1 Pagkatigkas ni Jisus magpalna-u adti manga utaw, nyadtu sakanan adti lunsud na Kapirna-um. 2 Na, dun ni Kapirna-um pag-eyaꞌ ya sambuk na kapitan sa manga sundalu aw awun kanan sugu-anen na to-o nan pigginawa͡an, manang kyedelan ya sugu-anen nan aw kamatayenen da. 3 Pagdengeg na kapitan sa manga pigpan-imoꞌ ni Jisus, pyakadtu nan ya manga magdadumala͡ay sa manga Judiyu na nyeyaꞌ dun ni lunsud, aw piglongan nan silan na manginayuꞌ kan Jisus na madtu ni balay pada guli-en ya sugu-anen nan. 4 Pagdateng nilan adti kan Jisus, nyanginayuꞌ silan to-o kanan, law nilan, "Ya utaw yeiy umbaꞌ mu sakanan tabangan, 5 kay pigginawa͡an nan ya kadég tadun na manga Judiyu aw migpatulluk sakanan kanaten sa sinagoga!"

6 Yanagaw nyagad si Jisus kanilan. Sa malapit da silan adti balay, pigsuguꞌ na kapitan ya manga ubaybay nan na sungunun nilan si Jisus aw paglongun sakanan, "Kay Sir, yeiy ya piglong kanmu na kapitan: ‘Diliꞌ da kaw maglos, kay diliꞌ aku saba makatumbuk magpapanik kanmu adti kanak balay. 7 Yeiy ya du-an na bekeꞌ ku ya nyangay kanmu. Manang pangkay oloꞌ da mu paglongun na kaguli-an sakanan, kaguli-an saba ya sugu-anen ku. 8 Kay sambuk aku uman na magka͡agad sa matas pa kanak ya katundanan, aw awun uman katundanan ku sa manga sundalu na madalem pa kanak. Kun sugu-un ku ya sambuk na "Kadtu kaw!" maksay sakanan madtu. Aw kun paglongun ku uman ya sambuk na "Kadi kaw!" madi sakanan. Aw pangkay unu ya suguꞌ ku sa kanak sugu-anen, ka͡agadan nan saba.’ " 9 Sa pagdengeg ni Jisus sa piglong na kapitan, nya-enneng-enneng sakanan, aw piglongan nan ya manga utaw na dyumalug kanan, "Paglongun ta kamu: Ya eseg ini pangkay Héntil sakanan, manang walaꞌ pa ku kita-a asini manga utaw na Isra-él ya maynini na pagpangintu-u." 10 Aw sa paglikuꞌ da na manga pigsuguꞌ na kapitan adti balay, kyinitaꞌ nilan na kyaguli-an da ya sugu-anen.

11 Na, walaꞌ kadugay, nyadtu si Jisus adti lunsud na pigngalanan na Na-in. Aw nyagad uman kanan ya manga umagakan nan aw ya madég to-o na manga utaw. 12 Sa malapit da silan dumateng adti suwangan na lunsud, awun kyinitaꞌ nilan na manga utaw na lyumuwaꞌ dun na migtingga sa lawas na nyatay kay un nilan lebeng. Aw ya nyatay, tamisa na iseꞌ na eseg na sambuk na ka͡ubayan na balu. Aw madég to-o ya nyagad sa balu. 13 Aw sa pagkitaꞌ ni Jisus sa balu, to-o sakanan nyallat. Aw piglongan nan, "Diliꞌ kaw magsugaw." 14 Aw pigpalapitan nan ya pigtingga͡an aw pig-awidan nan, aw tyumeneng ya manga migtingga. Aw piglongan ni Jisus ya nyatay, "Kay Toꞌ, pagbangun kaw!" 15 Aw migbangun ya nyatay aw miglong da, aw piglikuꞌ ni Jisus adti ina nan. 16 Aw to-o nyallek ya kadég na utaw sa pigkitaꞌ nilan. Aw pigdeyen nilan ya Tyumanem, law nilan, "Dyumateng da asini kanaten ya sambuk na propita na to-o matulus!" Aw miglong silan uman, "Pigtabangan da na Tyumanem ya manga utaw nan!" 17 Aw ya ubat-ubat sa pig-imoꞌ ni Jisus nyabekkal adti kadakulaꞌ na probinsiya na Judiya aw dun ni manga banwa na nyakapalibed.

