1 Na, sambuk na allaw yan, pagkatigkas da ni Jisus manawagtawag, miglong kanan ya sambuk na umagakan nan, "Kay Magpalna-uway, si Juan na Magba͡utismuway pigpalna-uwan nan ya manga umagakan nan sa pagpanawagtawag. Palna-uwi kami uman sa pagpanawagtawag adti Tyumanem." 2 Yanagaw miglong si Jisus kanilan, "Sa kamayu pagpanawagtawag, maynini ya paglongun mayu:

‘Kay Ama, migsekat kami adti kanmu na basa͡an kaw galu na kadég na utaw,

aw dumateng adi kanami ya Kasakupan na Pighari-an mu.

3 Atagi kami sa kanami kakan kada allaw.

4 Aw lanasa beg ya manga salaꞌ nami, kay pigpasinsiya͡an nami uman ya kadég na nyakasalaꞌ kanami,

aw diliꞌ mu kami pagpabaya-an adti pagtandaꞌ na diliꞌ nami mabatug degen.’ "

5 Aw miglong pa uman si Jisus adti kanilan, "Alimbawaꞌ kun awun sambuk kamayu na madtu ni balay na ubaybay nan na magtengaꞌ da ya gabi aw magtatawag na maglong, ‘We… Lew, pabelesa aku beg na tulullapid ya mabaklaꞌ na pan, 6 kay awun ubaybay ku na bagu dyumateng lekat adti mawat aw walaꞌ ya un ku pakan kanan!’ 7 Aw tumubag sakanan lekat adti seled na balay, ‘Ya-i la aku paglinggala. Pigbalagsangan da ku ya tatakep aw kyumulang da ya kanak mangayseꞌ asini tampid ku, yanagaw diliꞌ da aku maka-atag kanmu sa pangkay unu.’ 8 Ya tengteng matinaw, diliꞌ sakanan malim magbangun pangkay ubaybay pa silan, manang asuntu na walaꞌ kamulamula gyumelgel migsekat ya utaw yan, magbangun da sakanan aw matag sa pigsekat nan. 9 Yanagaw paglongun ta kamu: Pagsekat kamu adti Tyumanem, aw atagan kamu nan. Tibagsegi mayu ya pagpaninaw, aw pakitaꞌ nan kamayu. Pagtatawag kamu adti kanan, aw uwangan kamu nan. 10 Kay ya kadég na magsekat adti kanan, un nan saba atagan. Aw ya kadég na maninaw, awun saba kita-en nilan. Aw ya kadég na magtatawag adti kanan, un nan saba silan uwangan. 11 Alimbawaꞌ, kamu na manga ama, kun magsekat ya iseꞌ mayu sa isdaꞌ, unu, atagan mayu baling na ulud? Diliꞌ saba! 12 Aw kun magsekat silan sa iseꞌ na manuk, atagan kaꞌ mayu baling na sangalan? Diliꞌ saba! 13 Yanagaw, pangkay makasasalaꞌ kamu, manang kya-ede-an mayu kun unu ya madyaw atag adti kamayu mangayseꞌ. Na, to-o pa dun ya Ama mayu na adti tas na langit. Atag nan saba ya Ispiritu Santo adti kadég na magsekat kanan."

14 Na, sambuk na allaw, mig-alilin si Jisus sa busaw na syumeled adti utaw aw nyakapa-umu kanan. Sa abus da ni Jisus alilini ya busaw, nyakapaglong da ya utaw yan. Aw to-o nya-enneng-enneng ya kadég na utaw. 15 Manang awun eped kanilan na miglong, "Ya kanan pag-alilin sa manga busaw, magi saba sa katulus ni Bilsibul na pangulu na manga busaw." 16 Aw awun uman eped kanilan na kaliman nilan tanda-en si Jisus. Yanagaw migsekat silan kanan sa pangilala na magmatinaw kun yan ya pigpadala na Tyumanem. 17 Manang kya-ede-an ni Jisus ya adti anenganeng nilan, yanagaw piglongan nan silan, "Ya kasakupan na nyatenga-tengaꞌ, diliꞌ yan magpadeleg na madugay. Aw maynan uman ya ka-epedanan dun ni balay na awun pagkatenga-tengaꞌ. 18 Aw kun si Satanas ya mig-alilin sa manga sakup nan, na, kasiling na pigtanam nan ya kanan pagka-utawun, aw diliꞌ baling magpadeleg ya pagdumala nan. Piglong ku yeiy kay miglong kamu na pig-alilinan ku ya manga busaw magi sa katulus ni Bilsibul na pangulu nilan. 19 Aw kun kan Bilsibul katulus ya kanak pag-alilin sa manga busaw, na, usipen ta kamu: Ya manga dyumalug kamayu, ayin kaꞌ lekat ya katulus nilan na maka-alilin sa manga busaw? Silan saba ya magmatinaw na galuꞌ ya piglong mayu! 20 Manang kun magi sa katulus na Tyumanem ya pag-alilin ku sa manga busaw, na, dun da mayu ka-ede-i na ya Kasakupan na Pighari-an na Tyumanem awun da ni kamayu."

