Marcos 5

egelleb nlerwaH imenzas dweγraq nixenziyren

1 ewDen yeccafeθ tissent niylel neljliyl, g ecciyreθ nijerrasiyyen. 2 max i yeggez seg elfluwkeθ yeεreDt eryaz yeffeγ seg tejebbent, weθkan δiys erruwH temenzuwsθ. 3 w ykan iεemmer diyn weliged Hed eθyeqqen Hette s esselsleθ. 4 menyeθ nmerre eθeqnen g imne deslasel yemenni ykan diyme inekkeD g imne uyetkesser g eslasel weliged Hed eθyeTTef. 5 w ykan δeggiyδ ddugges g tijebbanin dedhari, yetzeεweg uyečelleH yečeθ g imenes s elkurδ. 6 max i yezre yesuwε seg lebεiyδ, yuzzel yetweliys yesjδes, 7 izeεweg: «ecihemmek δiyye yesuwε memmis nrebbi elεali? eθjul eyetεeδbec.» 8 εlexaTer yesuwε yennayes: «eyerruwH temenzuwsθ effeγ seg weryaze!» 9 yenceδt yesuwε: «max ellesmex?» yer felles: «ellesmiyw eljiyc, εlexaTer nečin egget.» 10 imelges egget yyesuwε bac yetgellebc essis lerwaH timenzas elberre necciyrettin. 11 w ykan yelle eccebεeθ δixenziyren retεen yetwali eddehreθ. 12 mellegneθ lerwaH timenzas yyesuwε ennentes: «eznane yixenziyrendiyn bac e naδef δiysen.» 13 yedjiyneθ. effeγneθ lerwaH timenzas eδefneθ g ixenziyren. exeDmen ettezlen seg tiwni yiylel, w ykan elεδeδensen εuddi elfiyn, eγerqen δiys.

14 erwlen iniylten encren elxber g temuwreθ dijiyman, efγen leεbaδ bac e reqben δme iyejre. 15 max i DiwDen yyesuwε, zriyn eryaz elli ykan δiys eljiyc necyaĎen ygeεmez diyn yireD edbac labas εliyh, ukδen. 16 eHkenasen eccuhhaδ selli yejre yweryaz elli kanen δiys ecyaĎen uselli yejre yixenziyren. 17 ennanes yyesuwε eyexDem seg θemurθensen. 18 unette yerkeb g elfluwkeθ, imelges elli kanen δiys ecyaĎen bac e θyawi iyδes. 19 yemenni eθyedjiyc, yennes: «eδwel yelHucex dmidnex teHkiδasen s elli yegeyaxθ rebbi umax i xyerHem.» 20 yexDem eryazdiyn yebδe yHekke s elli yegeyasθ yesuwε g lemden elεecre, uleεbaδ elkul ettesθeγraben.