1 ମାଦୀୟ ବଂଶତେ ପିଲୁଡ଼୍‌ ଅକ୍ଷଶ୍ୱେରଶର ମାର୍‌ ଯେ ଦାରିୟାବସ କଲ୍‌ଦୀୟ ରାଜ୍ୟ ପରୁ ରାଜାଲ୍‌ ଆସ୍‌ମାତ୍‌ତଣ୍ଡ୍, ଅନାଦ୍‌ ପ୍ରତମ୍‌ ୱାଡ଼୍‌ସେତେ। 2 ଅନାଦ୍‌ ଶାସନ୍‌ କାଲାମ୍‌ତେ ପ୍ରତମ୍‌ ୱାଡ଼୍‌ସେତେ ନାନେ, ଦାନିୟେଲ୍‌, ଶାସ୍ତ୍ରତଡ଼୍‌ ୱାଡ଼୍‌ସେତେ ସଂକ୍ୟା, ଇତ୍କେ, ଯିରୁଶାଲମତେ ମନ୍ଦିର୍‌ ତିଆର୍‌ ଆତ୍‌ତେ ସମୟ ସତୁରି ବର୍ଷ ଆଦାନ୍‌ ବିଷୟତେ ସଦାପ୍ରବୁନ୍‌ ବେନ୍‌ ବାକ୍ୟ ଯିରିମୀୟ ବବିଷ୍ୟଦ୍‌ବକ୍ତାନ୍‌ ଗାରେ ହେୱୁସ୍‌ ମାତ୍‍ତେ, ଆଦ୍‌ ନାନେ ବୁଜେମ୍‌ ଆତ୍‌ତାନ୍‌। 3 ଆଦିଙ୍କ୍‌ ନାନେ ଉପବାସ, ନୁଲ୍‌ବାସ୍ତେ କେର୍ସ୍‌ ନୁ ନିର୍‌ ଅକି ପ୍ରାତନା ନୁ ଅନୁରଦ୍‌ତଡ଼୍‌ ପ୍ରବୁ ପରମେଶ୍ୱର୍‌ତେ ପେର୍କେ ଆଦାନଙ୍କ୍‌ ଅନ୍‌ ପାକେ ଉଡ଼୍‌ତାନ୍‌। 4 ମେଣ୍ଡେ, ନାନେ ସଦାପ୍ରବୁ ନା ପରମେଶ୍ୱର୍‌ତେ ପାକେ ପ୍ରାତନା ମାଡ଼୍‌ତାନ୍‌ ନୁ ପାପ୍‌ ସ୍ୱିକାର୍‌ ମାଡ଼ି କେତ୍‌ତାନ୍‌, ହୋ ପ୍ରବୁ, ନିମେ ମହାନ୍‌ ନୁ ୱେର୍‌ଦାନ୍‌ଲେକ୍‌ ପରମେଶ୍ୱର୍‌, ବେନଡ଼୍‌ ନିକିଂଙ୍କ୍‌ ପ୍ରେମ ମାଡ଼ିତଡ଼୍‌ ନୁ ନିୟାଦ୍‌ ଆଦେଶ୍‌ ପାଲନ୍‌ ମାଡ଼ିତଡ଼୍‌, ନିମେ ଅଡ଼୍‌ ସେଙ୍ଗେ ନିୟମ୍‌ ନୁ ଦୟା ରକ୍ଷା ମାଡ଼ମାନ୍ତିନ୍‌।

5 ମାମେ ପାପ ନୁ କାରାପ୍‌ ପାଡ଼୍‌ୟି ମାଡ଼ିମିନ୍ଦେମ୍‌ ନୁ ଦୁଷ୍କର୍ମ ମାଡ଼ି ବିଦ୍ରୋହୀ ଆସ୍‌ମିନ୍ଦେମ୍‌, ମେଣ୍ଡେ ନିୟାଦ୍‌ ପାଲନ୍‌ ନୁ ଶାସନ୍‌ତେ ଆର୍‌ ୱିଡ଼୍‌ସି ମିନ୍ଦେମ୍‌। 