1 ଏ଼ ଲେ଼ଞ୍ଜୁତି କଡ଼େ ସା଼ରି ଦିନାତା ଇସ୍ରାୟେଲ ଲ଼କୁ ରୁଣ୍ତା ଆ଼ହାଁ ଉପାସା କିହାଁ, ବାସ୍ତା ତୁର୍‌ହାଁ ଅ଼ଡ଼େ ଜାହାରା ଜାହାରା ତା଼ର୍ୟୁଁ ଲାକ ଦୂଡ଼ି ଡ଼ାଞ୍ଜା କଡିତେରି। 2 ଅ଼ଡ଼େ ଇସ୍ରାୟେଲ କୂଡ଼ା ବାରେ ଏଟ୍‌କା ଦେ଼ସାତାରି ତା଼ଣାଟି ଜାହାରାଇଁ ଏଟ୍‌କା କିତେରି, ଇଞ୍ଜାଁ ନିଚାହାଁ ଜାହାରା ଜାହାରା ପା଼ପୁ ଅ଼ଡ଼େ ଜାହାରା ଜାହାରା ଆକୁ ଆ଼ବାୟାଁତି ଦ଼ହ ୱେ଼କ୍‌ହେରି। 3 ଇଞ୍ଜାଁ ଏ଼ୱାରି ଦିନା ତୀନି ଗ଼ଣ୍ଟା ପାତେକା ଜାହାରା ଜାହାରା ଟା଼ୟୁତା ନିଚାହାଁ ପ୍ରବୁ ତାମି ମାହାପୂରୁତି ମେ଼ରା ପତି ପ଼ଡ଼ୱି ଆ଼ତେରି ଅ଼ଡ଼େ ଏଟ୍‌କା ତୀନି ଗ଼ଣ୍ଟା ପାତେକା ଏ଼ୱାରି ଜାହାରା ପା଼ପୁ ୱେ଼କ୍‌ହାନା ପ୍ରବୁ ମାହାପୂରୁଇଁ ଜହରା କିତେରି।

4 ଅ଼ଡ଼େ ଲେ଼ବିୟ ଲ଼କୁ, ଜେସୁୟ ଅ଼ଡ଼େ ବାନି, କଦ୍‌ମିୟେଲ, ସବନିୟ, ବୁନ୍‌ନି, ସେରେବିୟ, ବାନି ଅ଼ଡ଼େ କନାନି ପା଼ୱୁଜିକାଣା ନିଚାହାଁ ପ୍ରବୁ ମାହାପୂରୁଇଁ କାଜା ଗିୟାଁ ତଲେ ହା଼ଟିତେରି।

5 ଜେସୁୟ ଅ଼ଡ଼େ କଦ୍‌ମିୟେଲ, ବାନି, ହସ୍‌ବନିୟ, ସେରେବିୟ, ହଦିୟ, ସବନିୟ ଅ଼ଡ଼େ ପତାହିୟ ଇଞ୍ଜାଁ ଲେ଼ବିୟ ଲ଼କୁ ଏଲେଇଚେରି,

"ନିଙ୍ଗାଦୁ ମୀ ମାହାପୂରୁଇଁ ଜହରା କିଦୁ; ଇଞ୍ଜାଁ

ତଲି କା଼ଲାଟିଏ କା଼ଲାକା଼ଲାତି ପ୍ରବୁକି ବାରେ ଜହରା,

ଅ଼ଡ଼େ ରା଼ହାଁତା ପାଡାଆ଼ତି କାଜା ଗା଼ୱୁରମିତି ଦ଼ରୁ ଜହରା ଆ଼ପେ।"

6 ୱାର୍‌ଇ ନୀନୁଏ ପ୍ରବୁତି;

ନୀନୁ ଲାକପୂରୁ ଅ଼ଡ଼େ ଲାକପୂରୁତି ଲାକପୂରୁ ଅ଼ଡ଼େ ଏମ୍ବାତି ବାରେ ଆ଼ସ୍ତି,

ଦାର୍‌ତି ଅ଼ଡ଼େ ଏମ୍ବାତି ବାରେ ଆ଼ସ୍ତି, ସାମ୍‌ଦୁରି ଅ଼ଡ଼େ ଏମ୍ବାତି ଆ଼ସ୍ତି ବାରେ ତିୟାରା କିହାମାଞ୍ଜି ଅ଼ଡ଼େ ନୀନୁ ଏ଼ ବାରେ ତୀରି କିହାମାଞ୍ଜି,