18 Na, ya kadég yeiy na pigpan-imoꞌ ni Jisus, pig-ubat-ubat kan Juan na manga umagakan nan. 19 Yanagaw pigtawag ni Juan ya duwa ya umagakan nan, aw pigpakadtu nan silan adti kan Jisus* pada usipen kun sakanan ya pigpakang na Tyumanem asini muna aw kun awun pa tagadan nilan na eped. 20 Aw sa pagdateng nilan adti kan Jisus, miglong silan, "Pigsuguꞌ kami ni Juan na Magba͡utismuway pada musip kanmu kun ikaw ya pigpakang na Tyumanem asini muna na un madi aw kun awun pa eped na tagadan nami?" 21 Na, dun ni udas yan, pigpangguliꞌ ni Jisus ya madég na pyangkedelan aw manga utaw na syeledan na busaw aw madég uman na buta. 22 Yanagaw pigtubag ni Jisus ya manga pigsuguꞌ ni Juan, law nan, "Likuꞌ kamu adti kan Juan aw ubat-ubati mayu sakanan sa manga dyengeg mayu aw sa manga kyinitaꞌ mayu: Ya manga buta, kyumitaꞌ da. Ya manga pulid, nyakapanaw da. Ya manga ibungun, pyangkaguli-an aw malinis da. Ya manga bengel, dyumengeg da. Awun manga nyangkamatay na nyataw da. Ya manga tagituꞌ na utaw, kya-ubatan da sa Madyaw na Ubat-ubat.* 23 Aw madyaw ya kana manga utaw na walaꞌ pagduwaduwa na aku ya pigpadala na Tyumanem."

24 Sa pagpanaw da na manga pigsuguꞌ ni Juan, pigkasampetan ni Jisus si Juan adti manga utaw na migkatipun, law nan, "Sa pagkadtu mayu adti kan Juan dun ni kaligbinan idtu muna, unu kaꞌ ya punganan na utaw na kamayu pig-iman na kita-en? Pagaw nyadtu kamu na oloꞌ magtandawtandaw sa utaw na maksay magkadaladala na kasiling na tigbaw na pig-eyeng-eyeng na samet. Bekeꞌ saba na maynan si Juan! 25 Manang unu ya pigkadtu mayu adti kaligbinan na un mayu tanawun? Pagaw iman mayu aw kumitaꞌ kamu sa utaw na syumut sa kadégkadég na mayaman. Ya utaw na maynan, adtu saba sakanan pagkita-en ni palasyo. Manang bekeꞌ saba uman na maynan si Juan! 26 Yanagaw unu kaꞌ ya pig-iman mayu na un mayu kita-en dun ni kaligbinan? Pig-iman gya mayu na kumitaꞌ sa propita. Paglongun ta kamu na si Juan bekeꞌ oloꞌ na propita manang matas pa sakanan sa manga muna propita. 27 Kay si Juan yeiy, yan ya pigkasampetan dadan dun ni pigpasulat na Tyumanem asini muna: ‘Pa-una͡en ku kanmu ya kanak mag-ubat-ubatay pada tagilanen nan ya un mu agiyan.’* 28 Paglongun ta kamu: Ya kadég na utaw na nya͡utaw asini tas na lupaꞌ, walaꞌ ya pangkay sambuk na matas pa kan Juan na Magba͡utismuway. Manang ya to-o madalem na utaw na nyaka-akup adti Kasakupan na Pighari-an na Tyumanem, matas pa sakanan kan Juan."

29 Na, pagdengeg da na kadég na manga utaw sa piglong ni Jisus, tyumandeꞌ silan na matinaw saba ya pigpa-edeꞌ na Tyumanem magi kan Juan. Kay idtu muna sa pag-ubat-ubat pa ni Juan, migpaba͡utismu silan kanan, dala ya manga mangungubla͡ay sa buwis. 30 Manang awun madég na manga Parisiyo aw manga magpalna-uway sa Uldin na walaꞌ nilan daluga ya tud na Tyumanem kanilan kay walaꞌ silan pagpaba͡utismu kan Juan.

31 Migpadeleg si Jisus miglong, "Unu ya un ku kapa-unawa͡an sa manga utaw adun na gayed kyumele sa palna-u na dyengeg nilan? 32 Kasiling silan na mangayseꞌ na nyan-ingkud adti pamanag na palingki. Diliꞌ silan malim magad magdanga pangkay pigtatawag silan na kanilan manga eped na maglong: ‘Naten magdanga! Migpasonata kami sa pangkasal, manang walaꞌ kamu sayaw! Aw migpansimatay kami manang walaꞌ kamu pagsugaw.’ 33 Kamu uman na manga utaw, maynan saba kamu. Kay dyumateng si Juan aw malikit sakanan magpuwasa aw walaꞌ inem sa bino, aw miglong kamu, ‘Syeledan sakanan na busaw!’ 34 Tigkas yan, dyumateng aku na Iseꞌ na Utaw. Kyinitaꞌ mayu aku kyuman aw nyinem eped ku ya madég na manga utaw. Manang miglong kamu baling, ‘Tanawa mayu ya utaw yeiy! To-o sakanan kyuman aw nyinem sa bino, aw mig-ubaybay sakanan sa manga mangungubla͡ay sa buwis aw eped pa na makasasalaꞌ!’ 35 Pangkay maynan ya piglong mayu, manang ya palna-u ku aw palna-u ni Juan, alag saba pigmatinaw dun ni manga pigpan-imoꞌ na kadég na utaw na dyumalug sa palna-u nami."

