Atos 16

Ya pagkalabusu kan Pablo aw kan Silas adti Pilipos

16 Na, sambuk na allaw sa pagpasinan da nami adti pagpanawagtawagan na manga Judiyu, syumungun kanami ya sambuk na dalaga na allang na pigseledan na busaw. Aw awun katadeng nan mag-ubat-ubat sa unu ya un dumateng, aw magi sa katadeng nan yeiy, dakulaꞌ ya nyakuwalta na manga tagtun kanan. 17 Aw gayed sakanan dyumalug kanami si Pablo aw migtawag, law nan, "Ya manga utaw iyan sugu-anen saba na Tyumanem na To-o Matas! Aw silan ya mig-ubat-ubat kamayu sa pa-agi na makaluwaꞌ kamu!" 18 Aw seled na madég na allaw, walaꞌ ya katantanan nan gyumelgel sa maynan. Yanagaw pig-ilaban da si Pablo, aw pig-atubang nan ya ka͡ubayan yan aw piglongan nan ya busaw na syumeled, "Magi dun ni ngalan ni Jisu-Kristu, sugu-un ta kaw na luwaꞌ kaw lekat dun ni lawas nan!" Aw maksay lyumuwaꞌ ya busaw. 19 Manang pagka-edeꞌ da na manga tagtun na walaꞌ da ya un nilan imanen na makakuwalta, pigdakep nilan si Pablo aw si Silas aw piggakgak nilan adti palingki, kay dun ingkud ya manga migdumala sa syudad. 20 Aw pagdateng nilan adti asdangan na manga mag-usayay na manga Romanen, miglimanda ya manga tagtun sa dalaga, law nilan, "Ya manga eseg ini, utaw silan na Judiyu aw silan ya du-an na nyagubut ya syudad tadun, 21 aw ya manga palna-u nilan walaꞌ pag-unawa sa bala-ud tadun. Aw asuntu na Romanen kitadun, diliꞌ tadun madawat ya palna-u nilan aw diliꞌ tadun mabatug ya pagdalug sa kanilan katanem." 22 Madég ya manga utaw na migkatipun dun. Aw sa pagdengeg nilan sa limanda, alag silan nyadaman aw migdengan silan dyumulus kan Pablo aw manga eped nan. Aw sa pagkitaꞌ na manga mag-usayay sa kadaman na manga utaw, pigpakéséꞌ nilan ya kadégkadég ni Pablo aw ni Silas, aw migsuguꞌ na badasan silan na lalabet na ulisi. 23 Aw pagkatigkas nilan labeten, pigpakalabusu nilan. Aw pigsuguꞌ nilan ya magtatunggu-ay sa kalabusuwanan na dayaw nan tunggu-an na diliꞌ silan makapalaguy. 24 Pagdengeg nan sa suguꞌ na manga mag-usayay, pig-ated nan si Pablo aw si Silas adti tenga-tengaꞌ na kalabusuwanan, aw piglungug nan ya manga siki nilan adti tabla na piggawangan.

25 Na, pagkatenga-tengaꞌ da na gabi, gayed si Pablo aw si Silas nyanawagtawag aw migdalangan sa pagdeyen sa Tyumanem, aw migpakanyeg kanilan ya manga eped na nyakalabusu. 26 Aw tigkan awun mabagseg na linug aw nya-eyeng ya kalabusuwanan, aw kya-uwangan ya kadég na manga tatakep, aw nyangkakamang ya tabla na piglungugan sa manga siki nilan aw nyangka-ubad ya manga sangkaliꞌ na piggapus sa manga bekten na kadég na nyakalabusu dun. 27 Aw nyakapagmata ya magtatunggu-ay. Aw sa pagkitaꞌ nan na kya-uwangan ya kadég na tatakep na kalabusuwanan, iman nan aw nyakapalaguy da ya kadég na nyakalabusu. Yanagaw pigtagnus nan ya kanan kampilan kay un galu tumuyuꞌ. 28 Manang piglongan sakanan ni Pablo sa mabagseg na tingeg, "Diliꞌ kaw magtuyuꞌ! Kenneꞌ pa na kadég nami ini!" 29 Aw migpakamang ya magtatunggu-ay sa saleng aw nyaksay syumeled adti tambiꞌ na pigkalabusuwan kan Pablo aw kan Silas, aw nyangillupung adti asdangan nilan aw tyakigan kay to-o migteneb. 30 Pagkatigkas yan, pigpa-agad nan silan adti luwaꞌ aw law nan, "Kay Sir, unu ya ka-ilangan ku imo-un pada paluwa-en aku na Tyumanem?" 31 Aw tyumubag silan, "Pangintu-u kaw kan Jisus na yan ya Matas na Pangulu, aw makaluwaꞌ kaw, dala ya manga ka-epedanan mu adti balay." 32 Aw pig-ubat-ubatan nilan sakanan sa tingeg na Tyumanem dala ya kadég na nyeyaꞌ adti balay nan. 33 Aw yan na udas na gabi yan, piglinisan nan ya manga abed nilan. Aw pigba͡utismuwan ya magtatunggu-ay dala ya kadég na ka-epedanan nan. 34 Aw pigpapanik nan silan adti balay, aw pigsanggilaꞌ nan silan. Aw to-o migleya ya magtatunggu-ay aw ya kadég na ka-epedanan nan asuntu na alag da silan nyangintu-u sa Tyumanem.

35 Pagkamaselem da, migsuguꞌ ya manga mag-usayay na Romanen sa manga pulis adti magtatunggu-ay sa kalabusuwanan, aw law nilan, "Paluwa-a ya manga eseg awun!" 36 Yanagaw pig-ubat na magtatunggu-ay kan Pablo aw si Silas ya suguꞌ nilan, law nan, "Awun suguꞌ lekat adti manga mag-usayay na paluwa-en da kamu! Yanagaw luwaꞌ da kamu, aw madyaw galu ya pagpanaw mayu." 37 Manang miglong si Pablo adti manga pulis, "Pigpalabet pa kami nilan na ulisi adti asdangan na manga utaw pada mulamula͡en kami aw walaꞌ kami nilan una sadsadi, aw tigkas yan, pigkalabusu kami nilan pangkay Romanen kami. Aw adun da, kaliman nilan papanawun kami na tagu-taguꞌ. Bekeꞌ na maynan ya pa-agi! Pakadiya mayu baling silan. Kay silan da ya magpaluwaꞌ kanami!" 38 Yanagaw lyumikuꞌ ya manga pulis adti manga mag-usayay aw pig-ubat nilan ya piglong ni Pablo. Aw nyallek ya manga mag-usayay sa pigdengeg nilan na Romanen kadiꞌ silan, 39 aw nyadtu silan ni kalabusuwanan aw migsekat sa pasinsiya. Pagkatigkas yan, pigpa-agad nilan si Pablo aw si Silas adti luwaꞌ, aw nyanginayuꞌ na indegan nilan ya syudad. 40 Sa pagpakaluwaꞌ da nilan lekat adti kalabusuwanan, nyadtu silan adti balay ni Lidya. Aw migbalawbalaw silan ya manga mangintu-uway na migkatipun dun aw pigpakasalig ya kanilan pagpangintu-u, aw tigkas yan, pig-indegan ni Pablo aw ni Silas ya syudad yan.