ଅ଼ଡ଼େ ଲାକପୂରୁତି ବା଼ଡ଼୍‌ୟୁଗାଟି ଦୂତୁୟାଁ ନିଙ୍ଗେ ଜହରା କିୟାନେରି।

7 ନୀନୁଏ ପ୍ରବୁ ମାହାପୂରୁତି,

ନୀନୁ ଅବ୍ରାମଇଁ ହା଼ଟିତି

ଅ଼ଡ଼େ କଲ୍‌ଦିୟ ଲ଼କୁତି ଊର ଦେ଼ସାଟି ଏ଼ୱାଣାଇଁ ହ଼ପ୍‌ହା ତାଚାହାଁ ଅବ୍ରାହାମ ଦ଼ରୁ ହୀତି;

8 ନୀନୁ ନୀ ନ଼କିତା ଏ଼ୱାଣି ହିୟାଁତି ନାମୁ ମେସ୍ତି,

ଇଞ୍ଜାଁ କିଣାନ, ହୀତିୟ, ଇମରିୟ

ଅ଼ଡ଼େ ପରିସିୟ, ଜିବୁସିୟ, ଅ଼ଡ଼େ ଗିର୍ଗାସିୟ ଲ଼କୁତି ଦେ଼ସା ହୀହାଲି,

ଇଚିହିଁ ତାମି କୂଡ଼ା ତାକି ହୀହାଲି ଏ଼ୱାଣି ତଲେ ରା଼ଜିମା଼ନା କିତି,

ଇଞ୍ଜାଁ ନୀ ବ଼ଲୁତି ପୂରା କିହାମାଞ୍ଜି; ଇଚିହିଁ ନୀନୁ ଦାର୍ମୁଗାଟାତି।

9 ଏଚେଟିଏ ନୀନୁ ମିସର ଦେ଼ସାତା ମା଼ ଆକୁ ଆ଼ବାୟାଁ କସ୍ତତି ମେସ୍ତି,

ଅ଼ଡ଼େ ସୁପ କାଡା ଦାରିତା ଏ଼ୱାରି ଡ଼ୀକି ୱେଚି;

10 ଇଞ୍ଜାଁ ପା଼ର ଅ଼ଡ଼େ ତାନି ବାରେ ହ଼ଲିୟାଙ୍ଗା ଅ଼ଡ଼େ ତାନି ଦେ଼ସାତି ବାରେ ଲ଼କୁକି ହା଼ରେକା ସିନା ଅ଼ଡ଼େ କାବାଆ଼ନି କାମା ତ଼ସ୍ତି;

ଇଚିହିଁ ମିସରତି ଲ଼କୁ ଏ଼ୱାରି କ଼ପାଟି ବଡପଣ କିତାଣି ନୀନୁ ପୁଚି;

ଏ଼ଦାଆଁତାକି ନୀନୁ ନୀଞ୍ଜୁ ପାତେକା ନୀ ଦ଼ରୁ ୱେ଼ଙ୍ଗି କିହାମାଞ୍ଜି।

11 ଇଞ୍ଜାଁ ନୀନୁ ଏ଼ୱାରି ନ଼କିତା ସାମ୍‌ଦୁରି ବା଼ଗା କିତି,

ଏଚେଟିଏ ଏ଼ୱାରି ୱା଼ୟିତି ବୂମିତା ହାନିଲେହେଁ ସାମ୍‌ଦୁରି ବିତ୍ରା ତା଼କିତେରି;

ସାମା କୂଡ଼୍‌ହି ଏ଼ୟୁତା ୱାଲି ସମାନା ନୀନୁ ଏ଼ୱାରି ଜେ଼ଚ ପେ଼ର୍‌ହିମାନି ଲ଼କୁଣି କୂଡ଼୍‌ହି ସାମ୍‌ଦୁରିତା ମେତ୍‌ହି।

12 ଅ଼ଡ଼େ ନୀନୁ ମାଦେନା ହା଼ଗୁ ମୁଣ୍ତା ତଲେ

ଅ଼ଡ଼େ ଲା଼ଆଁୟାଁ ଏ଼ୱାରି ତା଼କିନି ଜିରୁତା ଉଜେଡ଼ି ହୀହାଲି ତାକି ହିଚୁ ମୁଣ୍ତା ତଲେ ଏ଼ୱାରାଇଁ ତା଼କିକିତି।

