की वाटिका, अरु मिस्र देश का समान उग्यो जायु थी.13:10 मत्ती 2:10 11 येकालिये लूत अपना लिये यरदन की पुरी तराइ खे चुनी खे पूर्व का तरफ चल्यो, अरु वे एक दूसरा से अलग हुय गया. 12 अब्राम तो कनान देश मे र्हियो, पर लूत उ तराइ का नगरहोन मे र्हेन लग्यो; अरु अपनी झोपडी सदोम का पास खडी करी. 13 सदोम को इन्सान परमेश्वर का नजर मे बडो दुष्ट अरु पापी थो.
अब्राम को हेब्रोन खे जानो
14 जब लूत अब्राम से अलग हुय गयो तब ओका बाद परमेश्वर ने अब्राम से बोल्यो, "आँख उठैइ खे जो जगा पर तू हइ व्हा से उत्तर-दक्षिण, पूर्व-पश्चिम, चारी तरफ नजर कर. 15 क्युकि जेत्ती जमीन तो खे दिखैइ देस हइ, उ सब खे मी तो खे अरु तरा कुल खे युग-युग का लिये दियु.13:15 प्रेरीत खे काम 7:5 16 अरु मी तरा कुल खे पृथ्वी की धूल खे कोका समाने भोत कर्यु, यहा तक कि जो कोय पृथ्वी की धूल खे किनकों खे गिन सक्ये उय तरो कुल भी गिन सक्ये. 17 उट, यो देश की लम्बाइ अरु चौडाइ मे चल फिर; क्युकि पुरो प्रदेश मी तो खे दियु." 18 येका बाद अब्राम अपना तम्बू उखाडी खे, मम्रे का पवित्र झाडहोन का बीच जो हेब्रोन मे था, जैय खे र्हेन लग्यो, अरु व्हा भी परमेश्वर की एक वेदी बनैय.