Mateus 8

Murubuglo kide tau yagl suo miurara suna meglko, Jisas di meda edugwa

28 Ana Jisas ye duglo beglkwa yagl bogl nigl koglo ibo Gadara yoba meglmara eigwa. Eigo, yagl suo ta gigl pene yomara pai mogl, u Jisas tegigl yeigwa. Te, yagl suo i murubuglo kide ye miurara suna meglkwa. Yagl suo i, ye yoba ege ege ere sibrika pre yoba ta pai miurara magigl i ta pikrikwa. 29 Ana yagl suo i udre, ka podo yegl dibrika, Ene God Wam motnga i, ene siragl ere noragledi une? No giugl prabuglka egemo ta yeikrukwa ba ene magigl unga i, no tabre giugl noragledi uno? dibrika.

30 Ana ye tegigl yeimara prak iro bugla mere kide yumun ne wan meglkwa. 31 Ne meglko, murubuglo kide kamage yei, Jisas yegl di prikwa, Ene no di meda edenagledi pitn, no bugla meglmara suna iro no dedo, di yegl digwa. 32 Yegl digo, Jisas Ede pio dugo, murubuglo kide i, ye yagl suo miurara kide kodo, ede pi bugla mere kide meglmara suna eigo, bugla mudu i, guglo ta yomara muku di ede atne pi, nigl nubun suna pidre, nigl ne geglkwa.

33 Ana yoba bugla sugl meglkwa i, muku di ede pi taun suna pidre, yagl suo murubuglo kide miurara meglkwa ikra ye mina siragl taragl plau dugwa ya te siragl mudu kanigwa i, boglo kugl teigwa. 34 Yegl di teigo, yoba taun suna meglkwa i, mudu ede pi Jisas kanamnedi eigwa. Ye Jisas kandre, Jisas dumono kide kodo, ede bage ta enabedi kamage yeigwa.