13 ଅ଼ଡ଼େ ନୀନୁ ସିନୟ ହ଼ରୁତା ରେ଼ଚା ୱା଼ହାଁ ଲାକପୂରୁଟି ଏ଼ୱାରି ତଲେ ହା଼ଡା କାତା ଆ଼ତି,

ଅ଼ଡ଼େ ଏ଼ୱାରାଇଁ ନେହିଁ ସା଼ଲୱି କିନାଣି ଅ଼ଡ଼େ ସାତା ମେ଼ରା,

ନେହିଁ ପା଼ଣାପା଼ଟୁ ଅ଼ଡ଼େ ହୁକୁମି ହୀତି;

14 ଅ଼ଡ଼େ ଏ଼ୱାରାଇଁ ତାମି ସୁଦୁ ଜ଼ମିନି ଦିନା ପୁଣ୍‌ମ୍ବି କିତି,

ଅ଼ଡ଼େ ନୀ ହ଼ଲେଏତି ମ଼ସାତି କେୟୁତା ଏ଼ୱାରାକି ହୁକୁମି, ରା଼ଜିମା଼ନା ଅ଼ଡ଼େ ମେ଼ରା ହୀତି;

15 ଇଞ୍ଜାଁ ଏ଼ୱାରି ହାକି ପାଣ୍ତାଲି ଲାକପୂରୁଟି କା଼ଦି ହୀତି,

ଅ଼ଡ଼େ ଏ଼ୱାରି ଏ଼ସ୍‌କି ପାଣ୍ତାଲି ତାକି ପା଼କାଟି ଏ଼ୟୁ ହ଼ପ୍‌ହେସି,

ଅ଼ଡ଼େ ନୀନୁ ଏ଼ୱାରାକି ଏମିନି ଦେ଼ସା ହୀହାଲିତାକି କେୟୁ ପେର୍‌ହାମାଚି,

ଏ଼ ଦେ଼ସା ଅଦିକାରା କିହାଁ ଏ଼ ଦେ଼ସାତା ହ଼ଡାଲି ହୁକୁମି ହୀତି।

16 ସାମା ଏ଼ୱାରି ଅ଼ଡ଼େ ମା଼ ଆକୁ ଆ଼ବାୟାଁ ବଡପଣ କିତେରି,

ଅ଼ଡ଼େ ଜାହା ଜାହାରା ହିୟାଁ ଆ଼ଟ୍‌ୱା କିତେରି

ଅ଼ଡ଼େ ନୀ ହୁକୁମିତି କିର୍ୟୁଁ ଅଡାଆତେରି,

17 ଏ଼ୱାରି ମା଼ନୱି ଆ଼ହାଲି କୂତେରି,

ଇଞ୍ଜାଁ ନୀନୁ ଏ଼ୱାରି ବିତ୍ରା ଏମିନି କାବାଆ଼ନି କାମା କିହାମାଚି, ଏ଼ଦାଆଁ ଅଣ୍‌ପୁତା ଇଟାଆତେରି;

ସାମା ଜାହା ଜାହାରା ମ଼ନ ଆ଼ଟ୍‌ୱା କିତେରି

ଅ଼ଡ଼େ ହ଼ଲିୟାଙ୍ଗା ଆ଼ହାଲି ୱେଣ୍ତା ହାଜାଲି ତାକି ଗଡ଼୍‌ହା ଲେହେଁ ରଅଣାଇଁ କାଜାସି କିତେରି;

ଆ଼ତିଜିକେଏ ନୀନୁ କେମା କିହାଲି ଅଣ୍‌ପାମାନି,

କାର୍ମା ମେହ୍‌ନାତି ଅ଼ଡ଼େ ଜୀୱୁ ନ଼ନାତି, ଦୀରେ କାର୍‌ବି ଆ଼ନାତି

ଅ଼ଡ଼େ ହା଼ରେକା କାର୍ମା ମେହ୍‌ନି ମାହାପୂରୁତି, ଏ଼ଦାଆଁତାକି ଏ଼ୱାରାଇଁ ପିହ୍‌ଆତି।

18 ଏ଼ୱାରି ଗାରାତଲେ ର଼ କ଼ଡି ଡା଼ଲୁ ତିୟାରା କିହାଁ ଏଲେଇଚେରି,

"ଏମିନି ପେ଼ନୁ ମିଙ୍ଗେ ମିସର ଦେ଼ସାଟି ହ଼ପ୍‌ହା ତାତାତେ, ଏ଼ଦି ଈଦି।"

