ନିହିଁ 2

ନିହିଁମିୟ ଜିରୁସାଲମତା ପାଣ୍ତ୍‌ୱି ଆ଼ନାୟି

1 ଅର୍ତକ୍ୟସ୍ତ ରାଜା ସା଼ଲୱି କିହିମାନି କଡ଼େ ବାର୍ସାତି ନିସନ୍*2:1 ନିସନ୍ ଏବ୍ରିୟ ଲ଼କୁତି ଲେକା ତଲେ ବାର୍ସାତି ମୂଲୁ ଲେ଼ଞ୍ଜୁ; ହୀରେୟି/ବେ଼ସେକି ଲେ଼ଞ୍ଜୁ ଇଲେ ଆ଼ତେ, ରାଜା ନ଼କିତା ଅଙ୍ଗୁରି ରାସା ମାନି ବେ଼ଲାତା ନା଼ନୁ ଅ଼ଡ଼େ ଅଙ୍ଗୁରି ରାସା ଅ଼ହାଁ ରାଜାକି ହୀତେଏଁ। ଈଦାଣି ନ଼କେଏ ଏଚେଲା ରାଜା ନ଼କିତା ଦୁକୁ ଆ଼ହାହିଲାଆତେଏଁ। 2 ଏଚେଟିଏ ରାଜା ନାଙ୍ଗେ ୱେଞ୍ଜାତେସି, "ନୀନୁ ନ଼ମେରି ଆ଼ହା ହିଲଅତି, ଏ଼ନାଆଁତାକି ନୀ ମୂମ୍ବୁ ହାପ୍‌ଲି ଆ଼ହାମାନେ ? ଈଦି ମ଼ନତି ଦୁକୁ ପିସ୍‌ପେ ଏ଼ନାୟି ଆ଼ଏ।" ଏଚେଟିଏ ନା଼ନୁ ହା଼ରେକା ଆଜିତେଏଁ।

3 ଇଞ୍ଜାଁ ନା଼ନୁ ରାଜାଇଁ ଏଲେଇଚେଏଁ, "ରାଜା କା଼ଲେଏ ନୀଡା ମାନାପେସି; ଏମିନି ଗା଼ଡ଼ା ମା଼ ଆକୁ ଆ଼ବାୟାଁ ମାହ୍‌ଣିମାଣ୍ତା, ଏ଼ଦି ଏଚେ଼ତା ରିହା ହାଜାମାନେ ଅ଼ଡ଼େ ଏମ୍ବାତି ଦା଼ରାୟାଁ ହିଚୁତା ୱେହାମାନୁ ଏଚିବେ଼ଲା ଏ଼ନିକିଁ ନା଼ ମୂମ୍ବୁ ହାପ୍‌ଲି ଆ଼ଏ ?"

4 ଏଚେଟିଏ ରାଜା ନାଙ୍ଗେ ଏଲେଇଞ୍ଜାତେସି, "ଆତିହିଁ ନୀନୁ ଏ଼ନାଆଁ ବାତିମା଼ଲି ମାଞ୍ଜାଦି ?" ଏଚେଟିଏ ନା଼ନୁ ଲାକପୂରୁତି ମାହାପୂରୁ ତା଼ଣା ପ୍ରା଼ତାନା କିତେଏଁ। 5 ଇଞ୍ଜାଁ ନା଼ନୁ ରାଜାଇଁ ଏଲେଇଚେଏଁ, "ଏଚେ଼ତା ରାଜାତି ମ଼ନ ଆ଼ନେ ଅ଼ଡ଼େ ନୀ ହ଼ଲେଏସି ନୀ ନ଼କିତା କାର୍ମା ବେଟାଆ଼ନେସି, ଆତିହିଁ ଜୀହୁଦା ଦେ଼ସାତା ନା଼ ତାଞ୍ଜିୟାଁ ମାହ୍‌ଣିମାଣ୍ତା ଗା଼ଡ଼ାତା ନାଙ୍ଗେ ପାଣ୍ତାଲି ହୁକୁମି ହିୟାମୁ, ଏଚେଟିଏ ନା଼ନୁ ଏ଼ଦାଆଁ ତିୟାରା କିଇଁ।"

6 ଏଚେଟିଏ ରାଜା ନାଙ୍ଗେ ୱେଞ୍ଜାତେସି, ଏଚିବେ଼ଲା ରା଼ଣି ତାନି ଦାରିତା କୁଗାମାଚେ, "ନୀ ହାନାୟି ଏଚର ଦିନା ଆ଼ନେ ? ଅ଼ଡ଼େ ନୀନୁ ଏଚେଲା ୱେଣ୍ତା ୱା଼ଦି ?" ଇଲେକିହିଁ ନା଼ନୁ ଏ଼ୱାଣି ନ଼କିତା ବେ଼ଲା ତୀରି କିହାଲିଏ ରାଜା ନାଙ୍ଗେ ପାଣ୍ତାଲି ମ଼ନ କିତେସି।

