1 Kay Tyupilo na to-o pagbasa͡an:

Madég ya utaw na migtibagseg migsulat sa manga kasampetanen sa manga nyatuman asini kanaten na manga pig-imoꞌ ni Jisus. 2 Pigsulat nilan ya pigpa-edeꞌ na manga utaw na tengteng kyumitaꞌ sa kadég na nya-imoꞌ lekat pa idtu muna. 3 Aw asuntu na to-o ku pigsadsadan ya kadég na nya-imoꞌ lekat pa na idtu muna, nyakabetang adti anenganeng ku na madyaw aw dayaw ku uman tapiden ya pagkasulat adti kanmu. 4 Ya tud ku pada to-o mu ka-ede-an na tengteng matinaw ya pig-ubat-ubat da kanmu.

5 Dun ni manga allaw na si Hérodés ya mighariꞌ sa banwa na Judiya, awun sambuk na magdadugsu-ay adti Témplo na Tyumanem na pigngalanan na Zakariyas. Nyaka-akup sakanan adti ugbungan na manga magdadugsu-ay na pigdumala͡an ni Abiyas asini muna.* Aw ya ka͡ubayan nan na si Élisabét, buwadbuwad uman ni Aaron. 6 Na, si Zakariyas aw si Élisabét, alag silan matulid adti anenganeng na Tyumanem. Dayaw nilan pigdalug ya kadég na suguꞌ dun ni Uldin na pig-atag na Tyumanem. Yanagaw walaꞌ ya un pagsalaꞌ kanilan. 7 Manang walaꞌ ya iseꞌ nilan kay diliꞌ magpaka-iseꞌ si Élisabét aw unud da alag ya ginawa nilan.

8 Na, dyumateng ya simana na kanan Zakariyas da uman ugbungan ya mag-imoꞌ sa manga imo-unun dun ni Témplo na Tyumanem.* 9 Aw migbunutbunut silan kay yan ya katanem na manga magdadugsu-ay, aw si Zakariyas ya kyabunutan nilan na un magsunug sa insénso adti seled na Balay na Tyumanem. 10 Aw sa talana nan migsunug sa insénso, awun madég to-o na manga utaw adti luwaꞌ na nyanawagtawag adti Tyumanem. 11 Aw migpakitaꞌ kan Zakariyas ya sambuk na anghil na Tyumanem na nyindeg apit adti kalintu na sunuganan sa insénso. 12 Pagkitaꞌ nan sa anghil, migteneb sakanan aw to-o nyallek. 13 Manang miglong kanan ya anghil, "Diliꞌ kaw magkallek, kay Zakariyas, kay dyengeg saba na Tyumanem ya panawagtawag mu. Aw ya ka͡ubayan mu na si Élisabét, un mag-iseꞌ sa eseg, aw Juan ya pagngalan mayu kanan. 14 To-o dakulaꞌ ya pagleya mu kanan, aw madég uman ya magleya sa pagka͡utaw nan. 15 Kay dengganen sakanan adti mata na Tyumanem. Ka-ilangan diliꞌ sakanan mag-inem sa bino aw sa eped pa na inemenen na to-o magpakalangulangu. Matmuꞌ sakanan na Ispiritu Santo pangkay adtu pa sakanan ni seled na buntit na ina nan. 16 Aw madég ya buwadbuwad ni Isra-él na un nan paliku-un adti Tyumanem na kanilan Matas na Pangulu. 17 Ya iseꞌ mu, yan ya muna kanan, aw ya katulus na atag na Ispiritu Santo sa iseꞌ mu, kasiling saba na kan Éliyas. Aw pa-iyuli-en nan ya manga ama aw kanilan manga mangayseꞌ, aw paliku-un nan ya manga utaw na walaꞌ dalug sa pagkaliman na Tyumanem. Magi sa un nan imo-un, matagilan ya manga utaw sa pagdateng na Kristu."*

18 Aw piglongan ni Zakariyas ya anghil, "Unun ku ya pagka-edeꞌ na matinaw ya piglong mu kanak? Bakleg da aku. Aw buyag da uman ya ka͡ubayan ku."

19 Tyumubag kanan ya anghil, "Aku si Gabriyél na gayed mag-indeg adti asdangan na Tyumanem. Pigsuguꞌ aku adi sayid mu na un magpa-edeꞌ sa madyaw na ubat-ubat yeiy. 20 Manang asuntu na walaꞌ mu pangintu-uwi ya kadég na piglong ku, na, ma-umu kaw mendaꞌ na matuman ya kadég na piglong ku kanmu. Aw matuman saba yeiy dun ni allaw na dadan da pigpamalliꞌ na Tyumanem."

