1 Pagkatigkas yan, nyindeg ya kadég nilan aw pigpa-agad nilan si Jisus adti kan Pilato. 2 Aw pigpalekat nilan ya paglimanda kanan, law nilan, "Ya utaw yeiy, kyinitaꞌ nami sakanan na migpasuway sa manga eped nami na Judiyu. Aw pigpalna-uwan nan silan na diliꞌ matag sa buwis adti kan César. Aw miglong uman sakanan na yan kunu ya Kristu aw hariꞌ." 3 Yanagaw nyusip si Pilato kan Jisus, "Unu, ikaw ya hariꞌ sa manga Judiyu?" Aw tyumubag si Jisus, "Piglong da mu." 4 Aw miglong si Pilato adti manga mangkatas na magdadugsu-ay aw kadég na manga utaw na miglimanda, law nan, "Walaꞌ ya kyinitaꞌ ku na indeganan na limanda mayu ya utaw yeiy." 5 Manang to-o silan gyumelgel, law nilan, "Piggagad nan ya manga utaw asini kadakulaꞌ na Judiya na matu sa gubirnu magi dun ni pagpalna-u nan. Migpalekat sakanan adti Galiliya, aw dyumateng uman asini Jérusalim."

6 Pagdengeg ni Pilato sa piglong nilan, nyusip sakanan kun taga Galiliya si Jisus. 7 Aw sa pagpaka-edeꞌ nan na si Jisus taga Galiliya sakup na pigdumala͡an ni Hérodés Antipas, pigpa-ated nan si Jisus adti kan Hérodés kay dun ni manga allaw yan awun sakanan ni Jérusalim.

8 Sa pagkitaꞌ ni Hérodés kan Jisus, migleya sakanan kay madugay da galu na kaliman nan kumitaꞌ kanan, kay dyengeg nan ya manga pigpan-imoꞌ ni Jisus aw kaliman nan na mag-imoꞌ sakanan sa milagru pada kita-en nan. 9 Yanagaw madég ya manga usip nan kan Jisus manang walaꞌ nan tubaga. 10 Dun uman ya manga mangkatas na magdadugsu-ay aw manga magpalna-uway sa Uldin, aw miglong silan sa mabagseg na tingeg dun ni pagpasalaꞌ nilan kan Jisus. 11 Aw migpalekat si Hérodés aw manga sundalu nan mig-odoy-odoy kan Jisus, aw pigpasut nan na malawig na sa-ul na to-o manenggeya kasiling na kana hariꞌ. Aw pigpalikuꞌ nan adti kan Pilato. 12 Na, dun ni allaw yan migka-ubaybay da si Hérodés aw si Pilato, pangkay matalapo-on silan idtu muna.

13 Na, pigpatawag ni Pilato ya manga mangkatas na magdadugsu-ay, aw manga magdadumala͡ay, aw ya eped pa na manga Judiyu. 14 Aw miglong si Pilato kanilan, "Pigdala la mayu kanak ya utaw yeiy na pigdiklamu na migpasuway kunu sakanan sa manga utaw. Aw sa pagsadsad ku kanan dun ni asdangan mayu, walaꞌ saba ya kyinitaꞌ ku na salaꞌ nan na pigdiklamu mayu sakanan. 15 Pangkay si Hérodés walaꞌ uman ya kyinitaꞌ nan na salaꞌ na utaw yeiy, yan ya du-an na pigpalikuꞌ nan adi kanak. Walaꞌ ya nya-imoꞌ nan na malatay na umbaꞌ sakanan patayen! 16 Yanagaw palabet da ku oloꞌ sakanan, tigkas yan paluwa-en." 17 [Na, awun katanem na gubirnador na kada umay dun ni Pista na Paglabay na Anghil na Tyumanem, ka-ilangan magpaluwaꞌ sakanan sa sambuk na nyakalabusu.] 18 Manang nyamansag ya kadég na manga utaw, law nilan, "Pataya ya utaw yeiy! Aw paluwa-a kanami si Barabas!" 19 Na, si Barabas pigkalabusu asuntu sa paggagad nan sa manga Judiyu na nyatu sa gubirnu na taga Roma dun ni Jérusalim, aw awun uman utaw na pigpatay nan. 20 Kaliman ni Pilato paluwa-en si Jisus, yanagaw pig-usip pa nan uman ya manga utaw. 21 Manang gayed silan nyamansag na miglong, "Pakalabuwan sakanan! Pakalabuwan sakanan adti krus!" 22 Aw sa katlu la silan ni Pilato piglongan, law nan, "Anangaꞌ kaꞌ? Unu ya nya-imoꞌ nan na malatay? Walaꞌ saba ya kyinitaꞌ ku na pig-imoꞌ nan na umbaꞌ patayen! Yanagaw palabet ku, aw tigkas yan paluwa-en ku sakanan." 23 Manang to-o la baling silan nyamansag na pakalabu si Jisus adti krus. Aw pig-atag kanilan ya pigsekat nilan. 24 Tyumandeꞌ da si Pilato kanilan na pakalabu si Jisus adti krus. 25 Pigpaluwaꞌ nan ya utaw na pigkalabusu na pigsekat nilan pangkay nyatu sakanan sa gubirnu aw migpatay sa utaw. Manang si Jisus pigtumbay nan adti kanilan pada ma-imoꞌ ya kaliman nilan imo-un adti kanan.