21 Yanagaw miglong pa uman si Jisus sa pundinganan, "Kun ya utaw na mabagseg awun madég na kinis nan na migtungguꞌ sa palasyo nan, diliꞌ ma-agaw ya manga nyatagtun nan. 22 Manang kun sulungun ya kanan palasyo na utaw na to-o pa mabagseg kanan, degen saba ya tagtun, aw ma-agaw ya manga kinis na pigsaligan nan, aw tenga-tenga-en uman ya ka-unan na nya-agaw lekat adti kanan."*

23 Aw migpadeleg si Jisus miglong, "Ya utaw na walaꞌ pagpasakup kanak, yan baling ya gayed migbalabag sa kanak manga imo-unun. Aw kun awun diliꞌ tumabang maggagad sa manga utaw adi kanak, yan baling ya migpakawat kanilan.

24 "Na, kun awun busaw na lumuwaꞌ adti utaw, maglegeblegeb yan adti kaligbinan na walaꞌ ya tubig aw maninaw sa un nan ka-eya-an, manang walaꞌ ya kita-en nan dun. Yanagaw maglong adti anenganeng nan, ‘Lumikuꞌ aku baling adti muna pig-eya-an ku.’ 25 Aw sa paglikuꞌ nan, kita-en nan na malinis da ya kanan pig-indegan idtu muna, kasiling na balay na dayaw da kyapamunasan aw nyatigpes. 26 Pagkatigkas yan, mangay sakanan sa pitu ya eped nan na to-o pa baling malatay kanan. Aw sumeled silan adti utaw yan, aw dun da silan pag-eyaꞌ. Aw to-o pa malatay ya kabetangan na utaw yan kay sa idtu muna."

27 Sa kenneꞌ pa ni Jisus miglong, awun ka͡ubayan dun ni katipun na miglong kan Jisus sa mabagseg na tingeg, law nan, "Madyaw saba ya kana ina mu na migpaka͡utaw aw migpasusu kanmu." 28 Manang tyumubag si Jisus kanan, "To-o pa baling madyaw ya kana manga utaw na migpakanyeg sa tingeg na Tyumanem aw migtuman sa pigdengeg nilan."

29 Sa to-o pa migkadég ya manga utaw na migkatipun, migpadeleg si Jisus miglong, "Tay sa kalatay na manga utaw adun na manga allaw yeiy! Migsekat silan sa pangilala, manang ya pangilala na un ku atag kanilan, yan oloꞌ ya kasiling na nya-imoꞌ kan Jonas. 30 Kay si Jonas asini muna nya-imoꞌ sakanan pangilala adti manga utaw dun ni syudad na Ninibé, maynan uman aku na Iseꞌ na Utaw, ma-imoꞌ uman aku pangilala adti manga utaw adun na manga allaw yeiy.* 31 Pagdateng na allaw na pag-ukum, ya rayna na migdumala asini muna sa banwa na Syiba, pasala-en nan ya kadég mayu. Kay nyanaw sakanan lekat adti mawat na banwa pada magpakanyeg sa katadeng na hariꞌ na si Solomon. Manang paglongun ta kamu na asini la ni tampid mayu ya to-o pa matas kan Solomon, manang walaꞌ mayu baling sakanan pakanyegi. 32 Aw dun ni allaw na pag-ukum, ya manga utaw dun ni syudad na Ninibé pasala-en nilan uman ya kadég mayu. Kay sa pagpakanyeg nilan sa pag-ubat-ubat ni Jonas, migselsel silan sa kanilan manga salaꞌ. Manang kamu, pangkay ini tampid mayu ya to-o pa matas kan Jonas, manang walaꞌ mayu baling sakanan pangintu-uwi."

33 Aw miglong pa uman si Jisus kanilan, "Walaꞌ ya utaw na magsuluꞌ sa salengan pada sangkuban aw kun bekeꞌ yan salibenan nan. Manang betang nan baling adti bantawanan pada kumitaꞌ ya kadég na sumeled adti balay. 34 Ya kanmu mata, yan ya kalalamdag na lawas mu. Yanagaw, kun madyaw ya pag-inunu mu, ka-ilawan ya kadakulaꞌ na pagka-utawun mu. Manang kun masakiten ya kanmu mata, na, to-o dakulaꞌ ya kangitngit na awun ni kanmu. 35 Yanagaw magpakatadeng kaw pagaw iman mu aw kya-ilawan da ya anenganeng mu manang mangitngit kadiꞌ. 36 Kun ya anenganeng mu nyatmuꞌ na kalalamdag aw walaꞌ ya kangitngit dun, ka-ilawan saba ya kadakulaꞌ na pagka-utawun mu, kasiling na kya-ilawan kaw na saleng."