ଏଲେଇଞ୍ଜିହିଁ ପ୍ରବୁଇଁ ହା଼ରେକା ହୀଣି କିତେରି;

19 ଏଚିବେ଼ଲା ନୀନୁ ନୀ ହା଼ରେକା କାର୍ମାଟି ଏ଼ୱାରାଇଁ ବାଟାତା ପିହ୍‌ଆତି;

ଜିରୁ ତ଼ସାଲି ତାକି ମାଦେନା ହା଼ଗୁ ମୁଣ୍ତା ଇଞ୍ଜାଁ

ଏ଼ୱାରାଇଁ ଉଜେଡ଼ି ଅ଼ଡ଼େ ତା଼କିନି ଜିରୁ ତ଼ସାଲି ତାକି ଲା଼ଆଁୟାଁ ହିଚୁ ମୁଣ୍ତା ଏ଼ୱାରି ନ଼କିଟି ହାଲାଆତେ।

20 ଅ଼ଡ଼େ ନୀନୁ ଏ଼ୱାରାଇଁ ଜା଼ପ୍‌ହାଲି ତାକି ନୀ ନେହିଁ ଜୀୱୁ ହୀତି, ଏ଼ୱାରି ଗୂତିଟି ମାନା ତିଞ୍ଜାଲି ଆଙ୍ଗାଆ଼ତି

ଅ଼ଡ଼େ ଏ଼ୱାରି ଏ଼ସ୍‌କି ପାଣ୍ତାଲି ତାକି ଏ଼ୱାରାକି ଏ଼ୟୁ ହୀତି।

21 ନୀନୁ ଦୁଇ କ଼ଡ଼ି ବାର୍ସା ପାତେକା ଏ଼ୱାରାଇଁ ବାଟାତା ପ଼ହି କିତି,

ଏ଼ୱାରାକି ଏ଼ନାୟି ଊଣା ଆ଼ଆତେ;

ଏ଼ୱାରି ବାସ୍ତେରି ଗେଞ୍ଜାଆତେ

ଅ଼ଡ଼େ ଏ଼ୱାରି ପାଃଆନାୟାଁ ପଙ୍ଗାଆତୁ।

22 ଅ଼ଡ଼େ ନୀନୁ ଏ଼ୱାରାଇଁ ହା଼ରେକା ରା଼ଜି ଅ଼ଡ଼େ କୂଡ଼ାଟି ଏ଼ୱାରି ବା଼ଗା ତଲେ ତୀରି କିତି;

ଏଚେଟିଏ ଏ଼ୱାରି ସିୟନ ଦେ଼ସା, ଇଚିହିଁ ହିସ୍‌ବନ ରାଜା ଦେ଼ସା

ଅ଼ଡ଼େ ବାସନତି ଅଗ୍‌ ରାଜା ଦେ଼ସା ଅଦିକାରା କିତେରି।

23 ଅ଼ଡ଼େ ନୀନୁ ଏ଼ୱାରି ମୀର୍‌କାଣି ହା଼ଗୁତି ହୁକାୟାଁ ସମାନା ହା଼ରେକା କିତି

ଅ଼ଡ଼େ ଏମିନି ଦେ଼ସା ଏ଼ୱାରି ଅଦିକାରା କିହାଲି ହାନେରି ଇଞ୍ଜିଁ ନୀନୁ ତାମି ଆକୁ ଆ଼ବାୟାଁଇଁ ୱେସାମାଚି,

ଏ଼ ଦେ଼ସାତା ଏ଼ୱାରାଇଁ ତାତି।

24 ଇଲେକିହିଁ ଏ଼ ମୀର୍‌କା ଦେ଼ସାତା ହାଜାହାଁ ଅଦିକାରା କିତେରି,

ଅ଼ଡ଼େ ନୀନୁ ଏ଼ୱାରି ନ଼କିତା ଏ଼ ଦେ଼ସାତା ମାଚି କିଣାନିୟ ଲ଼କୁଣି ହା଼ରୱି କିତି,

ଅ଼ଡ଼େ ଏ଼ୱାରି ଏ଼ନିକିଁ ତାମି ମ଼ନ ତଲେ ଲେ଼ମ୍ବିନେରି,

ଏ଼ଦାଆଁତାକି ଏ଼ୱାରାଇଁ ଅ଼ଡ଼େ ଏ଼ୱାରି ରାଜାୟାଁଇଁ ଅ଼ଡ଼େ ଦେ଼ସାତି ବାରେ କୂଲୁତି ଏ଼ୱାରି କେୟୁତା ହେର୍‌ପିତି।

