Mateus 8

Rom ami bitno yagl ta niglmo kogonmo yoba kide sugo, Jisas ye ere wakai ere togwa

5 Ana ege swara ta Jisas ede dumo Kaperneam ogo, yagl ta Rom soldia 100 mere bitno moglkwa i, ye moglmara udre, kamage yei, 6 yegl dugwa, Yagl Kade yo, na niglna kogona yagl ta kide podo sugo, bogl mina pai moglmiwa. Ye ogo kagle mawa sugo, giugl podo pre moglmiwe dugwa. 7 Yegl dugo, Jisas di ikne ede, yegl dugwa, Na pidre, ye ere wakai ere tenaluwe dugwa. 8 Ana Jisas yegl dugo, soldia bitno yagl i, di ikne ede yegl dugwa, Yagl Kade yo, ede yugugl unatnga i, ere enaba! Na yagl wakai ta moglbo, ene na kipaimara ede yugugl unatnga i, kuno ta erekrumiwa. Yegl pre ene yugugl ukre, ka keme din, na niglna kogona yagl i, aragan erabedi priwa. 9 I siragl pre na moglka i, yoba ta na bitna moglko, te, na soldia tau mere ama bitno moliwa. Na soldia ta di tedre, Ede po! digo, ye ede ogo, te ta Ede wo! digo, ye ama ede umiwa. Te, na niglna kogona yoba ta Kogon yegl ero! diga i, ye erukwa. Yegl pre ene ka keme din, niglna kogona aragan erabedi prie dugwa. 10 Ana yagl i yegl dugo, Jisas nagie koglsre, yoba ye duglo bogl wigwa i, yegl di togwa, Na ene kaima di teiga, yagl i pre meduglmere yegl Israel yoba swarano yegl ta pre mediglkrime dugwa.

11 Na ene di teiga, Yoba tau mere ade umara ya ade beimara mogl udre, Abraham ya Aisak ya Jekop bogl akie God yoba kingno morabara kaya mokna nenamnedi ame dinaiglkwa. 12 Ame dinaiglkwa ba ene tau Juda yoba God agai dumomo inaiglkwa kuno erukwa meglkwa i, igne i suna ta moglkraiglkwa. Moglkribi, God ene si meda ede, mim erumara edenabuka. Edinan, dumo i, kai podo ere, signo gikr eraiglmiwe dugwa.

13 Ana Jisas ka yegl di kodidre, soldia bitno yagl i yegl di togwa, Ene ede po. Ene pre medigl dinere mere plau dinabiwe dugwa. Ka yegl dugo, ege swara i mina niglmo kogonmo yagl i, aragan erukwa.