1 जब राहेल ने देख्यो कि याकुब का लिये मरासे कोय बच्चा नी हुय रा, तब वा अपनी बहीन से घुस्सा करन लगी अरु याकुब से बोल्यो, "मेरे भि बच्चा दे, नी ते मरी जायु." 2 तब याकुब ने राहेल से घुस्सा हुय खे बोल्यो, "का मि परमेश्वर हइ? तरी गर्भ खे ओने बन्द करी खे रखी हइ." 3 राहेल ने बोल्यो, "अच्छो, मरी दासी बिल्हा हाजीर हइ; ओका पास मे जा, वा मरी घुटना पा जनेय, अरु ओका वजेसे मरो भी घर बसे." 4 तब ओने ओ खे अपनी दासी बिल्हा खे दी, कि वा अपनी लुगेन हुये; याकुब ओका पास गयो. 5 अरु बिल्हा पेटसे हुय अरु याकुब से ओको एक बेटो पैदा हुयो. 6 तब राहेल ने बोल्यो, "परमेश्वर ने मरो न्याय चुकायो अरु मरी सुने खे मे खे एक बेटो दियो." येकालिये पोने ओको नाम दान* रख्यो. 7 राहेल कि दासी बिल्हा फिर पेटसे हुय अरु याकुब से एक बेटो अरु पैदा हुयो. 8 तब राहेल ने बोल्यो, "मेने अपनी बहीन का सात बडा बल से गुडी खे मल्लयुध्द कऱ्यो अरु अब जीत हुय गय." आखरी मे ओने ओको नाम नप्ताली* रख्यो.

9 जब लिआ ने देख्यो मी जनना से वंचित हुय गय हइ, तब ओने अपनी दासी जिल्पा खे लि खे याकुब कि लुगेन होन का लिये दि दियो. 10 अरु लिआ कि दासी जिल्पा को भी याकुब से एक बेटो पैदा हुयो. 11 तब लिआ ने बोल्यो, "अहो भाग्य" येकालिये ओने उसका नाम गाद* रखी. 12 फिर लिआ की दासी जिल्पा खे याकुब से एक अरु बेटा उत्‍पन्‍न हुयो. 13 तब लिआ ने बोल्यो, "मी अच्छो हइ; सची मे खे बइहोन अच्छी बोल्ये." येकालिये ओने ओको नाम आनेर रख्यो.

14 गहु कटान का दिन मे रुबेन की मैदान मे दुदाफल मिल्यो, अरु वे उन खे अपनी माय लिआ का पास ली खे गयो, तब राहेल ने लिआ से बोल्यो, "अपना बेटा का दूदाफलों* मे से कुछ मे खे दे." 15 ओने ओकासे बोल्यो, "तोने जो मरो अदमी खे लि लियो हइ का या छोटी बात हइ? अब का तु मरा बेटा को दुदाफल भी लेनो चास हइ?" राहेल ने बोल्यो, "अच्छो, तरो बेटा को दुदाफालहोन को बदलो उ आज रात खे तरा संग सोये." 16 शाम खे जब याकुब खेत से आय थो, तब लिआ ओकासे मिलन का लिये निकली, अरु बोल्यो, "तो खे मरा ही पास आनो हुये, क्युकी मेने अपना बेटा खे दुदाफल दी खे तारा से सचमुच मोल लिय," तब उ वा रात खे ओका संग सोयो. 17 तब परमेश्वर ने लिआ कि सुनी, अरु वा पेटसे हुय अरु याकुब से ओ खे पाचवो बेटो पैदा हुयो. 18 तब लिआ ने बोल्यो, "मेने जो अपना अदमी खे अपनी दासी दी, येकालिये परमेश्वर ने मे खे मरी मरदुरी दी हइ." येकालिये ओने ओको नाम इस्साकार रख्यो, 19 लिआ फिर पेटसे हुय अरु याकुब से ओको सावो बेटो पैदा हुयो. 20 लिआ ने बोल्यो, "परमेश्वर ने मे खे अच्छो दान दियो हइ; अब कि बार मरो अदमी मरा संग बन्यो ऱ्हीहे, क्युकी मरा ओकासे छ : बच्चा पैदा हुय गया हइ." येकालिये ओको नाम जबूलून* रख्यो. 21 ओका बाद मे ओ खे एक बेटी भी हुय, अरु ओने ओको नाम दीना रख्यो. 22 परमेश्वर ने राहेल खे भी याद कऱ्यो, अरु राहेल कि प्रार्थाना सुनी अरु ओकी कोख खोली. 23 येकालिये वा पेटसे हुय अरु ओ खे एक बच्चो पैदा हुयो; तब ओने बोल्यो, "परमेश्वर ने मरी नामधराइ खे दुर करी दियो हइ." 24 येकालिये ओने यो बोली खे ओको नाम युसुफ* रख्यो, "परमेश्वर मे खे एक बेटो अरु भी दिये."

