Matyu 25

Jisas ye yoba kot ere tedre, i pere pere edenabuka pre dugwa

31 Ana Jisas yegl didre, ka ta ama yegl dugwa, Na Yoba Wam moglka i, abuglagena mina plau didre, angelonama bogl mudu akie umun, na abuglagena mina moglsre, sia king mina ame di moraglka. 32 Ame di moglbo, yoba yugobuno mudu meglkwa i, u na moraglmara makai sinaiglkwa. Makai sibi, sipsip sugl moglkwa yoba ta sipsip i pere edidre, meme i pere edumere yegl na yoba i pere pere edenaglka. 33 Yoba sipsip mere yegl ta moraiglkwa i, ogona wo kra adigl meglbi, te meme mere yegl ta moraiglkwa i, ogona koda kra adigl moraiglkwa. 34 Adigl meglbi, na king mogl, yoba na ogona wo kra adigl moraiglkwa i, yegl di tenaglka, Ene meglkwa i, na Nina ede di wakai yei tomiwa. Te, ye ene kingno morabara dumo i, ye dumo makan ere yeikrukwa igne, ene dumo i wakai kaima moraiglmedi padiglsre, ere wakai ere yogwa. Yegl pre ene ede suna u taragl wakai wakai inaiglmiwa. 35 I siragl pre na okna kidan goglko, ene kaya mokna narikwa. Te, na nigl goglko, ene nigl kogl narikwa. Na dumo ta nem moglko, ene na i yugugl edigwa. 36 Na kuguglna gaglna yeikruko, ene kugugl gagl narikwa. Kide na sugo, ene u na kanigwa. Te, na kane yugu paigo, ene na moglmara wimiwe di, yegl dinagle dugwa.

37 Ana na yegl dibo, yoba du moraiglkwa i, di ikne ede yegl dinaiglkwa, Yagl Kade yo, ene aunake kidan goglngo, no kandre, ene kaya mokna tomga pre dine? Te, aunake nigl goglngo, no kandre, nigl kogl tomne? 38 Ene aunake dumo ta nem moglsre, ungo, ene i yugugl edumne? Te, aunake ene kugugl gaglnen yeikruko, no kugugl gagl tomne? 39 Te, aunake kide ene sugwa mo ene kane yugu pai motngo, no u kamne? dinaiglkwa. 40 Yegl dibi, na king moraglka i, yegl dinaglka, Na ene kaima di teiga, na agrama meglmara suna i, ene yoba swara ta, yoba kade mo yoba yoko kaima ta moglkwa i pra, ake ple di teigwa igne, ene na ake ple di narimiwe di, yegl dinaglka.

41 Te, yoba ta ogona koda kra moraiglkwa i, na yegl di tenaglka, Ene meglkwa i, God ene di kide yei togwa. Yegl pre ene na moglmara kide kodo, doga aimadi domara pio! God ye doga aimadi dogwa ere yogwa i, ye Satan ya murubuglo kide duglo beglkwa i, denaiglmedi ere yogwa. 42 I siragl pre na kidan goglko, ene kaya mokna narekre, te, na nigl goglko, ene nigl kogl narekrikwa. 43 Na dumo ta nem moglsre, wigo, ene na i yugugl edekrikwa. Na kuguglna gaglna yeikruko, ene kugugl gagl narekrikwa. Te, kide na sugwa igne ya kane paiga igne, ene u na ta kankrimiwe dinaluwe dugwa.

44 Ana na yegl dibo, yoba i di ikne ede yegl dinaiglkwa, Yagl Kade yo, Ene aunake kidan goglsre, nigl goglsre, etngo, no kandre, ene ake ple di tekrumne? Ene aunake dumo ta nem moglsre, unga mo kuglnen gaglnen yeikrukwa mo kide ene sugwa mo ene kane yugu pango, no kandre, ene ake ple di tekrumne? dinaiglkwa. 45 Yegl dibi, na di ikne ede, yegl dinaglka, Na ene kaima di teiga, na yobana swara ta yoba yoko kaima ta morabuka i, ene ake ple di tekrikwa igne, ene na ake ple di narekrimiwe di, yegl dinaglka.

46 Yegl dibo, yoba i na moglmara kide kodo, ye yubun aimadi inaiglmara enaiglkwa ba yoba du meglkwa i, ye aimadi kamin kor moraiglmara enaiglmiwe di, Jisas yegl dugwa.