7 ଅ଼ଡ଼େ ନା଼ନୁ ରାଜାଇଁ ଏଲେଇଚେଏଁ, "ରାଜାତି ମ଼ନ ଆ଼ତିହିଁ, ପରାତ୍‌ କାଡା ଆତାଲା ୱାକିତି ଦେ଼ସା ସା଼ଲୱି କିନାରି ଏ଼ନିକିଁ ଜୀହୁଦା ଦେ଼ସାତା ଏନି ପାତେକା ହାଜାଲି ତାକି ନାଙ୍ଗେ ପିସ୍ତାନେରି ଏ଼ଦାଆଁତାକି ଏ଼ୱାରି ତାକି ନାଙ୍ଗେ ଆ଼କୁ ହୀପ୍‌କି ଆ଼ପେ। 8 ଅ଼ଡ଼େ ମାହାପୂରୁ ଇଲୁ କ଼ଟାତି ଦୁୱେରି ଅ଼ଡ଼େ ଗା଼ଡ଼ାତି କ଼ଟା ଇଞ୍ଜାଁ ନା଼ ହ଼ଡା ଡ଼ୟିନି ଇଲୁତାକି ନାଙ୍ଗେ ମା଼ର୍‌କା ହୀହାଲି ରାଜାତି ଜା଼ଡ଼ା କା଼ଃନି ଆସପ ତା଼ଣା ର଼ ଆ଼କୁ ହୀପ୍‌କି ଆ଼ପେ।" ଏଚେଟିଏ ନାଙ୍ଗେ ତାକି ନା଼ ମାହାପୂରୁ କାର୍ମା ମେହ୍‌ନି କେୟୁତି ସା଼ୟେମି ତଲେ ରାଜା ଏ଼ ବାରେ ନାଙ୍ଗେ ହିୟାତେସି।

ଜିରୁସାଲମ କ଼ଟା ସିନିକିନାୟି

9 ଏଚେଟିଏ ନା଼ନୁ କାଡା ଆତାଲା ୱାକିତି ଦେ଼ସା ସା଼ଲୱି କିନାରି ତା଼ଣା ହାଜାହାଁ ଏ଼ୱାରାକି ରାଜାତି ଆ଼କୁ ହୀତେଏଁ, ଅ଼ଡ଼େ ରାଜା ନା଼ ତଲେ ରିଜାରି କ଼ସ୍‌କାତି କାଜାଣାଇଁ ଅ଼ଡ଼େ ଗ଼ଡ଼ାୟାଁ ଗାଟାରାଇଁ ପାଣ୍ତାମାଚେସି। 10 ସାମା ଇସ୍ରାୟେଲ ମୀର୍‌କାଣି ନେହେଁ କିହାଲି ରଅସି ୱା଼ହାମାନେସି ଇଞ୍ଜିଁ ୱେଞ୍ଜାହାଁ ହରଣତି ସନ୍‌ବଲଟ ଅ଼ଡ଼େ ଅମନିୟ ହ଼ଲେଏସି ଟବିୟ ଈ ରିଆରାକି ହା଼ରେକା ଲାଗେଏ ହ଼ତେ।

11 ଇଲେକିଁ ନା଼ନୁ ଜିରୁସାଲମତା ଏଜାହାଁ ଏମ୍ବାଆଁ ତୀନି ଦିନା ଡ଼ୟିତେଏଁ। 12 ଏଚେଟିଏ ଲା଼ଆଁୟାଁ ନା଼ନୁ ଅ଼ଡ଼େ ନା଼ ତଲେ ଏଚେକା ଲ଼କୁ ନିଙ୍ଗିତମି; ଇଞ୍ଜାଁ ନା଼ ମାହାପୂରୁ ଜିରୁସାଲମ ତାକି ଏ଼ନାଆଁ କିହାଲି ନା଼ ମ଼ନତା ହୀହାମାଞ୍ଜାତେସି, ଏ଼ଦାଆଁ ନା଼ନୁ ଆମ୍ବାଆରାଇଁ ୱେହ୍‌ଆତେଏଁ; ଅ଼ଡ଼େ ନା଼ନୁ ଆମିନି ଜ଼ନ୍ତ ଲାକ ହ଼ଚାମାଚେଏଁ ଏ଼ଦାନି ପିସ୍‌ପେ ଅ଼ଡ଼େ ଏ଼ନି ଜ଼ନ୍ତ ନା଼ ତଲେ ହିଲାଆତେ। 13 ଇଞ୍ଜାଁ ନା଼ନୁ ଲା଼ଆଁୟାଁ ହ଼ଚାହାଁ ହ଼ର୍‌କା ୱାକିଟି ହାଜାହାଁ ନା଼ଗା କୁହି ଅ଼ଡ଼େ ଗାତା ଦୁୱେରି ପାତେକା ହାଚେଏଁ ଇଞ୍ଜାଁ ଜିରୁସାଲମତି ଡୀହାମାନି କ଼ଟା ଅ଼ଡ଼େ ଏମ୍ବାତି ହିଚୁ ତଲେ ୱେହାମାନି ଦୁୱେରିକା ବାରେ ସିନିକିତେଏଁ। 14 ଏଚେଟିଏ ନା଼ନୁ ଜାର୍‌ଣା ଦୁୱେରି ଅ଼ଡ଼େ ରାଜା ବାନ୍ଦା ପାତେକା ହାଚେଏଁ; ସାମା ଏମ୍ବାଆଁ ନା଼ ହ଼ଚାମାନି ଜ଼ନ୍ତ ହାଜାଲି ଟା଼ୟୁ ହିଲାଆତେ। 15 ଏଚେଟିଏ ନା଼ନୁ ଲା଼ଆଁୟାଁ ବେ଼ଲା କାଡା ଦାରିଟି ଲାକୱାକି ହାଜାହାଁ କ଼ଟା ସିନିକିତେଏଁ; ଏଚେଟିଏ ନା଼ନୁ ତିର୍‌ୱାହାଁ ହ଼ରୁ ବାଟା ଜିରୁ ହୀହାଁ ୱେଣ୍ତା ୱା଼ତେଏଁ।

