1 Na, ya manga mangungubla͡ay sa buwis aw ya manga makasasalaꞌ alag silan migpalapit kan Jisus kay kaliman nilan pakanyegan ya palna-u nan. 2 Aw migpanggumudgumud ya manga Parisiyo aw manga magpalna-uway sa Uldin na manga Judiyu, law nilan, "Ya utaw ini, dyumawat sa manga makasasalaꞌ aw syumalu kanilan kyuman."

3 Yanagaw pig-ubatan silan ni Jisus sa pundinganan: 4 "Kun awun utaw dun ni kamayu na tyumagtun sa sanggatus (100) ya karniro, aw nyalagak ya sambuk kanilan, unu ya un nan imo-un? Endaꞌ, ayawan pa nan saba ya kasiyaman tag siyam (99) dun ni panabtabanan aw paninawun nan ya sambuk na nyalagak mendaꞌ na kita-en nan. 5 Aw sa pagkitaꞌ da nan, to-o sakanan magleya aw pisanen nan ya karniro. 6 Aw sa pagdateng nan adti balay, tawagen nan ya kanan manga ubaybay aw manga sumbalay, aw maglong kanilan, ‘Magleya kitadun kay pigkitaꞌ da ku ya kanak karniro na nyalagak.’ 7 Aw maynan uman, dakulaꞌ pa saba ya pagleya na adti tas na langit asuntu sa sambuk na makasasalaꞌ na magselsel, kay sa kasiyaman tag siyam (99) ya utaw na iman nilan aw walaꞌ ya kanilan salaꞌ aw diliꞌ nilan ka-ilangan magselsel.

8 "Aw kun ya sambuk uman na ka͡ubayan awun sampuluꞌ ya drakma na kuwalta nan,* aw kyalagakan sa sambuk, na, unu ya imo-un nan? Sulu-an nan saba ya kanan salengan aw pamunasan nan ya kanan balay. Aw to-o nan paninawun mendaꞌ na kita-en nan. 9 Aw sa pagkitaꞌ da nan, tawagen nan ya kanan manga ubaybay aw manga sumbalay, aw maglong sakanan kanilan, ‘Magleya kitadun kay kyinitaꞌ da ku ya kanak kuwalta na nyalagak.’ 10 Maynan uman, dakulaꞌ saba ya pagleya na manga anghil na Tyumanem na awun ni tas na langit asuntu sa sambuk na makasasalaꞌ na migselsel."