26 Sa pagdala na manga sundalu kan Jisus adti luwaꞌ na syudad na Jérusalim, pig-isungun nilan ya sambuk na eseg na si Simon na taga syudad na Ciréné, aw pigleges nilan pigpapisan kanan ya krus aw gyumuyud sakanan kan Jisus.

27 Na, awun madég to-o na manga utaw na dyumalug, aw awun uman manga ka͡ubayan dun na migpansisugaw kay migkalat ya ginawa nilan. 28 Manang piglingiꞌ silan ni Jisus aw piglongan nan silan, "Kamu na manga ka͡ubayan na asini Jérusalim, diliꞌ aku mayu pagsugawan, manang yan baling ya sugawi ya kamayu pagka-utawun aw ya manga mangayseꞌ mayu. 29 Kay dumateng ya manga allaw na maglong ya manga utaw, ‘Madyaw ya kana manga ka͡ubayan na diliꞌ magpaka-iseꞌ aw walaꞌ ka͡utawi aw walaꞌ ya pigpasusu nilan na iseꞌ.’ 30 Dun ni manga allaw yan, paglongun na manga utaw ya manga buntud, ‘Gettani kami!’ Aw maglong silan uman adti manga kabuludan, ‘Tabuni kami!’ 31 Kay kun yeiy ya pig-imoꞌ kanak na walaꞌ ya salaꞌ, to-o pa dun ya imo-un adti manga utaw na awun salaꞌ."*

32 Awun uman duwa ya utaw na ribildi na pigpa-agad nilan na un patayen eped ni Jisus. 33 Aw sa pagdateng nilan adti Banwa na Pesaꞌ na Ulu, dun da nilan si Jisus kalabuwi adti krus aw duwa ya ribildi adti manga krus nilan, ya sambuk apit adti kalintu nan aw ya sambuk uman apit adti kawala. 34 Aw miglong si Jisus, "Kay Ama, pasinsiyayi silan aw ya-i silan pa-emel-emela kay walaꞌ nilan ka-ede-i kun unu ya pig-imoꞌ nilan." Aw migbunutbunut ya manga sundalu kun singalan kanilan ya makatagtun sa tagsambuksambuk na kadégkadég ni Jisus. 35 Aw mig-indeg-indeg ya manga utaw migbantay sa kadég na nyangka-imoꞌ. Manang ya manga magdadumala͡ay sa manga Judiyu, pig-odoy-odoy nilan sakanan, law nilan, "Mabatug nan tabangan ya manga eped. Na, tabangan nan galu uman ya kanan pagka-utawun kun yeiy ya Misiyas na pigpadala na Tyumanem na ma-imoꞌ hariꞌ!" 36 Aw pig-odoy-odoy uman na manga sundalu talana nilan dyumulud kan Jisus na un pa-inemen na bino na malagsing, 37 aw miglong silan, "Kun ikaw ya Hariꞌ na manga Judiyu, na, tabangi ya kanmu pagka-utawun!" 38 Na, apit adti tas na ulu nan awun tabla na pigsulatan sa ini: "Yeiy ya Hariꞌ na manga Judiyu."

