Gênesis 50

1 तब युसुफ अपना बाप का मुंडा पर गिरि खे रोयो अरु ओ खे चुम्यो. 2 अरु युसुफ ने उन वैद्यहोन खे, जो ओका सेवक था, आज्ञा दी कि ओका बाप कि लास मे गंदान आलो द्रव्य भरनु; तब वैद्यहोन ने याकुब खे लास मे गंदान आलो तेल भरी दियो.

3 अरु ओका चालीस दिन पूरा हुया, क्युकि जिनको शव मे गंदान आलो-द्रव्य भरी जास हइ, उन खे इत्ता ही दिन पूरा लगस हइ; अरु मिस्री इन्सान ओका लिये सत्तर दिन तक शोक करता र्‍हिया. 4 जब ओका शोक विलाप का दिन बीती गया, तब युसुफ फिरोन का घराना का इन्सानहोन से बोलन लग्या, "अगर तुम्हारा अनुग्रह की नजर मरा पर हो तो मरो यो संदेश फिरोन खे सुनानु, 5 मरा बाप ने यो बोली खे, ‘देख मी मरना पर हइ,’ मरासे या कसम खलैइ, ‘जो कब्र मेने अपना लिये कनान देश मे खोदै हइ ओमे मी तू मे खे मट्टी दिये.’ येकालिये अब मे खे व्हा जैय खे अपना बाप खे मट्टी देन की आज्ञा दे, बाद मे वापस आयु."*50:5 उत्पती 47;29,31 6 तब फिरोन ने बोल्यो, "जैय खे अपना बाप की खलैइ हुय कसम का अनुसार ओ खे मट्टी दे." 7 येकालिये युसुफ अपना बाप खे मट्टी देन का लिये चल्यो, अरु फिरोन का सब काम आला, अर्थात् ओका भवन का पुराना, अरु मिस्र देश का सब बापदादा ओका संग चल्या. 8 अरु युसुफ का घर का सब इन्सान, अरु ओका भइ, अरु ओका बाप का घर का सब इन्सान भी संग गया; पर वे अपना बाल-बच्चाहोन, अरु मेडा-बकरिहोन, अरु गाय-बैलहोन खे गोशेन प्रदेश मे छोडी गया. 9 ओका संग रथ अरु सवार गया, यो प्रकार भीड भोत हुय गय. 10 जब वे आताद का खलिहान तक, जो यरदन नद्दी का पार हइ, पहुँच्या, तब व्हा भोत भारी विलाप कर्यो, अरु युसुफ ने अपना बाप का लिये सात दिन को विलाप करायो. 11 आताद खे खलिहान मे का विलाप खे देखी खे उ देश को निवासी कनानिहोन ने बोल्यो, "यो ते मिस्रिहोन को कोय भारी विलाप हुये," यो कारण उ जगा को नाम आबेलमिस्रैम पड्यो, अरु उ यरदन का पार हइ.

12 इस्राएल का बेटाहोन ने ठीक उय काम कर्यो जेकी ओने उन खे आज्ञा दी थी : 13 अर्थात् उनने ओ खे कनान देश मे ली जैय खे मकपेलावाली वा जमीनआली गुफा मे, जो मम्रे को जसो हइ, मट्टी दी; जे खे अब्राहम ने हित्ती एप्रोन का हाथ से येकालिये मोल लियो थो, कि उ कब्रिस्तान का लिये ओकी खुद की जमीन हो.

भइहोन खे आश्वासन देनो

14 अपना बाप खे मट्टी दि खे युसुफ अपना भइहोन अरु वे सब समेत, जो ओका बाप खे मट्टी देन का लिये ओका संग गया था, मिस्र लौट आयो.

15 जब युसुफ का भइहोन ने देख्यो कि हमारो बाप मरी गयो हइ, तब बोलन लग्या, "कदाचित् युसुफ अब हमारा पीछे पड्ये, अरु जेत्ती बुराइ हमने ओकासे बोली थी सब को पूरो बदलो हम से ले." 16 येकालिये उनने युसुफ का पास यो बुलाओ भेज्यो, "तरा बाप ने मरना से पयले हम खे या आज्ञा दी थी, 17 तुम इन्सान युसुफ से यो प्रकार बोलनु, कि हम बिंनती करस हइ, कि तू अपना भइहोन को अपराध अरु पाप खे माप कर; हमने तरा से बुराइ करी थी, पर अब अपना बाप का परमेश्वर का दासहोन को अपराध माप कर." उनकी या बातहोन सुनी खे युसुफ रोइ पड्यो. 18 अरु उनका भइ खुद भी जै खे ओका सामने गिर पड्या, अरु बोल्यो, "देख, हम तरा दास हइ." 19 युसुफ ने उनसे बोल्यो, "मत डरनु, का मी परमेश्वर का जगह पर हइ. 20 अगर तुम इन्सानहोन ने मरा लिये बुराइ को बिचार कर्यो थो; पर परमेश्वर ने उय बात मे भलाइ को बिचार कर्यो, जेकासे उ असो कर्यो, जसो आज का दिन प्रगट हइ, कि भोत सा इन्सानहोन को जान बच्यो हइ. 21 येकालिये अब मत डरनु: मी तुमारो अरु तुमारा बाल-बच्चा को पालन-पोषण करतो र्‍हियु," यो प्रकार ओने उन खे समझा-बुझ्येय खे शान्ति दी.

युसुफ को मरनो

22 युसुफ अपना बाप का घराने समेत मिस्र मे र्‍हियो, अरु युसुफ एक सौ दस साल जीन्दो र्‍हियो. 23 अरु युसुफ एप्रैम का नातीपोतों तक खे देख पाया अरु मनश्शे का नाती, जो माकीर का बेटा था, वे पैदा हुया अरु युसुफ ने उन खे गोद मे लियो. 24 युसुफ ने अपना भइहोन से बोल्यो, "मी तो मरना पर हइ; पर परमेश्वर सच्ची तुम्हारी याद लिये, अरु तुम खे यो देश से निकाली खे उ देश मे पहुँचै दिये, जेका देन की ओने अब्राहम, इसहाक, अरु याकुब से कसम खैइ थी." 25 फिर युसुफ ने इस्राएलिहोन से यो बोलि खे कि परमेश्वर सच्ची तुम्हारी याद लिये, उन खे यो बारेमे की कसम खलइ, "हम तरी हड्डिहोन खे यहा से कनान देश मे ली जाये."*50:25 इब्री 11;22 यहुन्ना 24;32 26 यो प्रकार युसुफ एक सौ दस साल को हुय खे मरी गयो: अरु उनका आंग मे सुगन्ध-द्रव्य भरी गयो, अरु उ आंग मिस्र मे एक पेटी मे रख्यो गयो.