Ʉpanga mʉ Ng’wahʉ Ng’welʉ
1 Kʉlʉlo gwa, itungo ɨlɨ kʉtilɨ ʉlamʉlwi kʉ antʉ ɨhi nɨakʉmʉsania ʉ Kilisito Yesʉ, nɨshanga akee maintʉ amʉɨlɨ ʉdu ingɨ nɨanso atyatile maintʉ a Ng’wahʉ. 2 Kʉnsoko, malagɨɨlyo a Ng’wahʉ nɨleta ʉpanga mʉʉkamantani nʉ Kilisito Yesʉ akʉtungʉe mʉ malagɨɨlyo a mɨlandʉ nɨsasha nsha. 3 Itunda aɨwitʉmile makani aya nɨ malagɨɨlyo shanga ahumile kitʉma, kɨʉntʉ kɨagila ngulu. Itunda wɨkamʉlagɨɨlya ʉ Ng’waakwe wɨkaza kɨ mʉɨlɨ anga ʉsese nɨkɨlɨ, kʉkɨɨla mʉɨlɨ wakwe aɨʉhegilye ʉ mʉlandʉ. 4 Itunda aɨwitʉmile itɨ ingɨ kʉhume kituma aya natakɨwe nɨ malagɨɨlyo, shanga kitʉma makani nɨkʉloilwe ʉsese, ingɨ kitʉma makani nʉloilwe ʉ Ng’wahʉ. 5 Itɨ gwa antʉ nɨishiɨ kʉkela mʉɨlɨ mʉʉloilwe, ɨsɨga anga makani a mʉɨlɨ. Ingɨ antʉ nɨishiɨ kʉtyata nʉloilwe ʉ Ng’wahʉ Ng’welʉ, ɨsɨga misɨgo lɨlo. 6 Masɨgo akɨʉntʉ ɨsasha nsha, nɨ masɨgo a Ng’wahʉ ɨsasha ʉpanga nɨ matiliga. 7 Kʉnsoko masɨgo akʉʉkela mʉɨlɨ du siagombilwe ni Itunda, shanga ɨkela malagɨɨlyo ang’wi Itunda, hangɨ shanga ahumile kʉkela. 8 Nɨ antʉ nɨɨtyata makani a kɨmʉɨlɨ nʉwa mɨlandʉ, shanga ahumile kitʉma makani nagombekile kʉng’wi Itunda.
9 Ingɨ ʉnyenye shanga mishiɨ anga mʉɨlɨ mʉʉloewe, mishiɨ kʉtyata Ng’wahʉ nʉloewe, anga ɨze ʉdu Ng’wahʉ Ng’welʉ ʉkolɨ mʉng’wanyu. Mʉntʉ wɨhi nɨmʉgila Ng’wahʉ wang’wa Kilisito, nʉwanso shanga mʉntʉ wang’wa Kilisito.
13 Kʉnsoko anga mishiɨ ɨze mʉtyatile ntendo niya mʉɨlɨ nʉwa mɨlandʉ, shanga mʉkingɨle mʉ ʉpanga nʉwa kalɨ na kalɨ. Ingɨ anga itule kʉkɨɨla Ng’wahʉ mʉkʉibʉlaga intendo yanyu nimbɨ, itɨ gwa, mʉkingɨla mʉ ʉpanga nʉwa kalɨ na kalɨ. 14 Antʉ ɨhi nɨɨtongwa nʉ Ng’wahʉ Ng’welʉ antʉ nɨanso wawo ana ang’wi Itunda.