16 ସାମା ନା଼ନୁ ଏମ୍ବିୟା ହାଚେଏଁ, ଏ଼ନାଆଁ କିତେଏଁ, ଈଦାଆଁ ଏମ୍ବାତି କାଜାରି ପୁନାଆତେରି; ଏଚିବେ଼ଲା ପାତେକା ନା଼ନୁ ଜୀହୁଦି ଲ଼କୁତି ପୂଜେରାଙ୍ଗାଣି କି ଇଚାରାଇଁ କି କାଜାରାଇଁ କି ଏଟ୍‌କା କାମା କିନାରାଇଁ ଏ଼ଦାଆଁ ୱେସା ହିଲାଆତେଏଁ। 17 ଏଚେଟିଏ ନା଼ନୁ ଏ଼ୱାରାଇଁ ଏଲେଇଚେଏଁ, "ମା଼ର ଏ଼ନିକିଁ ଲାଗେଏ ତଲେ ମାଞ୍ଜାମାନାୟି, ଜିରୁସାଲମ ଏ଼ନିକିଁ ରିହା ହାଜାମାନେ ଅ଼ଡ଼େ ଏମ୍ବାତି ଦୁୱେରିକା ବାରେ ହିଚୁତଲେ ୱେହାମାନୁ, ଈଦାଆଁ ମୀରୁ ମେସିମାଞ୍ଜେରି; ୱା଼ଦୁ ମା଼ର ଏ଼ନିକିଁ ନିନ୍ଦା ବେଟାଆ଼ଆୟି ଏ଼ଦାଆଁତାକି ଜିରୁସାଲମତି କ଼ଟା ତିୟାରା କିନ।" 18 ଏଚେଟିଏ ନାଙ୍ଗେ ତାକି ମାହାପୂରୁତି କାର୍ମା ମେହ୍‌ନି କେୟୁ ଅ଼ଡ଼େ ନାଙ୍ଗେ ତାକି ରାଜା ୱେସାମାନି କାତା ଏ଼ୱାରାଇଁ ୱେସ୍ତେଏଁ। ଏଚେଟିଏ ଏ଼ୱାରି ଏଲେଇଚେରି, "ୱା଼ଦୁ ମା଼ର ନିଙ୍ଗାହାଁ ତିୟାରା କିନ।" ଇଲେକିହିଁ ଏ଼ୱାରି ଏ଼ ନେହିଁ କାମା ତାକି ତାମି କେୟୁ ବା଼ଡ଼୍‌ୟୁ କିତେରି।

19 ସାମା ହରଣତି ସନ୍‌ବଲଟ ଅ଼ଡ଼େ ଅମନିୟ ହ଼ଲେଏସି ଟବିୟ ଅ଼ଡ଼େ ଆରବତି ଗେସମ୍‌ ଈ କାତା ୱେଞ୍ଜାହାଁ ମାଙ୍ଗେ ଲାଜା କିହାଁ ଏଲେଇଚେରି, "ମୀରୁ ଏ଼ନି କାମା କିହିମାଞ୍ଜେରି ? ମୀରୁ ଏ଼ନାଆଁ ରାଜା କ଼ପାଟି ନିଙ୍ଗିଦେରି ?"

20 ଏଚେଟିଏ ନା଼ନୁ ଏ଼ୱାରାଇଁ ଏଲେଇଚେଏଁ, "ଲାକପୂରୁତି ମାହାପୂରୁ ମା଼ କାମା ପୂରା କିନେସି; ମା଼ମ୍ବୁ ଏ଼ୱାଣି ହ଼ଲିୟାଙ୍ଗାତମି ଏ଼ଦାଆଁତାକି ନିଙ୍ଗାହାଁ ତିୟାରା କିନମି; ସାମା ଜିରୁସାଲମତା ମୀ ଏ଼ନି ବା଼ଗା କି ଅଦିକାରା କି ଅଣ୍‌ପିନି ସିନା ହିଲେଏ।"