Mateus 26

Akaligi kw’ogufarha n’okuyirha Yeesu

1 Yeesu abeere amala kuderha eyo myaazi yooshi, abwira abigirizwa baage ntya: 2 «Muyinji oku hayoorha siku ebiri embere olusiku lukulu lw’ePaasaka luhike. Munayinji oku nyoono Mwene oMuntu nalenganywa yi mbambwe oku musalaaba.»

3 Abakulu b’abadaahwa n’abashamuka b’aBayaahudi babuganana emw’omudaahwa mukulu, oyirikwa Kayaafa. 4 Bajirira Yeesu akaligi k’oku mufarha omu bwibisho yi bamuyirhe. 5 Aliko baderha ntya: «Rhurhamufarhaga omu olusiku lukulu lw’ePasaka, y’olwamo lurhaba omu lubaga.»

Omukazi ashiiga Yeesu amarashi oku rhwe

6 Yeesu abeere ali omu gishagala ch’eBetaniiya, aja omu nju y’omuntu muguma oyirikwa Simooni. Oyo Simooni aliiri mubenzibenzi. 7 Babeere bali balya, mukazi muguma ayegeera hoofu na Yeesu. Oyo mukazi aligwerhe omukebo*26.7 Ogu mukebo gwabaaga gukwizizwe omu baale ly’akamaro liyirikirwe alubateere. guyunjwire amarashi m’agachiiro kanene. Anasheeshera oku rhwe lya Yeesu. 8 Abigirizwa ba Yeesu babeere babona ntyo, bagaya bweneene. Baderha ntya: «Girhumire oyu mukazi aheza ama marashi busha? 9 Ama marashi mankaguzizwe oku gichiiro chinene bweneene, n’efuranga mankagulirwe mo, zagarhabeere abakene!»

10 Aliko Yeesu amenya oko kugaya kwabo. Oko kw’arhuma ababaza ntya: «Girhumire mwalunza oyu mukazi ntya? Ka girhali chijiro chinja echi ankolere? 11 Abakene baaba haguma nenyu esiku zooshi, sy’aliko nyoono ntaaba haguma nenyu esiku zooshi. 12 Oyu mukazi anshigire amarashi omu gurheganya oguhambwa kwani. 13 Okuli mbabwirire oku omu gulu lyooshi, ngasi hantu oMwazi Mwinja nji gwaba guli gwabalwa, nji balema baderha elugulu w’echijiro oyu mukazi ajirire. Elugulu w’oko, oyu mukazi alema ayibukwa.»

Yuuda ahaana Yeesu

14 Enyuma z’ebyo, muguma omu ntumwa ekumi n’ebiri za Yeesu, oyirikwa Yuuda Isikariyooti, aja emw’abakulu b’abadaahwa. 15 Ababaza ntya: «Bichi mwampa akonva mbahere Yeesu?» Bamuha bicheri makumi masharhu by’efuranga*26.15 Bicheri makumi masharhu byaliiri furanga balemaga bahonga oku muja enka yayirhaga. Osome Lubunguluko 21.32.. 16 Gurhengera amo mango, Yuuda arhondera gushonda obulyo abaheereza mo Yeesu.

Yeesu alya ePaasaka haguma n’abigirizwa baage

17 Olusiku lurhanzi lw’esiku y’edinye y’emigati nzira chachu, abigirizwa ba Yeesu bamuhikira n’okumubaza ntya: «Ngahe oshondere rhugurheganyizage ebiryo by’ePaasaka?» 18 Yeesu abashubiza ntya: «Muje omu gishagala, emw’omuntu muguma. Oyo muntu, mumubwire ntya: ‹oMwigiriza aderhere oku egihe aliiri alinga chiri hoofu. Leero, omu mwawe mwalira ePaasaka haguma na bigirizwa baage.›» 19 Abo bigirizwa bajira nk’oku Yeesu abarhegekaga, barheganya ebiryo by’ePaasaka.

20 Lyabeere golo, Yeesu ayikala kulya ebiryo haguma n’entumwa zaage ekumi n’ebiri. 21 Babeere bali balya, Yeesu aderha ntya: «Okuli, mbabwirire oku muguma mu mwabo andenganya.» 22 Ogo mwazi gwagayisa bweneene abigirizwa. Elugulu w’oko, ngasi muguma arhondera kumubaza ntya: «Nnaweerhu! Ka nyoono?» 23 Yeesu abashubiza ntya: «Ola warhobeza chaligumiza naani omu mbale, ye wandenganya. 24 Nyoono Mwene oMuntu naafa gukulikirana nk’oku biyandikirwe elugulu waani omu Mandiko Matagatiifu. Aliko, buhanya oku muntu wandenganya! Oyo muntu, kwakabeere kwinja oku yeewe gurhaburhwa!»*26.24 Osome Nanga 22 na Isaya 53.

25 Yuuda wamulenganya, naye abaza ntya: «Mwigiriza! Ka nyoono?» Yeesu amushubiza ntya: «Wooyo wenyine waderhere!»

Ebiryo by’okuyibuka Nnaweerhu

26 Babeere bachiri baalya, Yeesu arhoola omugati, akuuza Nnamahanga. Aguchagulanga, aguha abigirizwa baage. Aja ababwira ntya: «Murhoole ogu mugati mugulye, kwenge guno guli mubiri gwaani.» 27 Enyuma z’ebyo, arhoola engumbu, akuuza Nnamahanga. Ayiha bo n’okubabwira ntya: «Munywe ko mweshi, 28 kwenge eyila, eri shagama yaani, eyerekeene egihango Nnamahanga ajirire n’olubaga lwage. Eyo shagama yasheshekala omu guchungula bantu banene, yi bababalirwe ebyaaha byaabo.