37 Pagkatigkas ni Jisus maglong, awun sambuk na Parisiyo na migpilit kanan na kuman adti balay nan. Yanagaw nyagad si Jisus kanan aw kyuman adti tampid nan. 38 Sa pagkan da nilan, nyabelengbeleng ya Parisiyo sa pagkitaꞌ nan kan Jisus kyuman na walaꞌ una pag-unaw kasiling na pa-agi na pigdalug na kanilan mangkabaklegay. 39 Yanagaw miglong si Jisus kanan, "Kamu na manga Parisiyo, pag-ugasan mayu ya luwaꞌ na lawas na tabuꞌ aw ya salad na palatu manang kenneꞌ pa baling na kalipaꞌ na adti seled! Migtallalingu kamu, kay yan ya gayed mayu pigtibagsegan ya pagkamang sa pagkaliman mayu aw nyatmuꞌ ya anenganeng mayu na malatay. 40 Ayin pakabetang ya anenganeng mayu? Endaꞌ, Tyumanem saba ya mig-imoꞌ sa lawas mayu, aw yan uman ya mig-imoꞌ sa kamayu anenganeng. 41 Yanagaw kallati mayu ya manga utaw na walaꞌ ya pagkamangan. Aw kun yeiy ya imo-un mayu, na, dayaw kamu magkalinis.

42 "Kamu na manga Parisiyo, malatay ya un mayu datengan! Dayaw mayu pigdalug ya suguꞌ dun ni Uldin na atag adti Tyumanem ya kasampuluꞌ, pangkay ya mangkayantek na anagay na pigtanem mayu alag mayu pigkamangan. Manang walaꞌ pag-unawa ya anenganeng mayu dun ni kamayu pag-usay sa manga utaw, aw walaꞌ mayu uman ginawayi ya Tyumanem. Ka-ilangan saba mayu yeiy alag imo-un dala ya pag-atag sa kasampuluꞌ adti Tyumanem.

43 "Kamu na manga Parisiyo, malatay ya un mayu datengan! Dun ni sinagoga kaliman mayu na mingkud adti ingkudanan na utaw na dengganen, aw pangkay adti manga palingki kaliman mayu uman basa͡an na manga utaw. 44 Malatay ya un mayu datengan, kay kasiling kamu na manga lebeng na walaꞌ pangilalayi. Pigpanggina-an na manga utaw na walaꞌ nilan ka-ede-i na awun kadiꞌ lebeng.* Aw maynan uman, iman na manga utaw aw matulid kamu manang walaꞌ nilan ka-ede-i na malatay ya anenganeng mayu."

45 Na, awun sambuk na magpalna-uway sa Uldin na manga Judiyu na miglong kan Jisus, "Kay Magpalna-uway, dun ni piglong mu, pigsupla mu kami uman!" 46 Aw tyumubag si Jisus, "Kamu uman na manga magpalna-uway sa Uldin, malatay ya un mayu datengan! Kay gayed mayu pigdugangan ya manga suguꞌ na Tyumanem, aw piggelgel mayu ya manga utaw na dalugun nilan. Aw ya syampetan yan, to-o silan kyabegatan. Manang pigpabaya-an baling mayu silan aw pangkay tagbiꞌ walaꞌ kamu tabang pada matuman nilan ya pigsuguꞌ mayu. 47 Malatay ya un mayu datengan! Kay migpa-indeg kamu sa manenggeya na batu adti tas na manga lebeng na manga propita na pigpatay na tyugbulan mayu asini muna. 48 Aw magi dun ni pigpan-imoꞌ mayu, kasiling na tyumandeꞌ kamu sa pagpatay na kamayu tyugbulan sa manga propita, aw kamu ya mig-imoꞌ sa manga lebeng nilan. 49 Yanagaw yeiy ya du-an na dadan miglong ya Tyumanem magi sa katadeng nan, law nan, ‘Padala͡an ku silan na manga propita aw manga apostolés. Manang ya manga eped pamatayen nilan aw ya manga eped pamulayaman.’ 50 Yanagaw kamu na manga utaw adun na manga allaw yeiy, tubagenen mayu ya pagpatay sa manga propita na Tyumanem, lekat pa asini muna na pag-imoꞌ nan sa kadakulaꞌ na banwa taman adun. 51 Aw lekat pa saba na pagpatay kan Abél mendaꞌ adti kan Zakariyas na pigpatay adti Témplo, dun ni tengaꞌ na Balay na Tyumanem aw ya dugsu-anan.* Paglongun ta kamu: Kamu na manga utaw adun na allaw ini, kamu saba ya pasala-en sa kadég na pig-imoꞌ nilan idtu muna.

52 "Malatay ya un mayu datengan, kamu na manga magpalna-uway sa Uldin! Kay gayed mayu pigbalabagan ya agiyanan adti tengteng na pagka-edeꞌ sa Tyumanem. Diliꞌ kamu malim sumeled, aw bekeꞌ na yan da oloꞌ, manang pigbalabagan mayu uman ya manga eped na malim galu sumeled."

53 Sa pag-indeg da ni Jisus adti balay na Parisiyo, dun da pagpalekat ya malatay na ginawa kanan na manga magpalna-uway sa Uldin aw manga Parisiyo. Aw gayed silan nyangusip kanan sa pangkay unu, 54 kay yan ya tud nilan na kalitagan si Jisus magi dun ni paglong nan.