1 Na, dun ni Témplo, talana ni Jisus migtandaw, kyinitaꞌ nan ya manga mayaman na mig-ulug sa kuwalta nilan adti uluganan. 2 Aw kyinitaꞌ nan uman ya sambuk na ka͡ubayan na balu na walaꞌ ya pagkamangan na mig-ulug sa duwa ya sinsilyo na tagbiꞌ to-o ya alagaꞌ. 3 Aw miglong si Jisus, "Matinaw saba ya un ku paglongun kamayu: Ya balu iyan pangkay walaꞌ ya pagkamangan nan, manang dakulaꞌ pa ya kanan pig-atag kay sa kadég na utaw na nyatag sa kuwalta nilan. 4 Kay ya pig-atag nilan, sobla la oloꞌ na kuwalta nilan, manang ya ka͡ubayan yeiy, pig-ubus nan pig-atag ya kadakulaꞌ na nyatagtun nan."

5 Na, awun manga utaw na migbalawbalaw sa kanenggeya na Témplo kay pigpakanenggeya͡an na manga batu aw eped pa na pig-atag na manga utaw. Yanagaw miglong si Jisus, 6 "Ya kadég yeiy na kyinitaꞌ mayu adun, dumateng ya allaw na mabus magkalat. Pangkay ya manga mangkabaklaꞌ na batu na pig-ilantulantu, ya kadég yeiy alag saba mangkagettan."

7 Aw pig-usip nilan si Jisus, "Kay Magpalna-uway, kinunu katuman ya kadég na piglong mu kakayna? Unu ya pangilala na agpet da ma-imoꞌ ya kadég yan?"

8 Aw miglong si Jisus, "Magpakatadeng kamu pagaw pasuwayen kamu, kay awun madég na un dumateng na dumala sa kanak ngalan aw maglong silan, ‘Aku saba ya Misiyas,’ aw awun uman maglong, ‘Dyumateng da ya allaw!’ Manang diliꞌ kamu magka-agad-agad kanilan. 9 Aw kun makadengeg kamu na awun manga dakulaꞌ na tanam aw pag-atu na manga utaw sa gubirnu, diliꞌ kamu magkallek. Kay ya kadég yeiy ka-ilangan una ma-imoꞌ, manang bekeꞌ pa nan ya katigkasan."

10 Aw tigkas yan, miglong pa si Jisus kanilan, "Ya sambuk na nasud manubbuk sa eped na nasud, aw ya sambuk na kasakupan tumanam sa eped na kasakupan. 11 Awun dakulaꞌ to-o na manga linug aw getem adti madég na banwa, aw awun uman manga magkedel na magkalintapun na makamatay. Aw lekat adti langit, awun kita-en na manga kallekanan aw manga eped pa uman na pangilala.

12 "Manang sa diliꞌ pa dumateng ya kadakulaꞌ yeiy, dakepen kamu aw pamulayaman, aw pa-agad adti sinagoga pada limanda kamu nilan aw kalabusuwun. Aw pa-agad kamu nilan uman adti asdangan na manga hariꞌ aw manga gubirnador. Ya kadég yeiy imo-un nilan kamayu asuntu sa pagpangintu-u mayu kanak. 13 Aw dun da kamu pakaselat pagpa-edeꞌ kanilan sa Madyaw na Ubat-ubat kanak. 14 Sa diliꞌ pa yeiy ma-imoꞌ, diliꞌ magkakamang ya kamayu ginawa sa un mayu tubag kanilan, 15 kay aku saba ya mag-atag kamayu sa katadeng sa un mayu paglongun. Pangkay ya manga po-on mayu diliꞌ nilan mabatug tubagen. 16 Aw dun uman ni allaw yan, pangkay ya manga mangkatikadeng mayu, aw manga kaylug aw kadégan mayu aw ubaybay mayu, lubidan kamu nilan adti kamayu manga po-on. Aw patayen nilan ya eped kamayu. 17 Asuntu sa pagdalug mayu kanak, dumutan kamu na madég na manga utaw. 18 Manang diliꞌ kamu magkallek kay tamengan kamu na Tyumanem aw pangkay ya sambuk na lugay mayu diliꞌ malagak. 19 Kun magpadeleg kamu sa pagpangintu-u kanak, matagtun mayu ya ginawa na walaꞌ ya katigkasan.