25 ଏଚେଟିଏ ଏ଼ୱାରି କ଼ଟା ଗୂର୍‌ଚାମାନି ଗା଼ଡ଼ାୟାଁ ଅ଼ଡ଼େ ବୁର୍‌ବୁରା ବୂମି ଅ଼ତେରି,

ବାରେ କୂଡ଼ାତି ନେହିଁ ଆ଼ସ୍ତି ନେଞ୍ଜିତି ଇଲୁ,

କା଼ର୍‌ହି କୁହି, ଅଙ୍ଗୁରି ବା଼ଡ଼ା,

ଜୀତ ବା଼ଡ଼ା ଅ଼ଡ଼େ ହା଼ରେକା ପା଼ଡ଼େୟି ମା଼ର୍‌କା ଅଦିକାରା କିତେରି;

ଏଚେଟିଏ ଏ଼ୱାରି ତିଞ୍ଜାହାଁ ପାଞ୍ଜିତେରି ଅ଼ଡ଼େ ଆଙ୍ଗାତା ପାଡା ଆ଼ତେରି ଅ଼ଡ଼େ ନୀ ହା଼ରେକା କାର୍ମାତା ରା଼ହାଁ କିତେରି।

26 ଆ଼ତିଜିକେଏ ଏ଼ୱାରି କାତା ଊରିତେରି ଅ଼ଡ଼େ ନୀ କ଼ପାଟି ଲାଗେଏତି କାମା କିତେରି ଅ଼ଡ଼େ ନୀ ମେ଼ରାତି ତାମି ଡା଼ୟୁୱାକି କୁତିତେରି,

ଅ଼ଡ଼େ ଏମିନି ନୀ ନ଼କିତା ଆ଼ନି କାତା ୱେହ୍‌ନାରି ଏ଼ୱାରାଇଁ ନୀ ତା଼ଣା ୱେଣ୍ତେ ତାଚାଲି ଏ଼ୱାରାଇଁ ସେତ୍‌ନା ହୀତେରି,

ଏ଼ଦାଆଁତାକି ଏ଼ୱାରାଇଁ ପା଼ୟିତେରି ଅ଼ଡ଼େ ଲାଜାଗାଟି କାମା କିତେରି।

27 ଏ଼ଦାଆଁତାକି ନୀନୁ ଏ଼ୱାରାଇଁ ସାତ୍ରୁୟାଁ କେୟୁତା ହେର୍‌ପାଲିଏ,

ଏ଼ୱାରି ଏ଼ୱାରାଇଁ ସା଼ସ୍ତି ହୀତେରି;

ସାମା ସା଼ସ୍ତି ବେ଼ଲାତା ଏ଼ୱାରି ନୀ ତା଼ଣା ଡ଼ୀହାଲିଏ,

ନୀନୁ ଲାକପୂରୁଟି ଏ଼ଦାଆଁ ୱେଚି;

ଅ଼ଡ଼େ ନୀ ହା଼ରେକା କାର୍ମାଟି ଏ଼ୱାରାଇଁ ଏ଼ୱାରି ସାତ୍ରୁୟାଁ କେୟୁଟି ଏ଼ୱାରାଇଁ ଗେଲ୍‌ପିତି।

28 ସାମା ଏ଼ୱାରି ଗେଲ୍‌ପିଆ଼ତି ଡା଼ୟୁ ୱେଣ୍ତେ ନୀ ନ଼କିତା ଲାଗେଏତି କାମା କିତେରି;

ଏ଼ଦାଆଁତାକି ନୀନୁ ଏ଼ୱାରାଇଁ ସାତ୍ରୁୟାଁ କେୟୁତା ହେର୍‌ପିତି,

ଏ଼ୱାରି ଏ଼ୱାରାଇଁ ସା଼ଲୱି କିତେରି,

ଆ଼ତିଜିକେଏ ଏଚେ଼ତା ଏ଼ୱାରି ନୀ ନ଼କିତା ଡ଼ୀତେରି, ଏଚିବେ଼ଲା ନୀନୁ ଲାକପୂରୁଟି ଏ଼ଦାଆଁ ୱେଚି;