21 Na, ya manga utaw na tyumagad kan Zakariyas adti luwaꞌ, nyabelengbeleng silan kun anangaꞌ madugay sakanan adti seled na Balay na Tyumanem. 22 Aw sa pagluwaꞌ da nan, diliꞌ da sakanan magpakapaglong, yanagaw kya-ede-an nilan na awun pigpakitaꞌ na Tyumanem kanan dun ni seled. Aw gayed sakanan migpulingen kanilan na walaꞌ da pakapaglong. 23 Aw sa pagkatigkas da na imo-unun nan dun ni Témplo, nyuliꞌ sakanan adti kanan balay. 24 Sa paglabay da na pilangallaw, nyabdes si Élisabét. Aw seled na limambulan walaꞌ sakanan luwaꞌ adti balay nilan, aw miglong adti anenganeng nan, 25 "Pigkallatan aku na Tyumanem. Pigkamang nan adi kanak ya kamulamula ku adti manga utaw."

26 Na, sa enemembulan da na pagkabdes ni Élisabét, pigsuguꞌ na Tyumanem ya anghil na si Gabriyél adti lunsud na Nazarit, sakup na Galiliya, 27 na madtu ni sambuk na ka͡ubayan na walaꞌ pa ka-ilabeti na eseg. Ya ngalan nan si Maria. Ya tawas nan si José na buwadbuwad ni Dabid na hariꞌ asini muna. 28 Aw sa pagdateng na anghil adti kan Maria, miglong sakanan, "Pagleya kaw kay ya Tyumanem to-o migpakadyaw kanmu, aw gayed kaw nan pig-agadan." 29 Pagdengeg ni Maria seiy, nyabelengbeleng sakanan aw gayed nan pig-anenganeng kun unu ya kakawasan na piglong na anghil. 30 Aw miglong ya anghil kanan, "Diliꞌ kaw magkallek, kay Maria, kay kyatutukan ya Tyumanem kanmu. 31 Pakanyegi ya un ku paglongun kanmu: Diliꞌ madugay, mabdes kaw aw mag-iseꞌ sa eseg, aw ngalanan mu sakanan na Jisus. 32 To-o sakanan dengganen, aw pagtawagen sakanan na Iseꞌ na Tyumanem na To-o Matas, aw imo-un sakanan na Tyumanem hariꞌ kasiling na tyugbulan nan na si Dabid. 33 Aw maghariꞌ sakanan sa manga buwadbuwad ni Jakub* na walaꞌ ya tyamanan. Aw ya Kasakupan na un nan hari-an, walaꞌ ya katigkasan."

34 Aw nyusip si Maria sa anghil, "Unun ya pagka-imoꞌ na kadég yeiy na walaꞌ pa ya eseg ku?" 35 Aw tyumubag ya anghil, "Ya Ispiritu Santo un lumugsad dun ni kanmu aw kalandungan kaw na katulus na Tyumanem na To-o Matas. Yanagaw ya iseꞌ na un ma͡utaw dun ni kanmu, walaꞌ ya salaꞌ dun ni kanan, aw pagtawagen sakanan na Iseꞌ na Tyumanem. 36 Na, ya kadégan mu uman na si Élisabét, pangkay madég ya miglong na diliꞌ sakanan magpaka-iseꞌ, manang nyabdes da sakanan sa iseꞌ nan na eseg, aw enemembulan da ya kabdesan nan. 37 Kay adti Tyumanem, walaꞌ saba ya diliꞌ nan mabatug."

38 Aw miglong si Maria, "Sugu-anen aku saba na Tyumanem. Madyaw beg galu aw matuman ya piglong mu adi kanak." Pagkatigkas yan, pig-indegan sakanan na anghil.

39 Na, walaꞌ kadugay, nyanigpes si Maria aw nyaksay nyadtu ni lunsud adti kabuntudan dun ni banwa na Judiya.* 40 Pagdateng nan dun, syumeled sakanan adti balay ni Zakariyas aw nyangumusta kan Élisabét. 41 Aw sa pagdengeg ni Élisabét sa pangumusta ni Maria, mig-inang ya iseꞌ adti buntit nan. Aw nyatmuꞌ si Élisabét na Ispiritu Santo 42 aw miglong sa mabagseg na tingeg, "Kay Maria, madyaw ya kanmu! Sa kadég na manga ka͡ubayan, ikaw ya to-o pigpakadyaw na Tyumanem, aw maynan uman ya iseꞌ na un ma͡utaw dun ni kanmu. 43 To-o uman madyaw ya kanak kay piglabaꞌ aku na ina na kanak Matas na Pangulu. 44 Kay pagdengeg ku sa pagpangumusta mu, mig-inang ya iseꞌ adi buntit ku kay to-o sakanan migleya. 45 Aw madyaw ya kanmu kay pyangintu-uwan mu na tumanen saba na Tyumanem ya kadég na piglong nan kanmu."

46 Aw miglong si Maria,

"Pigdeyen ku ya Tyumanem sa kadakulaꞌ na kanak ginawa aw kanak anenganeng,

47 aw dakulaꞌ uman ya kanak pagleya asuntu na Magpaluwa-ay sakanan.

48 Kay pig-anenganeng aku nan pangkay madalem aku na kanan sugu-anen.

Lekat adun na allaw, madég ya manga utaw na maglong, ‘To-o madyaw ya kan Maria,’

49 kay madég ya mangkadyaw na pigpan-imoꞌ kanak na Tyumanem na To-o Matulus.