6 ମେଣ୍ଡେ, ନି ବେନ୍‌ ଦାସଡ଼୍‌ ବବିଷ୍ୟଦ୍‌ବକ୍ତାନଡ଼୍‌ ମା ରାଜାନଡ଼୍‌କ୍‌,ମା ଅଦିପତିନଡ଼୍‌କିଂଙ୍କ୍‌ ନୁ ମା ମୁନେତ୍‌ ଆନିଦାଦିନଡ଼୍‌ ନୁ ଦେଶ୍‌ତେ ନାରୁଡ଼୍‌ ସାରେତଡ଼୍‌ ନି ପେଦେର୍‌ତେ ଗଟ୍‌ କେତ୍‌ତଡ଼୍‌, ଅଡ଼୍‌ ପରୁ ମାମେ କେୱୁତାରମ୍‌। 7 ହୋ ପ୍ରବୁ ଦାର୍ମିକ୍‌ନଡ଼୍‌, ମାତର୍‌ ନେଟ୍‌ତେ ନ୍ୟାୟ ମକମ୍‌ତେ କାରାପ୍‌ କେତାନାଦ୍‌ ମାୟାଦ୍‌; ନି ବିରୁଦ୍ଧତେ ମାଡ଼୍‌ତେ ସତ୍ୟ ପାଲନ୍‌ତେ ସେଙ୍ଗେ ଯିହୁଦାତେ ନାରୁଡ଼୍‌ ନୁ ଯିରୁଶାଲମ୍‌ତାଗ୍‌ ମାନ୍ଦାନଡ଼୍‌ ନୁ ନି ତଡ଼୍‌ ତାଡ଼ିତ ଆସ୍‌ମାନ୍ଦାନ୍‌ ସାରେ ଦେଶ୍‌ତେ ଗାରେମାନ୍ଦାନ୍‌ ନୁ ଯେକାମାନ୍ଦାନ୍‌ ସାରେତଡ଼୍‌ ଇସ୍ରାଏଲ୍‌ ନାରୁଡ଼୍‌ କାରାପ୍‌ କେତାନ୍‌ନଡ଼୍‌। 8 ହୋ ସଦାପ୍ରବୁ, ମକମ୍‌ତେ କାରାପ୍‌ କେତାନାଦ୍‌ ମାୟାଦ୍‌, ମା ରାଜାନଡ଼୍‌, ମା ଅଦିପତିନଡ଼୍‌ ନୁ ମା ମୁନେଙ୍କ୍‌ତେ ଆନିଦାଦିଡ଼୍‌, ବାତେଙ୍କ୍‌ଇତ୍କେ ମାମେ ମି ବିରୁଦ୍ଦ୍‌ତେ ପାପ୍‌ ମାଡ଼ିମିନ୍ଦେମ୍‌। 9 ୱେର୍‌ ୱେର୍‌ ଦୟା ନୁ କ୍ଷମା ମା ପ୍ରବୁ ପରମେଶ୍ୱର୍‌ତାଦ୍‌; ବାତେଙ୍କ୍‌ଇତ୍କେ ମାମେ ଅନ୍‌ ବିରୁଦ୍ଦ୍‌ତେ କାରାପ୍‌ ବ୍ୟବହାର୍‌ ମାଡ଼ିମିନ୍ଦେମ୍‌ 10 ଅଣ୍ଡ୍‌ ନିଇ ଦାସ ବବିଷ୍ୟଦ୍‌ବକ୍ତାନଡ଼୍‌ ତଡ଼୍‌ ନିୟାଦ୍‌ ବେନ୍‌ ନିୟମ୍‌ ସାରେ ମା ମୁନେ ୱାଟ୍‌କେ, ଆଦିନ୍‌ ଲେକାମ୍‌ ପାଲନ୍‌ ମାଡ଼ାନଙ୍କ୍‌ ମାମେ ସଦାପ୍ରବୁ ମା ପରମେଶ୍ୱର୍‌ତେ ଲେଙ୍ଗ୍‌ଦିଙ୍କ୍‌ ମାନ୍‌ ଇୱମ୍‌। 