ଅ଼ଡ଼େ ହା଼ରେକା ପା଼ଲି ନୀନୁ ନୀ କାର୍ମାଟି ଏ଼ୱାରାଇଁ ଗେଲ୍‌ପିତି।

29 ଇଞ୍ଜାଁ ଏ଼ୱାରାଇଁ ୱେଣ୍ତେ ନୀ ମେ଼ରାତି ଜିରୁତା ତାଚାଲି ତାକି ଏ଼ୱାରାଇଁ ସେତ୍‌ନା ହୀତି;

ଆ଼ତିଜିକେଏ ଏ଼ୱାରି ବଡପଣ କିତେରି ଅ଼ଡ଼େ ନୀ ହୁକୁମିତା କିର୍ୟୁଁ ଅଡାଆତେରି,

ସାମା ଏ଼ନାଆଁ ମା଼ନୱି ଆ଼ତିସାରେ ମାଣ୍‌ସି ନୀଡିନେସି,

ନୀ ଏ଼ ସା଼ଲୱି କିନି କ଼ପାଟି ପା଼ପୁ କିତେରି,

ଇଞ୍ଜାଁ ମ଼ନ ହୀଆତେରି ଅ଼ଡ଼େ ଜାହା ଜାହାରା ମ଼ନ ଆ଼ଟ୍‌ୱା କିହାଁ ୱେଞ୍ଜାଲି କୂତେରି।

30 ଆ଼ତିଜିକେଏ ହା଼ରେକା ବାର୍ସା ପାତେକା ନୀନୁ ଏ଼ୱାରାଇଁ ଅ଼ର୍‌ହିତି

ଅ଼ଡ଼େ ନୀ ଜୀୱୁ ତଲେ ନୀ ନ଼କିତା ଆ଼ନି କାତା ୱେହ୍‌ନାରି ତା଼ଣାଟି ଏ଼ୱାରାଇଁ ସେତ୍‌ନା ହୀତି;

ସାମା ଏ଼ୱାରି କିର୍ୟୁଁ ଅଡାଲି କୂତେରି;

ଏ଼ଦାଆଁତାକି ନୀନୁ ଏ଼ୱାରାଇଁ ଏଟ୍‌କା ଦେ଼ସା ଲ଼କୁ କେୟୁତା ହେର୍‌ପିତି।

31 ଆ଼ତିଜିକେଏ ନୀନୁ ନୀ ହା଼ରେକା କାର୍ମାଟି ଏ଼ୱାରାଇଁ ନା଼ସା କିଆତି,

କି ଏ଼ୱାରାଇଁ ପିହ୍‌ଆତି;

ଇଚିହିଁ ନୀନୁ କାର୍ମା ମେହ୍‌ନି ମାହାପୂରୁତି।

32 ଏ଼ଦାଆଁତାକି ହେ଼ ମା଼ ମାହାପୂରୁ, କାଜାତି,

ବା଼ଡ଼୍‌ୟୁ ଗାଟାତି ଅ଼ଡ଼େ ଆଜିହ଼ପେତି ମାହାପୂରୁ,

ନୀନୁ ଆ଼ଞ୍ଜାମାନି ରା଼ଜିମା଼ନାତି ମା଼ନୱି ଆ଼ନାତି ଅ଼ଡ଼େ କାର୍ମା ମେହ୍‌ନାତି,

ଅସୁରିୟ ରାଜାୟାଁ ବେ଼ଲାଟିଏ ନୀଞ୍ଜୁ ପାତେକା ମା଼ ମୁହେଁ, ମା଼ ରାଜାୟାଁ ମୁହେଁ,

ମା଼ କାଜାରି ମୁହେଁ ଅ଼ଡ଼େ ମା଼ ପୂଜେରାଙ୍ଗା ମୁହେଁ ଅ଼ଡ଼େ ମା଼ ନ଼କିତା ଆ଼ନି କାତା ୱେହ୍‌ନାରି ମୁହେଁ

ଅ଼ଡ଼େ ମା଼ ତାଞ୍ଜିୟାଁ ମୁହେଁ ଅ଼ଡ଼େ ମୀ ବାରେ ଲ଼କୁତି ମୁହେଁ ଏ଼ନି ଏ଼ନି କସ୍ତ ଆ଼ହାମାନେ,

ଏ଼ ବାରେ ନୀ ନ଼କିତା ଊଣା ତ଼ଞ୍ଜା ଆ଼ଆପେ।

33 ଆ଼ତିଜିକେଏ ମାଙ୍ଗେ ତାକି ଏ଼ନା ଏ଼ନାୟି ଆ଼ହାମାନେ, ଏ଼ ବାରେତା଼ଣା ନୀନୁ ଦାର୍ମୁ ଗାଟାତି;

