1 ଦାଉଦତେ ମାର୍‌, ଯିରୁଶାଲମତେ ରାଜାନ୍‌, ଶିକ୍ଷାତେ ବାକ୍ୟ । 2 ଶିକ୍ଷାଇଦାନଣ୍ଡ୍‌ କେତୁତଣ୍ଡ, ବେକାର୍‌ତିଙ୍କ୍‌ ବେକାର୍‌, ବେକାର୍‌ତିଙ୍କ୍‌ ବେକାର୍‌, ସାରେ କେ ବେକାର୍‌ । 3 ନାରୁଣ୍ଡ୍‌ ପଡ଼ଦ୍‌ତେ ମଦଲ୍ ବେନ୍‌ ବେନ୍‌ ପାଡ଼୍‌ୟିଦେ ଆୟ୍‌ୱିତଣ୍ଡ, ଅନ୍‌ ଆ ସାରେତିଙ୍କ୍‌ ବାତ୍‌ତେ ଲାବ୍‌ ? 4 ଏଣ୍ଡୟ ପିଲୁଡ଼୍‌ ଆୟିନା ନୁ ୱେର୍‌ ପିଲୁଡ଼୍‌ ୱାଦ୍‌ତେ; ବାତେଙ୍କ୍‌ଇତ୍କେ ପୃତିବୀ ସାରେଦାମ୍‌ ମାନ୍‌ତେ । 5 ପଡ଼୍‌ଦ୍‌ ପେଇତେ ନୁ ପଡ଼୍‌ଦ୍‌ ଆନ୍‌ନ, ମେଣ୍ଡେ ନିଜେ ପେୟିତେ ପଡ଼ିୟେତାଗ ଆଦାନ୍‌ ମାଇଦିଙ୍କ୍‌ ଦାନ୍ଦେ ଆଦ୍‌ତେ । 6 ଗାଲ୍‌ ଦକ୍ଷିଣ ଦିଗ୍‌ତା ଆଦ୍‌ତେ ନୁ ଉତ୍ତର ଦିଗ୍‌ତା ମାଲ୍‌ଦ୍‌ତେ; ନିଜେତ୍‌ ଆର୍‌ଦା ସାରେଦାମ୍‌ ଉଡିତ୍‌ ନୁ ଗାଲ୍‌ ନିଜେତ୍‌ ଚକ୍ରତାକ୍‌ ମେଣ୍ଡେ ମାଲ୍‌ଦ୍‌ତେ । 7 ବେଡ଼େମ୍‌ ସାରେ ସମୁଦ୍ରତା ପଙ୍ଗିଆଦ୍‌ତା, ଆଗେବା ସମୁଦ୍ର ନିଣ୍ଡ; ବେଡ଼େମ୍‌ ସାରେ ନିଜେ ନିଜର ଆଦାନ୍‌ ପଡ଼ିୟେତାଗ୍‌ ମେଣ୍ଡନ୍‌ଦାମ୍‌ ଆଦ୍‌ତା । 8 ସାରେ ବିଷୟ ଦାନ୍ଦେତେ ନିଣ୍ଡ୍‌ତେ; ନାରୁଡ଼୍‌ ଆଦ୍‌ ତିଆର୍‌ ମାଡ଼୍‌ପାର୍‌ୱଡ଼୍‌; କଣ୍ଢା ଉଡାନଙ୍କ୍ ପାଞ୍ଜ, ବା କେୟୁ କେଞ୍ଜାନଙ୍କ୍‌ ପାଞ୍ଜ । 9 ବାତେ ଆସ୍‌ମିନ୍ଦେ, ଆଦ୍‌ଦେ କେ ଆଦ୍‌ତେ ନୁ ବାତେ ମାଡ଼ିମିନ୍ଦେଡ଼୍‌, ଆଦ୍‌ଦେ କେ ମାଡ଼ାଙ୍କ୍‌ ଆଦ୍‌ତେ; ମେଣ୍ଡେ, ପଡ଼ଦ୍‌ତେ ମଦଲ୍ ବାତେ ପୁନାଦ୍‌ ବିଷୟ ଇଲ୍ଲେ । 10 ବେନ୍‌ ବିଷୟତେ ନାରୁଡ଼୍‌ କେତିତଡ଼୍‌, ଉଡ଼େ, ଇଦ୍‌ ପୁଃନାଦ୍‌, ଇଦ୍‌ଲେକାମ୍‌ ବାତେ ବିଷୟ ମିନ୍ଦେ ? ଆଦ୍‌ତ ଇଦିନ୍‌ ମୁନେଙ୍କ୍‌ ମା ମୁନେତ୍‌ ସମୟତେ ମାତ୍‌ତେ । 11 ମୁନେତ୍‌ କାଲାମ୍‌ତେ ନାରୁଡ଼୍‌ ବିଷୟତେ ବାତେ ଏର୍କେ ଇଲ୍‌ୱମାନ୍‌ତେ; କି ବବିଷ୍ୟତ୍‌ କାଲାମ୍‌ତେ ବେନଡ଼୍‌ ପେୟିତିତଡ଼୍‌, ଅଡ଼ାଦେ ଏର୍କେ ବା ଉତ୍ତର୍‌ତେ ପାକେ ବବିଷ୍ୟତ୍ ନାରୁଡ଼୍‌ଲପେ ଇଲକଟ୍‌ମାନ୍ତେ ।

