11 Nʉnyenye anga ɨze Ng’wahʉ Ng’welʉ aʉmiʉkilye ʉ Kilisito wikiɨ mʉng’wanyu, ʉʉgwa nʉwanso naɨ ʉmiʉkilye ʉ Kilisito ʉkʉmɨpangatalya nɨ mɨɨlɨ anyu nɨlemigwe nɨnsha, ʉkʉtenda itɨ kʉkɨɨla a Ng’wahʉ wakwe nʉwishiɨ mʉng’wanyu.
12 Kʉlʉlo anyandʉgʉ ane, kʉkete mʉlɨmo, ingɨ ʉsese shanga kʉtakɨwe kishiɨ kʉtyata mʉɨlɨ nʉʉloewe. 13 Kʉnsoko anga mishiɨ ɨze mʉtyatile ntendo niya mʉɨlɨ nʉwa mɨlandʉ, shanga mʉkingɨle mʉ ʉpanga nʉwa kalɨ na kalɨ. Ingɨ anga itule kʉkɨɨla Ng’wahʉ mʉkʉibʉlaga intendo yanyu nimbɨ, itɨ gwa, mʉkingɨla mʉ ʉpanga nʉwa kalɨ na kalɨ. 14 Antʉ ɨhi nɨɨtongwa nʉ Ng’wahʉ Ng’welʉ antʉ nɨanso wawo ana ang’wi Itunda. 15 Kʉnsoko, shanga mʉpewe nkolo aʉtʉng’wa nɨleta ʉwoa, ingɨ mʉsɨngɨɨye Ng’wahʉ nʉwa kʉmʉpa ʉhumi mʉtule mɨana ang’wi Itunda, nʉ Ngwa’hʉ nʉwanso ʉsese kʉʉmitanga Itunda, "Abba" ʉng’waao "Tata!" 16 Nʉ Ng’wahʉ Ng’welʉ ng’wenso witambʉla mʉnkolo yɨtʉ kɨna ʉsese kɨ ana ang’wi Itunda. 17 Itɨ gwa, kʉnsoko ʉsese kɨana ang’wi Itunda, kʉʉsɨngɨɨlya ʉkembetwi wɨhi nʉwang’wi Itunda naʉaɨkɨye antʉ akwe, hangɨ kʉʉsɨngɨɨlya makani nanso palʉng’wɨ nʉ Kilisito, kʉlʉ kʉʉlʉ anga kagigwe palʉng’wɨ nʉ Kilisito, kʉ ʉkʉligwa palʉng’wɨ nʉng’wenso.