ଇଚିହିଁ ନୀନୁ ସାତା ଲେ଼ମ୍ବାମାଞ୍ଜି, ସାମା ମା଼ମ୍ବୁ ଲାଗେଏତି କାମା କିହାମାନମି।

34 ଇଞ୍ଜାଁ ମା଼ ରାଜାୟାଁ, ମା଼ କାଜାରି ମା଼ ପୂଜେରାଙ୍ଗା ଅ଼ଡ଼େ ମା଼ ତାଞ୍ଜିୟାଁ ନୀ ମେ଼ରା ମା଼ନୱି ଆ଼ହାହିଲଅରି,

ଅ଼ଡ଼େ ନୀନୁ ନୀ ଏମିନି ହୁକୁମି ଅ଼ଡ଼େ କାତା ତଲେ ଏ଼ୱାରାଇଁ ସେତ୍‌ନା ହୀତି, ଏମ୍ବାଆଁ କିର୍ୟୁଁ ଅଡାହିଲଅରି।

35 ଏ଼ୱାରି ତାମି ରା଼ଜିତା, ଏ଼ୱାରାକି ହୀହାମାନି ହା଼ରେକା କାର୍ମାତା

ଅ଼ଡ଼େ ଏ଼ୱାରି ନ଼କିତା ନୀ ହେର୍‌ପାମାନି ଅ଼ସାରା ଅ଼ଡ଼େ ବୁର୍‌ବୁରା ଦେ଼ସାତା ନୀ ସେ଼ବା କିହା ହିଲଅରି,

କି ତାମି ଲାଗେଏତି କାମାଟି ୱେଣ୍ତା ହିଲଅରି।

36 ମେହ୍‌ଦୁ ମା଼ମ୍ବୁ ନୀଞ୍ଜୁ ହ଼ଲିୟା ଆ଼ହାମାନମି! ଇଞ୍ଜାଁ ନୀନୁ ମା଼ ଆକୁ ଆ଼ବାୟାଁକି ଏମିନି ଦେ଼ସାତି ପା଼ଡ଼େୟି ଅ଼ଡ଼େ ନେହିଁ ଆ଼ସ୍ତି ଲେ଼ମ୍ବାଲି ହୀହାମାଚି,

ମେହ୍‌ମୁ ଏ଼ ଦେ଼ସାତା ମା଼ମ୍ବୁ ହ଼ଲିୟା ଆ଼ହାମାନମି।

37 ଅ଼ଡ଼େ ମା଼ ପା଼ପୁ ତାକି ନୀନୁ ଏମିନି ରାଜାୟାଁଇଁ ମା଼ ମୁହେଁ ତୀରି କିହାମାଞ୍ଜି,

ଏ଼ୱାରି ଏ଼ ଦେ଼ସାତି ହା଼ରେକା ପା଼ଡ଼େୟି କାମ୍ବି କିହାଁ ଲେ଼ମ୍ବିମାନେରି;

ଅ଼ଡ଼େ ଜିକେଏ ମା଼ ଆଙ୍ଗାତି ମୁହେଁ ଅ଼ଡ଼େ ମା଼ ଜ଼ନ୍ତ ମୁହେଁ ଏ଼ୱାରି ମ଼ନ ତଲେତି ଅଦିକାରା ମାନେ, ଅ଼ଡ଼େ ମା଼ମ୍ବୁ ହା଼ରେକା କସ୍ତ ତଲେ ମାନମି।

ଈ ବାରେ ଗଟୱି ଆ଼ତି ଜିକେଏ ମା଼ମ୍ବୁ ର଼ ମେ଼ରା କିହାଁ ରା଼ଚାମାନମି; ଅ଼ଡ଼େ ମା଼ କାଜାରି, ମା଼ ଲେ଼ବିୟ ଲ଼କୁ ଅ଼ଡ଼େ ମା଼ ପୂଜେରାଙ୍ଗା ଏ଼ଦାଆଁ ବୁଟୁମୁଦ୍ରା କିହାମାନେରି।