Marcos 1

yeffeγ yuwHenna elmeεmdan

1 tebδe elbcareθ s yesuwε elmesiyH*1.1 elmesiyH - yeεni elli yemmenγel felles uwδi. emelmlek elli yexθari rebbi yemmenγel felles uwδi seg enbi nrebbi (1 Sm 10:1). memmis nrebbi*1.1 memmis nrebbi - meεnahe γer iyehuwdiyyen ezzerriyεeθ ndawud uγer elli muc δyehuwdi meεnahe eryaz elli δimqeddes seg rebbi (1 Sm 7:8; mz 2:7), 2 max i yuri enbi icεiyya: «tay δeθezne ezzaθ nuδmex emerseliyw, elli δexiged ebriδex. 3 elziwiyn yetzeεweg g essewweθ, <geddeθ ebriδ n erreb, egmas ikeyyesnes δimsegmen.>» 4 yeffeγ yuwHenna elmeεmdan g essewweθ yetnabe g leεbaδ yeθmeεmuwdiyyeθ*1.4 meεmuwdiyyeθ muc δelfekreθ ettejδiyt. max i yjen muc δyehuwdi eyerjeε yeddiyn eyehuwdiy, yelzem eyεemmeδ imenes ezzaθ neccuhhaδ. yemenni elHajeθ tejδiyt utuγribθ yiyehuwdiyyen netteθ elli iyehuwdiyyen elli emmexθaren seg rebbi yelzemhum zade enedmen eθεemden., ellemareθ nettuwbeθ bac e mmeγferneθ leδnubensen. 5 ukanen etteffeγnas seg θemuwreθ nyehuwdiyye duwrceliym elkul usiyn eniεemmeδ g esuwf nelurdun unihnin eqqaren g leδnubensen. 6 yuwHenna ykan iraδ edbac s unuwber nileγman, wessebθeθ nwiliym f elHzemes, uyedder f buwrγas ettamemt teberriyθ. 7 w ykan yeqqar: «δeyeddes beεδiyw δ wiyn eqwaw, δ wiyn ettesθehilac Hette etebSe miyrγas tilelli neSSendeles. 8 neč eεmeδγawem s wamen, yemenni nette δexenyεemmeδ s erruwH nelqudus.»

yuwHenna yεemmeδ yesuwε

9 g liyyametdiyn yuseδ yesuwε seg ennaSreh elli g eljliyl yeθεemmeδ f wafus nyuwHenna g esuwf nelurdun. 10 g elweqθelli yuwli yesuwε seg amen yezre esmawaθ mirneθ werruwH nelqudus etteggez felles emteδbiyrθ. 11 yeggez eSSuwθ seg esme: «cex δmemmi elli exsγex, wessix efreHe egget.»

ecciyĎan eyjerreb yesuwε

12 elweqθes tessuwfeγθ erruwH nelqudus yessewweθ, 13 yeqqiym diyn erbεiyn yuwm yetjerreb δiys ecciyĎan, elhwayec kanneθ iyδes, welmlayxe kanneθ xeddemneθ δiys.

yesuwε g eljliyl: etlamδe iglewlen

14 max i yemmeTTef yuwHenna, yuseδ yesuwε yeljliyl yetbeccer s elbcareθ nrebbi, 15 uyeqqar: «yiweD elweqθ, teqreb elmemlxeθ nrebbi*1.15 meεnahe rebbi dah bac e yeHkem kul Hed., tuwbeθ, temnem s elYinjiyl.»