20 "Manang kun kita-en mayu ya syudad na Jérusalim na pyalibedan da na to-o madég na manga sundalu, na, ka-ede-an mayu na malapit da kalaten ya syudad. 21 Yanagaw, kamu na awun ni Judiya, maksay kamu palaguy adti manga buntud, aw kamu na asini syudad, maksay kamu luwaꞌ, aw ya kadég mayu adti manga pawaꞌ, diliꞌ da kamu magseled adti Jérusalim. 22 Kay yeiy ya manga allaw na pa-emel-emelen na Tyumanem ya Jérusalim pada matuman ya pigpasulat nan asini muna. 23 Makalalat ya manga ka͡ubayan na mabdes aw ya manga kalmukan dun ni manga allaw yan. Kay dumateng ya madég na kalugan asini tas na lupaꞌ, aw to-o malatay ya kagamakan na manga utaw asuntu sa kadaman na Tyumanem. 24 Aw madég ya pamatayen magi sa kampilan, aw ya manga eped allangen adti madég na manga nasud. Aw ya syudad na Jérusalim, agawun na manga Héntil aw eya-an nilan taman na malingeb da ya piglong na Tyumanem.

25 "Aw awun manga pangilala na kita-en dun ni sega aw bulan aw manga bitun. Aw ya manga utaw asini tas na lupaꞌ to-o magkakamang ya ginawa nilan, aw mallek silan sa mangkabaklaꞌ na manga baled adti dagat. 26 Magpanteneb ya manga utaw sa kakallekan nilan sa un dumateng adti kadakulaꞌ na banwa. Kay ya manga bitun aw kadég na pagkita-en na adti langit alag magkatangkeg aw diliꞌ da silan magi dun ni dadan na agiyanan nilan. 27 Aw dun da nilan kita-a ni labun aku na Iseꞌ na Utaw na lumikuꞌ na ka-agadan na dakulaꞌ na kalalamdag aw katulus na pagka Tyumanem ku. 28 Yanagaw, kun magpalekat da ya kadég yeiy, pakabagsega ya kamayu ginawa aw langad kamu adti langit kay malapit da ya pagpaluwaꞌ kamayu."

29 Aw miglong si Jisus kanilan sa pundinganan: "Anenganenga mayu ya kawuy na igira aw ya kadég uman na manga kawuy. 30 Kun kita-en mayu na dumawun da, ka-ede-an mayu na agpet da ya manga bulan na to-o mapasuꞌ. 31 Aw maynan uman, kun kita-en mayu ya kadég na piglong ku kamayu, ka-ede-an mayu na malapit da ya Paghariꞌ na Tyumanem sa Kasakupan nan. 32 Matinaw ya un ku paglongun kamayu: Ya manga utaw asini tas na lupaꞌ adun na manga allaw yeiy, diliꞌ pa silan mabus mangkamatay mendaꞌ na matuman da ya kadég na piglong ku. 33 Pangkay kun ma-uman ya langit aw ya kadakulaꞌ na banwa manang ya manga tingeg na piglong ku diliꞌ saba ma-uman."

34 Migpadeleg si Jisus miglong, "Magpakatadeng kamu pagaw gayed makabetang adti anenganeng mayu ya pagpa-eyang dun ni pagpamista, aw pag-inem mendaꞌ na mangkalangulangu kamu, aw sa pagkaypeng sa kamayu pag-eyaꞌ. Kay pagaw kabigla-an kamu 35 kasiling na iyalas na kyalitagan. Kay ya kadég na utaw na mig-eyaꞌ asini tas na lupaꞌ kabigla-an saba silan dun ni manga allaw yan. 36 Yanagaw gayed kamu pagtagilan sa kamayu pagka-utawun aw gayed kamu uman panawagtawag adti Tyumanem pada diliꞌ kamu kaliputan na manga kalugan yeiy na un dumateng, aw mabatug mayu ya mindeg adti asdangan ku na Iseꞌ na Utaw na walaꞌ ya kamulamula."

37 Kada allaw migpalna-u si Jisus adti pamanag na Témplo, manang pagkagabi, magluwaꞌ sakanan aw adtu maglagdeng ni Buntud na Manga Olibo. 38 Aw sa to-o pa maselem, madég ya utaw na migkatipun adti Témplo na un magpakanyeg sa palna-u nan.