1 एक दिन लिआ की बेटी दीना, जो याकुब से पैदा हुय थी, वा देश कि पोर्यीहोन से मिलन गय. 2 तब उ देश का प्रधान हिव्वी हामोर को बेटो शेखेम ने ओ खे देख्यो, अरु ओ खे लि जैय खे ओ खे साथ कुकर्म करी खे ओ खे भष्ट करी दियो. 3 तब ओको मन याकुब कि बेटी दीना से लगी गयो, अरु ओने वा पोर्य से प्रेम कि बातहोन करी, अरु ओकासे प्रेम करन लग्यो. 4 आखरी शेखेम ने अपना बाप हामोर से बोल्यो, "मे खे या पोर्यी खे मरी लगय होन का लिये दिल्यै दे." 5 अरु याकुब ने सुन्यो कि श खेम ने मरी बेटी दीना खे अशुध्द करी डाल्यो हइ, पर ओको बेटो उ टेम्मे जनवर हो का साथ जंगल मे थो, येकालिये उ उनका आना तक चुप र्‍हियो. 6 तब शेखेम को बाप हामोर निकली खे याकुब से बातचीत करन का लिये ओका पास गयो. 7 याकुब को बेटो यो सुनते ही मैदान से बहुत उदास अरु घुस्सा हुय खे आयो; क्युकि शेखेम ने याकुब का बेटी का सात कुकर्म करी खे इस्राएल का घराना से मुर्खता को असो काम कर्यो थो, जेको करनो असंभव थो. 8 हामोर ने उन सबसे बोल्यो, "मरो बेटो शेखेम को मन तुम्‍हारी बेटी पर बहुत लग्यो हइ, येकालिये ओ खे ओकी लुगय होन का लिये ओ खे दि दे, 9 अरु हमारा साथ ब्याव किया करनु; अपनी बेटिहोन हम खे दिया करनु, अरु हमारी बेटिहोन खे खुद लिया करनु. 10 अरु हमारा संग बस्या र्हेनु; अरु यो देश तुम्हारा सामने पड्यो हइ; येमे र्‍हि खे धंदापाणी करनु, अरु ओकी भुमी खे खुद लिले." 11 अरु शेखेम ने भी दिना का बाप अरु भइहोन से बोल्यो, "अगर मरा पर तुम दुन्या होन को अनुग्रह कि नजर हो, तो जो कुछ तुम मरासे बोल, उ मि दियु. 12 तुम मरासे कित्तो भी दाम या बदलो क्यु नी माग, ते भी मि तुमारा बोलना अनुसार दियु पर वा पोर्यी खे लुगय होन का लिये मे खे दि दे." 13 तब यो सोची खे कि शेखेम ने हमारी बैहीन दीना खे अशुध्द कर्यो हइ, याकुब का बेटाहोन शेखेम अरु ओका बाप हामोर खे छल का साथ यो जवाब दियो. 14 "हम असो काम नी करी स खे कि कोय खतनारहित इन्सान खे अपनी बैइन दे; क्युकि येकासे हमारी बदलामी हुये. 15 या बात पर तो हम तुम्हारी मानी लिये कि हमारो सामन तुम मे से हर एक इन्सान को खतनो कर्यो जाय. 16 तब हम अपनी बेटिहोन तुम खे ब्यान दिये, अरु तुम्हारी बेटिहोन भ्यावी लिये, अरु तुम्हारा संग कुल भी र्‍हिये, अरु हम दोय एक ही समुदय का इन्सान हुय जाये. 17 पर अगर तुम हमारी बात नी मानी खे अपनो खतनो नी कराये, ते हम अपनी पोर्य खे लि खे यहा से चली जाये." 18 ओकी या बात पर हामोर अरु ओको बेटो शेखेम खुश हुया खे चली जाया. 19 अरु उ जवान जो याकुब की बेटी खे बहुत चाहतो थो, यो काम खे सकरना मे ओने टेम नी लगायो, उ तो अपना बाप का सारा घराना मे जादा सम्मानित इन्सान थो. 20 येकालिये हामोर अरु ओको बेटो शेखेम अपना नगर का फाटक का पास जैय खे नगरवासीहोन खे यो समझान लग्यो; 21 "वे इन्सान तो हमारा सात मेल से र्‍हेनो चाहस हइ; अत; उन खे यो देश मे र्‍हि खे लेन देन करन दे; देख, यो देश उनका लिये भी बहुत हइ; फिर हम इन्सान उनकी बेटिहोन खे ब्याइ ले, अरु अपनी बेटिहोन खे उन खे दिया करनु. 22 वे इन्सान फक्त या बात पर हमारा संग र्‍हेन अरु एक ही समुदाय का इन्सान हो जान खे खुश हइ कि उनका जसा हमारा सब इन्सान होन का भी खतनो किया जाय. 23 का उनका मेडा बकरीहोन, अरु गाय बैल वरन उनका पुरा जनवर अरु धन सम्पत्ती हमारी नी हुय जाये इत्तो ही क्रये कि हम इन्सान होन उनकी बात मानी ले, तो वे हमारा सात र्‍हिये." 24 येकालिये जेत्तो उ नगर का फाटक से निकता था, वे सभी ने हामोर का तरफ ओको बेटो शेखेम की बात मानी; अरु हर एक इन्सान को खतनो कर्यो गयो, जित्ता उ नगर का फाटक से नीकलता था. 25 तीसरा दिन, जब वे इन्सान पिडित पड्या था, तब असो हुयो कि शिमोन अरु लेवी नामको याकुब का दो बेटाहोन ने जो दीना का भइ था, अपनी अपनी तलवार लि उ नगर मे निडरता घुसी खे सब इन्सानहोन खे मारी डाल्यो. 26 हामोर अरु ओको बेटो शेखेम खे उनने तलवार से मारी डाल्यो, अरु दीना खे शेखेम का घर से निकाली ली गया. 27 याकुब का दोय बेटाहोन ने मारी डालना पर भी चडी खे नगर खे येकालिये लुटी लियो कि ओने ओकी भैइन खे अशुध्द करी थी. 28 उनने मेडा बकरी अरु गाय बैल, अरु गधाहोन, अरु नगर अरु जंगल मे जित्तो धन थो लि लियो. 29 उन सब खे, अरु उनका बाल बच्चाहोन, अरु बइहोन खे भी चोरी खे लि गया, वरन घर मे जो कुछ थो, उन खे भी लुटी लि गया. 30 तब याकुब ने शिमोन अरु लेवी से बोल्यो, "तुमने जो यो देश का रेनआला कनानिहोन अरु परिज्जीहोन का मन मे मरा प्रति घृणा पैदा करी हइ, येकासे तुमने मे खे संकट मे डाल्यो हइ, क्युकि मरा साथ तो थोडा ही इन्सान हइ येकालिये अब वे इकठ्ठा हुय खे मरा पर चड्या, अरु मे खे संकट मे डाल्यो, ते मी अपना घराना समेथ नास हुय जाये." 31 उनने बोल्यो, "का वा हमारी भैइन का साथ वेश्या का समान बर्ताव कर्ये?"