39 Aw mig-odoy-odoy uman kan Jisus ya sambuk na ribildi na pigkalabuwan dun, law nan, "Endaꞌ, ikaw saba ya Misiyas? Na! Tabangi ya kanmu pagka-utawun aw tabangi kami uman!" 40 Manang pigsagda sakanan na eped nan na ribildi na maglong, "Unu, walaꞌ kaw kallek sa Tyumanem? Alag saba kitadun pig-ukuman na patayen. 41 Kita duwa ya umbaꞌ ukuman kay yeiy ya tandan sa imo-unun nateꞌ na malatay. Manang ya utaw ini walaꞌ ya pig-imoꞌ nan na malatay." 42 Aw miglong pa sakanan, "Kay Jisus, anenganenga aku dun ni allaw na maghariꞌ da kaw." 43 Aw miglong si Jisus kanan, "Matinaw saba ya un ku paglongun kanmu: Adun na allaw mag-iyeped kita adti Para-iso."

44 Pagka-alas dosi la, migkangitngit ya banwa seled na tulungka udas, 45 aw walaꞌ silat ya sega. Aw nyakisay ya to-o madakmel na téla na pigsaliben na awun ni seled na Témplo, aw dayaw nyatengaꞌ na duwa.* 46 Aw mig-ulangag si Jisus, "Kay Ama, tumbay ku kanmu ya kanak ispiritu!" Aw tigkas yan nyabugtuꞌ ya ginawa nan. 47 Na, pagkitaꞌ na kapitan na manga sundalu na migtungguꞌ kanan, pigdeyen nan ya Tyumanem, law nan, "Matinaw saba na walaꞌ ya salaꞌ na utaw yeiy!" 48 Aw ya madég to-o na utaw na migkatipun migbantay, sa pagkitaꞌ nilan sa nyangka-imoꞌ, nyan-uliꞌ silan na migpansibug sa kanilan aba kay migkalat ya ginawa nilan. 49 Aw ya kadég na manga kyumilala kan Jisus dala ya manga ka͡ubayan na nyagad kanan lekat adti Galiliya, kyinitaꞌ nilan uman adti mawatawat ya kadég na nya-imoꞌ.

50 Na, awun sambuk na utaw na si José na taga lunsud na Arimatiya sakup na Judiya. Sambuk sakanan na nyaka-akup adti matas na pag-usayan. Walaꞌ ya pagsalaꞌ sa bet nan aw pagbasa͡an sakanan na manga utaw. 51 To-o nan pigtagadan ya Paghariꞌ na Tyumanem sa Kasakupan nan, aw walaꞌ sakanan tandeꞌ sa pagbayaꞌ na manga eped nan aw sa manga pigpan-imoꞌ nilan kan Jisus. 52 Ya utaw yeiy nyadtu ni kan Pilato aw pigsekat nan ya lawas ni Jisus. 53 Pagkatigkas yan, pigkamang nan ya lawas lekat adti krus aw pigbedbedan nan na téla na linum. Aw pigbetang nan dun ni ilib na pigkutkutan dadan adti kilid na pangpang na walaꞌ pa kabetangi na lawas na utaw. 54 Na, yan na allaw, yan da ya pagtagilan na manga utaw sa Allaw na Paglagdeng.*

55 Aw ya manga ka͡ubayan na nyagad kan Jisus lekat adti Galiliya, dyumalug silan kan José aw pigtandawan nilan ya pagbetang sa lawas ni Jisus adti ilib na piglebengan. 56 Pagkatigkas yan, nyuliꞌ silan aw migtagilan sa manga manimboꞌ aw lana na un pagdamus sa lawas ni Jisus. Manang sa pagdateng na Allaw na Paglagdeng, miglagdeng silan kay yan ya suguꞌ dun ni Uldin.