36 Na, awun sambuk na Parisiyo na pigngalanan na si Simon, aw piglongan nan si Jisus na kuman adti tampid nan. Yanagaw nyadtu si Jisus adti balay ni Simon aw kyuman dun ni lamisa. 37 Na, dun uman ni lunsud yan, awun sambuk na ka͡ubayan na makasasalaꞌ. Pagdengeg nan na kyuman si Jisus adti balay na Parisiyo, nyadtu sakanan aw dyumala sa tagbiꞌ na sabuy na pig-imoꞌ lekat adti batu na alabastro aw awun seled na manimboꞌ. 38 Aw dyumulud apit adti bagakwang ni Jisus aw gayed migsugaw.* Aw nyangkataktak ya manga luwaꞌ nan dun ni manga siki ni Jisus, yanagaw piggalisan nan na kanan lugay aw pig-alekan nan ya manga siki aw dayaw nan asagi na manimboꞌ.Pig-asagan na manimboꞌ ya siki ni Jisus. 39 Manang ya Parisiyo na migpilit kan Jisus, kyinitaꞌ nan ya pig-imoꞌ na ka͡ubayan yan, aw miglong sakanan adti anenganeng nan, "Kun tengteng propita ya utaw ini, ka-ede-an nan galu kun singalan ya ka͡ubayan na nyawid kanan, kay ya ka͡ubayan iyan makasasalaꞌ saba." 40 Manang kya-ede-an ni Jisus kun unu ya adti anenganeng nan, yanagaw miglong sakanan, "Kay Simon, awun paglongun ku kanmu." Aw tyumubag si Simon, "Unu yan, kay Magpalna-uway?"

41 Aw miglong si Jisus sa pundinganan, law nan, "Awun sambuk na utaw na migpabeles sa kuwalta adti duwa ya utaw. Ya sambuk, nyeles sa limanggatus (500) ka dinariyo* aw ya sambuk uman nyeles oloꞌ sa kalima͡an (50). 42 Aw asuntu na diliꞌ nilan mabatug bayadan ya kanilan beles, yanagaw walaꞌ da silan pabayada na migpabeles kanilan. Na, adti kamayu anenganeng, singalan sa duwa ya to-o gyuminawa sa utaw na migpabeles kanilan?" 43 Aw tyumubag si Simon, "Adti anenganeng ku, idtu na dakulaꞌ ya beles." Aw miglong si Jisus kanan, "Matinaw saba ya tubag mu." 44 Aw piglingiꞌ nan ya ka͡ubayan aw piglongan nan si Simon, "Kyinitaꞌ da mu ya pig-imoꞌ na ka͡ubayan ini. Pagseled ku asini balay mu, walaꞌ aku mu atagi na tubig pada pag-ugas sa manga siki ku.* Manang ya ka͡ubayan ini, pig-ugasan nan baling ya manga siki ku na luwaꞌ nan, aw piggalisan nan na kanan lugay. 45 Aw walaꞌ aku mu aleki kasiling na katanem tadun sa pagpangumusta. Manang ya ka͡ubayan ini, lekat pa na pagdateng ku asini gayed nan pig-alekan ya manga siki ku. 46 Aw ya ulu ku walaꞌ mu asagi na lana na olibo, manang pig-asagan nan baling ya manga siki ku na manimboꞌ. 47 Yanagaw paglongun ta kaw: Madég saba ya manga salaꞌ na ka͡ubayan yeiy, manang piglanas da aw ka-ede-an yeiy magi dun ni dakulaꞌ na pagginawa nan kanak. Manang ya utaw na tabay ya manga salaꞌ nan na un ku lanasen, tagbiꞌ ya pagginawa nan kanak." 48 Aw miglong si Jisus adti ka͡ubayan, "Piglanas da ya manga salaꞌ mu." 49 Aw ya manga utaw na kyuman eped ni Jisus, miglong silan adti kanilan anenganeng, "Singalan kaꞌ utawa yeiy na makalanas sa manga salaꞌ?" 50 Manang miglong si Jisus adti ka͡ubayan, "Ya pagpangintu-u mu, yan ya nyakapaluwaꞌ kanmu. Yanagaw uliꞌ da kaw na awun da kalinaw na kanmu anenganeng."