11 Aw awun pa uman pundinganan na pig-ubat kanilan ni Jisus, law nan, "Awun sambuk na utaw na duwa ya iseꞌ nan na eseg. 12 Sambuk na allaw yan miglong ya mangud adti ama nan, ‘Kay Maꞌ, atagan da kanak ya bagiꞌ ku.’ Yanagaw pigtengaꞌ na ama nilan ya kanan ka-unan adti duwa ya iseꞌ nan. 13 Na, paglabay da na pilangallaw, piggalin na mangud ya kadég na pigbagiꞌ kanan, aw tigkas yan, nyanaw sakanan adti mawat na banwa. Aw to-o nan pigdagwas ya kanan kuwalta adti pangkay unu na pagkaliman nan. 14 Pagka͡abus da na kanan kuwalta, dyumateng uman ya dakulaꞌ na getem adti banwa yan. Aw dun da pagpalekat na to-o migkapelek sakanan. 15 Yanagaw nyaninaw sakanan sa talabahu, aw yan ya kyaseledan nan ya magpakan sa manga takuꞌ adti pawaꞌ na sambuk na utaw dun ni banwa yan. 16 Aw to-o sakanan nyagetem, yanagaw kaliman da nan galu kuman sa kakan na manga takuꞌ, kay walaꞌ ya pangkay sambuk na nyatag kanan sa makan. 17 Aw pigpalekat nan ya pag-anenganeng sa kyabetangan nan. Aw miglong adti kanan anenganeng, ‘Ya kadég na magtalabahuway ni Maꞌ, dakulaꞌ ya kanilan makan. Manang ya kanak ini, un da aku matay na ballus!’ 18 Yanagaw miglong sakanan, ‘Madyaw pa baling na muliꞌ aku adti kan Maꞌ aw paglongun ku sakanan, "Kay Maꞌ, nyakasalaꞌ aku adti Tyumanem aw adti kanmu. 19 Aw adun, diliꞌ da aku umbaꞌ pagtawagen na iseꞌ mu. Imo-a la aku baling sambuk na kanmu magtalabahuway!" ’ 20 Aw pig-indegan nan ya banwa yan aw nyuliꞌ adti tampid na ama nan. Aw sa mawat pa sakanan, pigkitaꞌ da na kanan ama aw to-o nan pigkallatan. Yanagaw dyumalagan pasinan adti iseꞌ nan, aw pigkepkep nan aw dayaw nan aleki. 21 Aw miglong kanan ya iseꞌ, ‘Kay Maꞌ, nyakasalaꞌ aku adti Tyumanem aw adti kanmu. Diliꞌ da aku umbaꞌ pagtawagen na iseꞌ mu.’ 22 Manang miglong ya kanan ama adti manga sugu-anen nan, ‘Maksay mayu dala adi ya to-o manenggeya na kadégkadég aw pasutan kanan. Paningsingi mayu ya tulluꞌ nan aw dayaw mayu sandali ya siki nan. 23 Aw angaya mayu uman ya nati na baka na pigpatabaꞌ, aw tumba͡a mayu. Naten magpista, 24 kay ya iseꞌ ku ini kasiling na nyatay da aw nyataw uman salut! Nyalagak idtu muna aw nyuliꞌ da adun.’ Yanagaw migpalekat silan migpista.Lyumikuꞌ adti ama nan ya iseꞌ nan na nyalagak.

25 "Na, walaꞌ kadugay nyuliꞌ ya iseꞌ nan na magulang lekat adti pawaꞌ. Aw sa malapit da sakanan adti balay, dyengeg nan ya sunata aw ya pagsayaw. 26 Yanagaw pigtawag nan ya sambuk na sugu-anen aw nyusip kanan, ‘Unu ya pigleya͡an nilan awun ni balay?’ 27 Aw miglong kanan ya sugu-anen, ‘Nyuliꞌ da ya mangud mu! Pigtumba͡an na ama mayu na nati na baka na pigpatabaꞌ kay nyuliꞌ kunu ya iseꞌ nan na madyaw ya lawas aw walaꞌ ya kyagamakan nan!’ 28 Manang pagdengeg na magulang seiy, nyadaman to-o sakanan, aw diliꞌ malim sumeled adti balay. Yanagaw lyumuwaꞌ ya ama nan aw nyanginayuꞌ kanan na sumambuk kanilan. 29 Manang tyumubag ya magulang sa ama nan, ‘Kay Maꞌ, anenganenga pagaw, gayed aku migtalabahu kanmu seled da na pilangka͡umay. Aw walaꞌ aku pagsuwayenen sa suguꞌ mu. Manang walaꞌ ya pig-atag mu kanak pangkay da iseꞌ na kambing na un ku pagpista eped na kanak manga ubaybay. 30 Manang sa pag-uliꞌ da na iseꞌ mu na migdagwas sa kanmu ka-unan adti manga bubay na miggalin sa pagkaka͡ubayan nilan, dayaw mu baling pigtumba͡an sa nati na baka na pigpatabaꞌ!’ 31 Aw miglong kanan ya ama nan, ‘Kay Toꞌ, ini kaw gayed ni sayid ku. Aw ya kadég na nyatagtun ku alag saba kanmu. 32 Umbaꞌ saba kitadun magleya kay ya mangud mu ini la! Kasiling sakanan na nyatay da aw nyataw uman salut! Nyalagak idtu muna aw adun kyinitaꞌ da.’ "