16 unette yegguwr f eccafeθ niylel neljliyl yezer sen δiSeyyaδen semεan dunjes endrawus etlewHen g eccebkθensen g iylel, 17 yennasen yesuwε: «eθbeεmiyδ ture exennerre ettetfem g leεbaδ.» 18 elweqθes seyben lecbekensen eθbεent 19 yuyuwr qiqqi yezer yeεquwb dunjes yuwHenna, idrari nzebediy, g elfluwkθensen etgedden g lecbekensen. 20 inebaθen liyhliyh, edjen daddensen zebedi g elfluwkeθ nette dixeddemnes eθbεent.

yesuwε eygelleb erruwH ettemenzuwsθ

21 eδfen θemuwreθ nkefernaHuwm, elweqθes yaδef yelmejmeε g essebθ*1.21 essebθ - as nerraHeθ elli iyehuwdiyyen tegen δiys kan δelεaδeθ. yebδe yetseqre. 22 esθeγerben seg eseqriys, εlexaTer ykan yetseqre δiysen emelziwiyn γer-s eSSulTan, muc emimuεelmen necceriyεeθ. 23 elweqθes ykan g elmejmeε eryaz δiys erruwH temenzuwsθ, yebδe yetzeεweg: 24 «ac ihemmek δiyne, eyesuwε ennaSriy? endre tuseδeδ bac e xentehlxeδ? neč essene δ wiyn cex, eqedduws nrebbi!» 25 yenzer felles yesuwε yennes: «esger, tefγeδ seg weryaz!» 26 tessender erruwH temenzuwsθ eryazdiyn. izeεweg etzeεwiygeθ temeqqarθ teffeγ essis. 27 esθeγerben leεbaδ elkul encδen beεDhum: «δme wahen? eseqri δejδiyδ s eSSulTan! Hette δlerwaH timenzas selneθ g edwiys!» 28 elweqθes yemmencer elxebres g eljliyl elkul.

ebre ntensiybeθ nbuTrus

29 max i fγen seg elmejmeε, yuwδef nette dyeεquwb dyuwHenna yelHuwc nsemεan dendrawus. 30 tewessarθ nsemεan tkan tenεes s esxaneθ, elweqθes ennanes felles. 31 yeqreb yetweliys yeTTeft seg wefuses yessikkert. texDem felles esxaneθ tekker txeddem δiysen.

32 g tisemsiyn, beεεeδ eggaz ntefuwθ, uγeδnes imuwDan elkul delli δiysen ecyaĎen. 33 temlayem θemuwreθ elkul f elbab, 34 ysebre leεbaδ egget kul Hed s weTTenes, igelleb ecyaĎen egget, welyedjiyc ecyaĎen eδuθleyen εlexaTer esnent.

ebeccer g eljliyl

35 yekker qebl elfjer yexDem yelxle, yebδe yetzalle diyn. 36 Hewmen felles semεan dimeddukeles, 37 max i θuwfin ennanes: «leεbaδ elkul etHewmen δiyx.» 38 yennasen: «heyyeθ, enexDem ytimuwre tiddiynni bac e becre δiysneθ zade, εlexaTer neč effeγe ywahen.» 39 yenneD g eljliyl elkul, yetbeccer g elmjemεensen uyetgelleb g ecyaĎen.

ebre nunebraS

40 yesδes iyjen γer-s eTTen δemeqqar g eljildes*1.40 eTTen δemeqqar g eljildes - elli eyaDen essis eθgelben elberre ntemuwreθ εlexaTer muc δundif uδimuεδi yetmelges, yesjeδ yennes: «kan texseδ, eθgeddeδ eyeθneĎfeδ.» 41 yesxef felles yesuwε yezzel efuses ilemmesθ yennes: «exse, endaf!» 42 liyhliyh yebre ebreSes yendaf. 43 inebbeh felles yesuwε eSbiyH yezent, 44 yennes: «esliyδ, eθenneδ Hette cey yHette Hed, emme berre yelkahen*1.44 elkahen - nette δeryaz elli yettelhe s elheykel wiγerres g elheykel. yedzalle s leεbaδ uyetεawen leεbaδ bac e snen rebbi webriδ nrebbi. tessexndes imenex, tuwceδ elweεδeθ n webrax elli yweSSat muwse, δelHejjeθ yleεbaδ.» 45 yaxi yeffeγ eryazdiyn yebδe yeqqar yleεbaδ g imxanen elkul. yeδwel yesuwε eligeddec eyaδef ytemuwreθ ezzaθ nleεbaδ. yeεmer g elxle. uleεbaδ kanen etteseδnes seg imxanen elkul.