25 जब राहेल से युसुफ पैदा हुयो, तब याकुब ने लाबान से बोल्यो, "मे खे बिदा कर कि मि अपना देश अरु जगा पर वापस जायु. 26 मे खे मरी लुगय अरु बच्चा, जिनका लिये मेने तरी सेवा करी ऐ, उनने मे खे दे कि मी चली जायु; तु तो जजानस हइ कि मेने तरी कसी सेवा करी हइ." 27 लाबान ने ओकासे बोल्यो, "अगर तरी नजर मे मेने अनुग्रह पायो हइ, ते यो ही र्हि जा; क्योकि मेने अनुभव से जानी लियो हइ कि यहोवा ने तरा कारन से मे खे आशीष दी हइ." 28 फिर ओने बोल्यो, "तू ठिक से बता कि मि तो खे का देउ, अरु मी ओ खे दियु." 29 ओने ओकासे बोल्यो, "तू जानस हइ कि मेने तरी कसी सेवा करी, अरु तरा जनवर मरा पास कोनता प्रकार से र्हिये. 30 मरा आना से पैयले वे कित्ता था, अरु अब कित्ता हुय गया हइ; अरु यहोवा ने मरा आना पर तो खे आशीष दियो हइ, पर मी अपना घर का काम करी पायू?" 31 ओने फिर बोल्यो, "मि तो खे का दियु? याकुब ने बोल्यो, तू मे खे कुछ मत दे; अगर तू मरा लिये एक काम कर, ते मी फिर तरी मेदा बकरीहोन खे चरायु, अरु उनकी रक्षा कर्यु. 32 मि आज तरी सब मेदा बकरीहोन का बीच हुय खे निकल्यु, अरु जो मेडा काला हुये, अरु जो बकरी चितकबरी अरु चित्तीआली हुये, उन खे मि अलग करी खे रख्यु; अरु मरी मजदुरी मे वे ही ठैर्ये. 33 अरु जब आगे कि मरी मजदुरी कि चर्चा तरा सामने चल्ये, तब धर्म यही साक्षी हुये; अर्थात बकरीहोन मे से जो कोय न चित्तीआला न चितकबरी हो अरु मेडा मे से जो काली नी हुये, अगर मरा पास निकल्ये, ते चोरी कि ठैर्ये" 34 तब लाबान बोल्यो, "तरा बोलन का हिसाब से हो." 35 आखरी मे ओने उय दिन सब धारीआला अरु चितकबरी बकरीहोन खे अर्थात जिनमे कुछ उजलो पन थो, उनको अरु सब काली मेडा खे भी अलग करी खे अपना अपना बेटाहोन का हात दि दियो. 36 अरु ओने अपना अरु याकुब का बीच तीन दिन का रस्ता का अन्तर ठैरायो; अरु याकुब लाबान का मेडा बकरीहोन को झुंड खे चाराने लगीयो.

37 अरु तब छिली हुय लकडीहोन लि खे, उनका छिलका बोल्यो-बोल्यो छिली खे, उनके खे धारीदार ननै दियो, असी कि उन लकडीहोन की सफेदी दिखैइ देन लगी. 38 अरु तब छिली हुय लकडी खे मेडा बकरीहोन का सामने उन खे पाणी पीन का जागा मे ओ खे खडी करी; अरु जब वे पाणी पीन का लिये अय तब गाभन हुय गय. 39 लकडीहोन का सामने गाभन हुय खे, मेडा बकरीहोन धारीआला, चित्तीआला अरु चितकबरा बच्चा जन्या. 40 तब याकुब ने मेडाहोन का बच्चाहोन खे अलग अलग कर्यो, अरु लाबान की मेडा-बकरीहोन का मुंडा खे चित्तीआला अरु सब काला बच्चाहोन का तरफ करी दियो; अरु अपना झुण्डहोन खे उनसे अलग रख्यो, अरु लाबान का मेडा-बकरीहोन से मिलन नी दि 41 अरु जब ताकतदार बकरीहोन गाभन होती थी, तब तब याकुब उन छडिहोन खे कठौती मे उनका सामने रखी देतो थो; जेकासे वे छडीहोन खे देखती हुय गाभन हुय जाये. 42 पर जब निर्बल मेडा बकरीहोन गाबन होती थी, तब उ उनने उन खे आगे नी रखतो थो, येकासे निर्बल लाबान की र्‍हि, अरु बलवन्त-बलवन्त याकुब की हुय गय. 43 यो प्रकार उ इन्सान भोत धनवान हुय गयो, अरु ओका बहुत सा मेडा बकरीहोन, अरु दासीहोन अरु दास अरु उट अरु गधाहोन हुय गया.