12 ନାନ୍‌ ଶିକ୍ଷା ଇଦାନଣ୍ଡ୍‌, ଯିରୁଶାଲମ୍‌ତାଗ୍‌ ଇସ୍ରାଏଲ୍‌ ପର ରାଜାଲ୍‌ ମାତ୍‌ତାନ୍‌ । 13 ମେଣ୍ଡେ, ମାବ୍‌ତେ ମଦଲ୍ ମାଡ଼୍‌ତେ ସାରେ ବିଷୟ ଜ୍ଞାନତଡ଼୍‌ ଆଲଚନା ନୁ ମେଃକାନଡ଼୍‌ ମାଇଦିଙ୍କ୍‌ ଇଚ୍ଛା ମାଡ଼୍‌ତାନ୍‌; ତାନ୍‌ପେର୍କେ ପରମେଶ୍ୱର୍‌ ଯେ ମାନେୟ୍‌ ମାର୍‌କିଡ଼୍‌କିଙ୍କ୍‌ ଦାନ୍ଦେ ଆଦାନଙ୍କ୍‌ ଇସମିନ୍ଦେଡ଼୍‌, ଇଦ୍ ଗାଟି କଷ୍ଟତେ ବିଷୟ୍‌ । 14 ପଡ଼୍‌ଦ୍‌ ମଦଲ୍ ମାଡ଼୍‌ତେ ସାରେ ପାଡ଼୍‌ୟି ନାନ୍‌ ଲେକେତ୍‌ ଉଡ଼ିମିନ୍ଦେନ୍‌; ମେଣ୍ଡେ ଉଡ଼େ, ସାରେ ବେକାର୍‌, ଗାଲ୍‌ଦିଙ୍କ୍‌ ତଲି ପୟିତାନାଦ୍‌ ବେକାର୍‌। 15 ବାତେ ୱାଙ୍ଗ୍‌ତେ, ଆଦ୍‌ ତିନାଙ୍କ୍‌ ମାଡ଼ାଙ୍କ୍‌ ଆୟ, ବାତେ ଅବାବ, ଆଦ୍‌ ଲେକାଙ୍କ୍‌ ଆୟ । 16 ନାନ୍‌ ନିଜର ହୃଦୟତେ ଆଲ୍ସି କେତ୍‌ତାନ୍‌, "ଉଡ଼୍‌, ନା ମୁନେନ୍‌ ମାନ୍ଦାନ୍ ବେନ୍‌ ସାରେ ଯିରୁଶାଲମ୍‌ତାଗ୍‌ ମାତ୍‌ତଡ଼୍‌ ପେର୍‌କେ ନାନ୍‌ ନାର୍ଗେ ଜ୍ଞାନ ଦର୍‌କି ମିନ୍ଦେ; ମେଣ୍ଡେ, ନା ହୃଦୟତେ ଅଦିକ୍‌ ଜ୍ଞାନ ପାହେମ୍‌ ଆତ୍‌ତନ୍‌ ।" 17 ଆଦିଙ୍କ୍‌ ନାନ୍‌ ଜ୍ଞାନତେ ବିଷୟ୍‌, ମେଣ୍ଡେ ବାୟେ ନୁ ଅଜ୍ଞାନତାତେ ବିଷୟ ପୁନ୍ଦାନ୍ ମାଇଦିଙ୍କ୍‌ ଇଚ୍ଛା ମାଡ଼୍‌ତାନ୍‌; ଇଦେ ହିଁ ଗାଲଦେ ପେର୍କେ ମିରାନାଦ୍‌ ଇଞ୍ଜ ପୁତ୍‌ତାନ୍‌ । 18 ବାତେଙ୍କ୍‌ଇତ୍କେ ନାର୍ଗେ ଜ୍ଞାନତେ ନାର୍ଗେ କଷ୍ଟ ମାନ୍‌ତେ; ମେଣ୍ଡେ, ବେନ ଶିକ୍ଷା ନାର୍ଗେ ମାଡ଼ିତଣ୍ଡ୍‌, ଅଣ୍ଡ ଦୁଃକାମ୍‌ ନାର୍ଗେ ମାଡ଼ିତଣ୍ଡ୍‌ ।