11 ହୋ, ସାରା ଇସ୍ରାଏଲ୍‌ ନି ନିୟମ୍‌ ପାଲନ୍‌ ମାଡ଼ିମିନ୍ଦେଡ଼୍‌, ନି ଲେଙ୍ଗ୍‌ଦେ ବେଲାନ୍‌ ଅଡ଼୍‌ ମାନ୍‌ ଇୱେ ମାତ୍‌କେ, ଆଦିନ୍‌ ସେଙ୍ଗେ ଅଡ଼୍‌ ଡଲାନ୍‌ ଆର୍‌ଦା ଆଞ୍ଜ ମିନ୍ଦେଡ଼୍‌, ଇଦ୍‌ କାରଣତ୍‌ ସେଙ୍ଗେ ଅବିଶାପ୍‌ ନୁ ପରମେଶ୍ୱର୍‌ତେ ସେବକ୍‌ ମୋଶାନ୍‌ ନିୟମ୍‌ତେ ଲେକ୍‌ତାଦ୍‌ ପ୍ରମାଣ ମା ପରୁ ୱାଟିମିନ୍ଦେଡ଼୍‌; ବାତେଙ୍କ୍‌ଇତ୍କେ ମାମେ ଅନ୍‌ ବିରୁଦ୍ଦ୍‌ତେ ପାପ୍‌ ମାଡ଼ିମିନ୍ଦେମ୍‌। 12 ମେଣ୍ଡେ, ଅଣ୍ଡ୍‌ ମା ପରୁ ମହା ଅମଙ୍ଗଳ୍‌ ମାଡ଼ାନଙ୍କ୍‌ ମା ବିରୁଦ୍ଦ୍‌ତେ ନୁ ବେନ୍‌ ବିଚାର୍‌କର୍ତ୍ତାନଡ଼୍‌ ମାକିଙ୍କ୍‌ ବିଚାର୍‌ ମାଡ଼୍‌ତଡ଼୍‌, ଅଡ଼୍‌ ବିରୁଦ୍ଦ୍‌ତେ ବାତେ କେସ୍‌ମାତ୍‌ତଡ଼୍‌, ନିୟାଦ୍‌ ଆଦ୍‌ ବାକ୍ୟ ଅଣ୍ଡ୍‌ ସଫଳ ମାଡ଼ିମିନ୍ଦେଣ୍ଡ୍‌; ବାତେଙ୍କ୍‌ଇତ୍କେ ଯିରୁଶାଲେମ୍‌ ପରୁ ବାତ୍‌ତେ ମାଡ଼୍‌ତଡ଼୍‌, ସାରା ମାବ୍‌ତେ ମଦଲ୍‌ ଆଦ୍‌ଲେକାମ୍‌ ମାଡ଼ଡ଼୍‌। 13 ମୋଶାନ୍‌ ନିୟମ୍‌ତେ ଲେକ୍‌ତେ ଲେକାମ୍‌ ଇୱୁସାରେ ଅମଙ୍ଗଳ୍‌ ମା ପରୁ ଘଟେମ୍‌ ଆତ୍‌ତେ; ଆଗେକ୍‌ବା ବା ମାମେ ନିଜେ ନିଜେ ଅଦର୍ମତାଗାଙ୍କ୍‌ ମାଲ୍‌ଦାନ୍‌ ସେଙ୍ଗେ ନୁ ନି ସତ୍‌ତାଗାଙ୍କ୍‌ ବୁଜେମ୍‌ ଆଦାନଙ୍କ୍‌ ସଦାପ୍ରବୁ ମା ପରମେଶ୍ୱର୍‌ତେ ପାକେ ଅନୁରଦ୍‌ ମାଡ଼ମ୍‌। 14 ଆଦିନ୍‌ ସେଙ୍ଗେ ସଦାପ୍ରବୁ ଅମଙ୍ଗଳାର୍ଥେ ଜାଗ୍ରତ୍‌ଆସ୍‌ ମାନ୍‌ ପରୁ ଆଦ୍‌ ମାଡ଼ିମିନ୍ଦେଣ୍ଡ୍‌; ବାତେଙ୍କ୍‌ଇତ୍କେ ସଦାପ୍ରବୁ ମାନ୍‌ ପରମେଶ୍ୱର୍‌ ବାତ୍‌ ବାତ୍‌ ମାଡ଼ିତଣ୍ଡ୍‌, ନିୟାଦ୍‌ ଆଦ୍‌ ମାଡ଼ାନ୍‌ କାମ୍‌ତେ ଅଣ୍ଡ୍‌ ଦାର୍ମିକ୍‌ତଣ୍ଡ୍‌, ମାତର୍‌ ମାମେ ଅନ୍‌ ଲେଙ୍ଗ୍‌ଦେ ମାନ୍‌ଇୱମ୍‌। 