1 Itɨ gwa, ʉsese kitʉmania mʉlɨmo ni Itunda, kʉʉminena mʉleke kʉgomba ʉkende ʉwo naɨmʉsɨngɨɨye kʉpuma kʉng’wi Itunda ʉlimɨle nakanda. 2 Itunda ʉlʉngile itɨ,

"Itungo naɨlɨgombekile aɨnʉkʉtegeeye,

itungo nɨla ʉgunwi

aɨnʉkʉaɨɨye,

Itɨ gwa, itungo niligombekile ingɨ lɨlɨ,

Kolwa! Lʉhikʉ nʉla kʉgunɨka ingɨ lʉlʉ.

3 Ingɨ kʉleke kʉasasha antʉ angɨɨza asoshe ʉmʉlɨmo witʉ, shanga kʉloilwe kʉmʉgilya mʉntʉ wɨhi waleke kʉhʉɨɨla. 4 Nsuta nɨ itɨ kigelekile kɨna ʉsese kɨitʉmi ang’wi Itunda. Kiʉmɨɨye nangalʉʉ mʉwagigwi nʉ mʉʉkaku nʉ mʉlwago. 5 Kʉkʉilwe nʉ kʉtugwa mʉmageleza nʉkʉhamɨɨlwa pa antʉ, kitʉmile mɨlɨmo nɨmɨkaku, ʉtikʉ nʉ ng’ʉng’wɨ shanga aɨkɨkendalya ang’wɨ kʉlala. 6 Kɨonwa kɨna kɨ itʉmi a mɨlɨmo ang’wi Itunda kʉnkolo nɨnza nʉ ʉmanyi nʉ wiʉmɨɨlyi nʉ ʉkende nʉ kʉ Ng’wahʉ Ng’welʉ nʉ kʉʉlowa nʉwa tai, 7 kʉtambʉla mpola niya tai nʉ kʉngulu yang’wi Itunda. Ʉtyata tai yɨyo yɨgɨ yitʉ niya kilahɨla nɨ ngʉla akikɨngɨla. 8 Ʉsese kʉʉmitʉmɨla Itunda antʉ akʉkʉlye ang’wɨ akʉdalahe, akʉsoshe ang’wɨ akʉkʉlye, kʉsɨgɨɨwe kɨna kɨateele ingɨ kʉʉtambʉla itai, 9 kʉtuile anga antʉ nɨshanga amanyɨkile, ingɨ kʉmanyɨkile kʉ antʉ ɨhi anga antʉ nɨakule, kʉnʉ kɨapanga, kɨkʉwa ingɨ shanga kɨsha, 10 kʉinwe anga kʉhʉkilye, ingɨ mahikʉ ɨhi kiloile, kʉinwe anga kɨahimbɨ ingɨ kaagolɨpilye antʉ ɨdʉ, kʉinwe anga kɨagila anga kɨntʉ ingɨ kʉkete maintʉ ɨdʉ.

11 Anyandʉgʉ itʉ Akolinto kitambʉʉye nʉnyenye shanga kipihɨɨye, hangi ʉsese kʉmʉloilwe nangalu. 12 Anga maona kɨnkwantya kɨhi nɨkakʉsasha kʉleke kʉmʉlowa ʉnyenye, kɨnkwantya nɨkanso kanyu, ʉsese shanga kʉʉleka kʉmʉlowa ʉnyenye. 13 Itɨ gwa kʉmʉɨla anga mɨana ane. Milowe anga ʉsese nɨkʉmʉloilwe.

14 Mʉleke ɨkɨhʉmbashʉya nɨ antʉ nɨshanga amʉhʉɨɨe Itunda. Itɨɨ, ʉbɨ nʉ ʉza wigombya ne? Nzelya nɨ kiti yihumilene kihanja? 15 Kilisito ʉhumile ne kilɨnga nʉ Shetani? Mʉntʉ nʉmʉhʉɨɨe Itunda ʉkilɨngane nʉyo nɨshanga ʉmʉhʉɨɨe Itunda? 16 Nyʉmba ang’wi Itunda ikete wilɨngi kɨ nɨ adʉdʉ itunda aʉteele? Ndogoelyo ʉsese kɨ Nyumba ang’wi Itunda nɨ mʉpanga. Anga Itunda ng’wenso naɨʉtambʉe:

"Kikalania nɨenso,

nʉ kʉgedania nɨenso,

Kʉtula ni Itunda wao,

nɨenso akʉtula antʉ ane."

17 Kʉlʉlo Isekʉlʉ ʉlʉngile hangɨ,

"Hegi mʉng’wao,

mikome nɨenso,

miko kʉamba intʉ niibɨ,

ʉnene kʉmʉsɨngɨɨlya.

18 Ʉnene kʉtula nɨ Tata wanyu,

nʉ nyenye mʉkʉtula mɨana ane nɨagoha nawa nɨasʉngʉ,

nene Isekʉlʉ Itunda mʉkola ngulu nɨntambʉe itɨ."