15 ଇଞ୍ଜେ ହୋ ପ୍ରବୁ, ମା ପରମେଶ୍ୱର୍‌, ନିମେ ଶକ୍ତିମାନ୍ଦାନ୍‌ କାଇଦଡ଼୍‌ ମିସର୍‌ ଦେଶ୍‌ତାଗାଙ୍କ୍‌ ନିଜେତ୍‌ ନାରୁଡ଼୍‌କିଙ୍କ୍‌ ପେସ୍‌ସ୍ପିତାସ୍‌ ନେଟ୍‌ତେ ନ୍ୟାୟ ଲାବ୍‌ ମାଡ଼ିମିନ୍ଦେଡ଼୍‌; ମାମେ ପାପ ମାଡ଼ିମିନ୍ଦେମ୍‌, ମାମେ ଦୁଷ୍କର୍ମ ମାଡ଼ିମିନ୍ଦେମ୍‌। 16 ହୋ ପ୍ରବୁ, ବିନତି ମାଡ଼ୁତାନ୍‌, ନିୟାଦ୍‌ ସାରେ ଦାର୍ମିକ୍‌ତେ ଲେକାମ୍‌, ମିୟାଦ୍‌ ନଗର୍‌ ଯିରୁଶାଲମ୍‌, ମି ପବିତ୍ର ମେଟେତ୍‌ ପରୁ ମିୟାଦ୍‌ କପାମ୍‌ ନୁ କୋପ ତିଆର୍‌ ଆୟି; ବାତେଙ୍କ୍‌ଇତ୍କେ ମାୟାଦ୍‌ ଅପରାଦ୍‌ ନୁ ମା ମୁନେତ୍‌ ଆନିଦାଦିନଡ଼୍‌ ଅଦର୍ମ ସେଙ୍ଗେ ଯିରୁଶାଲେମ୍‌ ନୁ ମି ନାରୁଡ଼୍‌ ମା ସାରେପାକେ ନାରୁଡ଼୍‌ ନିନ୍ଦେତେ ନାରୁଡ଼୍‌ ଆସ୍‌ମିନ୍ଦେଡ଼୍‌। 17 ହୋ ମାନ୍‌ ପରମେଶ୍ୱର୍‌, ଇଞ୍ଜେ ମି ଦାସନ୍‌ ପ୍ରାତନା ନୁ ଅନୁରଦ୍‌ତାଗ୍‌ କେୱୁତାରାଟ୍‌ ନୁ ମିୟାଦ୍‌ ଇଦ୍‌ ବେନ୍‌ ଦର୍ମ ଦଂସ ଆସ୍‌ମିନ୍ଦେ, ଆଦିନ୍‌ ପରୁ ପ୍ରବୁନ୍‌ ସେଙ୍ଗେ ନିୟାଦ୍‌ ମକମ୍‌ କୁସି ମାଡ଼୍‌ଡ଼େ। 18 ହୋ ନା ପରମେଶ୍ୱର୍‌, କେୱୁତାରି କେଞ୍ଜା; ନିୟାୱୁ କଣ୍ଡା ନାକି ମା ପରୁ ନୁ ନି ପେଦେର୍‌ ଆତ୍‌ତେ ଇଦ୍ ନଗର୍‌ ପରୁ ଉଡ଼େ; ବାତେଙ୍କ୍‌ଇତ୍କେ ମାମେ ନିଜେତ୍‌ ଦାର୍ମିକ୍‌ତେ ସେଙ୍ଗେ ଆୟ, ମାତର୍‌ ନିୟାଦ୍‌ ଅନୁରଦ୍‌ ପାଲନ୍‌ ମାଡ଼ୁତମ୍‌। 19 ହୋ ପ୍ରବୁ, କେଞ୍ଜା; ହୋ ପ୍ରବୁ, କ୍ଷମା ମାଡ଼େ; ହୋ ପ୍ରବୁ, ମାନ୍‌ଇସ୍‌ କାମ୍‌ ମାଡ଼୍‌ଡ଼େ; ଡେରି ମାଡ଼୍‌ମା; ହୋ ନା' ପରମେଶ୍ୱର୍‌, ନିଜେତ୍‌ ସେଙ୍ଗେ କାମ୍‌ ମାଡ଼୍‌ଡ଼େ, ବାତେଙ୍କ୍‌ଇତ୍କେ ମିୟାଦ୍‌ ନଗର୍‌ ନୁ ନି ନାରୁଡ଼୍‌ ନି ପେଦେର୍‌ ଆତ୍‌ତଡ଼୍‌।

20 ଇଦ୍‌ଲେକାମ୍‌ ନାନେ ଅନୁରଦ୍‌ ନୁ ପ୍ରାତନା ମାଡ଼ମାତ୍‌ତାନ୍‌, ମେଣ୍ଡେ ନା’ୟାଦ୍‌ ପାପ୍‌ ନୁ ନା’ୟାଦ୍‌ ଇସ୍ରାଏଲ୍‌ ନାରୁଡ଼୍‌ ପାପ୍‌ ସ୍ୱିକାର୍‌ ମାଡ଼ମାତ୍‌ତାନ୍‌ , ମେଣ୍ଡେ ନା' ପରମେଶ୍ୱର୍‌ତେ ପବିତ୍ର ମେଟେ ସେଙ୍ଗେ ସଦାପ୍ରବୁ ନା' ପରମେଶ୍ୱର୍‌ତେ ମୁନେ ନିୟାଦ୍‌ ନିବେଦନ୍‌ତେ ପାଲନ୍‌ ମାଡ଼ମାତ୍‌ତାନ୍‌; 21 ଇଦ୍‌ଲେକାମ୍‌ ନାନେ ପ୍ରାତନା ମାଡ଼ି ଗଟି କେସ କେସ ମୁନେଙ୍କ୍‌ ଦର୍ଶନତେ ନାନେ ବେନଙ୍କ୍‌ ଉଡ଼ିମାତ୍‌ତାନ୍‌, ଆ ମାନେୟି ଗାବ୍ରିଏଲ୍‌ ଯାପେ ଡିଗିୱାସ୍‌ ଆଦେଶ୍‌ଇସ୍‌ ପ୍ରାୟ ମୁଲ୍‌ପୁଟ୍‌ ନୈବେଦ୍ୟ ସମୟ୍‌ତେ ୱାସ୍‌ ନାକିଂଙ୍କ୍‌ ଇଟ୍‌ତେ। 22 ମେଣ୍ଡେ, ଅଣ୍ଡ୍‌ ନାକିଂଙ୍କ୍‌ ଶିକ୍ଷା ଇତ୍‌ତଣ୍ଡ୍‌ ନୁ ନା’ତଡ଼୍‌ ଗଟିତିର୍‌ୟି କେତ୍‌ତଣ୍ଡ୍‌, ହୋ ଦାନିୟେଲ୍‌, ନାନେ ଇଞ୍ଜେ ନିକିଂଙ୍କ୍‌ ବୁଦ୍ଦ୍‌ତେ ଉପାୟ୍‌ ଇଦାନଙ୍କ୍‌ ୱାତ୍‌ତାନ୍‌। 23 ନି ଅନୁରଦ୍‌ତେ ଆରାମ୍ ସମୟତେ ଗଟ୍‌ ପେୟିତ୍‌ତେ, ମେଣ୍ଡେ ନିକିଂଙ୍କ୍‌ କେତାନଙ୍କ୍‌ ନାନେ ୱାତ୍‌ତାନ୍‌, ବାତେଙ୍କ୍‌ଇତ୍କେ ନିମେ ଅଦିକ୍‌ ପ୍ରିୟସାଙ୍ଗନ୍‌; ଆଦିନ୍‌ସେଙ୍ଗେ ଇଦ୍‌ ବିଷୟ୍‌ ଏର୍କେମାଡ଼େ ନୁ ଦର୍ଶନ ବୁଜେମ୍‌ ଆୟିମ୍‌। 24 ଗଟ୍‌ ମାନେମ୍‌ ଆୟ୍‌ୱାଦ୍‌ ପୁରନ୍‌ ମାଡ଼ାନଙ୍କ୍‌ ନୁ ପାପ୍‌ତେ ଶେଷ ମାଡ଼ାନଙ୍କ୍‌ ନୁ ଅଦର୍ମତେ ନିଜାମ୍‌ ମାଡ଼ାନଙ୍କ୍‌, ମେଣ୍ଡେ ଅନନ୍ତକାଳାମ୍‌ଜାକ ଦର୍ମ ତାତାନଙ୍କ୍‌, ମେଣ୍ଡେ ଦର୍ଶନ ନୁ ବବିଷ୍ୟଦ୍‌ବାକ୍ୟ ଚିହ୍‌ନ୍ନେ ନୁ ମହାପବିତ୍ର ପଡ଼ିୟେତାଗ୍‌ ତିଆର୍ ମାଡ଼ାନଙ୍କ୍‌ ମି ନାରୁଡ଼୍‌ ନୁ ମି ପବିତ୍ର ନଗର୍‌ ସେଙ୍ଗେ ସତୁରି ସାତ୍‌ ସପ୍ତାହ ତିଆର୍‌ ଆସ୍‌ମିନ୍ଦେ। 25 ଆଦିନ୍‌ ସେଙ୍ଗେ ମିଡ଼୍‌ ପୁନୁଟ୍‌ ନୁ ବୁଜେମ୍‌ ଆୟ୍‌ମୁଟ୍‌ ଯେ, ଯିରୁଶାଲେମ୍‌ତା ମେଣ୍ଡେଆଞ୍ଜ୍‌ ନୁ ତିଆର୍‌ ମାଡ଼ାନଙ୍କ୍‌ ଗଟ୍‌ କେତାନ୍‌ ସମୟତାଗାଙ୍କ୍‌ ଅଦିପତି, ହେଞ୍ଚିମାନ୍ଦାନ୍‌ ନାରୁଡ଼ାଗାଙ୍କ୍‌ ସାତ ସପ୍ତାହ ଆଦ୍‌ତା; ମେଣ୍ଡେ, କଷ୍ଟ କାଲାମ୍‌ତେ କେ ଆଦ୍‌ ନାଲୁପାକାନ୍‌ ରଟ୍‌ ନୁ ଦର୍‌ରେ ତଡ଼୍‌ ଷାଠିଏ ରେଣ୍ଡ୍‌ ସପ୍ତାହ ମେଣ୍ଡେତିଆର୍‌ ଆଦ୍‌ତେ। 26 ମେଣ୍ଡେ, ଷାଠିଏ ରେଣ୍ଡ୍‌ ସପ୍ତାହ ଲୋପେ ମାଡ଼୍‌ତେ ନାରୁଣ୍ଡ୍‌ ବିନାସ ଆଦ୍‌ତେ ନୁ ଅଣ୍ଡ୍‌ ଅର୍ତୁଣ୍ଡୁ ଆଦ୍‌ତେ; ମେଣ୍ଡେ, ୱାଦାନ୍‌ ଅଦିପତିନ୍‌ ନାରୁଡ଼୍‌ ନଗର୍‌ ନୁ ଦର୍ମ ନଷ୍ଟ ମାଡ଼ିତଡ଼୍‌ ନୁ ଗାଲ୍‌ତଡ଼୍‌ ଆଦ୍‌ ଶେଷ ଆଦ୍‌ତେ, ମେଣ୍ଡେ ଶେଷଯାକ ହି ଯୁଦ୍ଦ୍‌ଆଦ୍‌ତେ; ୱେରେୱେରେ ବିନାସ ତିଆର୍‌ ଆସ୍‌ମିନ୍ଦେ। 27 ମେଣ୍ଡେ, ଅଣ୍ଡ୍‌ ଅଣ୍ଡୟ୍‌ ସପ୍ତାହ ଯାକ ନାର୍ଗେ ନାରୁଡ଼୍‌ତଡ଼୍‌ ଢ଼ାଟୁମ୍‌ ନିୟମ୍‌ ମାଡ଼ିତିଡ଼୍‌ ନୁ ସପ୍ତାତିଙ୍କ୍‌ ଦୁଡ଼୍‌ଡ଼େ ଦିନାମ୍‌ ଆଦ୍‌ତେ ନୁ ନୈବେଦ୍ୟ ତିଆର୍‌ ମାଡ଼ିତିଡ଼୍‌; ମେଣ୍ଡେ, ପାସ୍କାନ୍‌ ଲେକେତ୍‌ ଜିନିଷ୍ ସାରେ ପରୁ ନଷ୍ଟମାଡ଼ାନଣ୍ଡ୍‌ ୱେରଣ୍ଡ୍‌ ୱାଦ୍‌ତଣ୍ଡ୍‌; ମେଣ୍ଡେ, ତିଆର୍‌ ଆୟିନା ଯାକ ନଷ୍ଟତେ ପରୁ କପାମ୍‌ ଆଦ୍‌ତେ।