Aw walaꞌ ya salaꞌ dun ni Tyumanem.

50 Aw kyallatan nan ya kadég na awun pagkallek kanan pangkay sa manga utaw adun aw sa manga buwadbuwad na dumadateng pa.

51 Pigpakitaꞌ na Tyumanem ya kanan katulus magi sa kadyaw na pig-imoꞌ nan.

Ya manga migpatastas, pig-alilinan nan silan.

52 Pigpapanog nan ya manga hariꞌ adti kanilan trunu.

Aw pigsuguk nan ya manga utaw na madalem.

53 Pigpabiyag nan ya manga utaw na nyangkagetem,

aw pig-alilinan nan ya manga mayaman na walaꞌ ya dyala.

54 Pigtabangan nan ya kanan manga utaw na yan ya manga buwadbuwad ni Isra-él.

Walaꞌ nan kalingawi ya kanan pakang na kallatan nan ya manga utaw nan.

55 Kay asini muna, pigpakangan nan ya kanaten tyugbulan na si Abraham aw ya manga buwadbuwad nan

na kallatan nan ya kadég tadun na walaꞌ ya katigkasan."

56 Aw nyeyaꞌ pa si Maria dun ni tampid ni Élisabét seled na tulumbulan, aw pagkatigkas yan, nyuliꞌ da sakanan adti balay nan.

57 Na, dyumateng ya allaw na kya͡utawan da si Élisabét, aw mig-iseꞌ sakanan sa iseꞌ na eseg. 58 Sa pagpakadengeg na manga sumbalay nan aw kanan kadégan na to-o sakanan kyallatan na Tyumanem, ya kadég nilan nyagad kanan migleya.

59 Aw sa walungallaw da na iseꞌ, nyadtu silan kay un patuliꞌ ya iseꞌ. Aw kaliman nilan galu ngalanan ya iseꞌ na si Zakariyas kasiling na ngalan na ama nan. 60 Manang walaꞌ kalim si Élisabét, aw miglong sakanan, "Si Juan ya pagngalan kanan!" 61 Aw miglong silan, "Walaꞌ ya kadégan mayu na maynan ya ngalan!" 62 Aw pigpulingenan nilan ya ama na iseꞌ kun unu ya kaliman nan pagngalan sa iseꞌ nan. 63 Aw migpulingen uman si Zakariyas na atagan sakanan na sulatanan aw yan ya pigsulat nan: "Juan ya pagngalan kanan." Aw nyabelengbeleng ya kadég nilan. 64 Aw tigkan nyakapaglong da si Zakariyas aw pigdeyen nan ya Tyumanem. 65 Aw yanagaw nyangkallek ya kadég na sumbalay nilan. Aw ya nyangka-imoꞌ yeiy alag nyabekkal adti kadakulaꞌ na kabuntudan na Judiya. 66 Aw ya kadég na manga utaw na nyakadengeg seiy, nyaka-usip silan adti kanilan anenganeng, law nilan, "Unu ya un datengan na iseꞌ yeiy kun magkadakulaꞌ da sakanan?" Kay nyabangal da na awun ni kanan ya Tyumanem.

67 Aw si Zakariyas na ama ni Juan nyatmuꞌ na Ispiritu Santo, aw mig-ubat-ubat sakanan sa pigpa-edeꞌ na Tyumanem:

68 "Deyen tadun ya Matas na Pangulu na yan ya Tyumanem na manga utaw na Isra-él!

Kay nyadi la sakanan aw pigpalekat da nan ya pagpaluwaꞌ sa kanan manga utaw.

69 Migpadala sakanan asini kanaten sa Magpaluwa-ay na to-o matulus

na lekat adti manga buwadbuwad ni Dabid na sugu-anen na Tyumanem,

70 kasiling na pigpa-edeꞌ nan asini muna magi sa kanan manga propita.

71 Aw pigpakang nan na un nan kitadun paluwa-en lekat adti kanaten manga po-on

aw adti pagdumala na kadég na migkalat kanaten sa ginawa.

72 Piglong nan uman na pakitaꞌ nan ya kanan kallat na pigpakang nan adti kanaten manga tyugbulan.

Aw diliꞌ nan kalingawan ya pakang nan kanaten na dayaw mig-iganget 73 na pigsapaꞌ nan adti kan Abraham na tyugbulan tadun,

74 na un nan kitadun paluwa-en lekat adti kanaten manga po-on,

pada mabatug da tadun ya pagsimba kanan na walaꞌ ya kakallekan.

75 Aw taniyen kitadun adti kanan,

aw dalugun tadun ya kanan pagkaliman adti asdangan nan

sa kadég na allaw na pag-eyaꞌ tadun asini tas na lupaꞌ."

76 Pagkatigkas yan, miglong si Zakariyas adti iseꞌ nan,

"Ikaw kay Toꞌ, pagtawagen kaw na propita na Tyumanem na To-o Matas,

kay ikaw ya un muna sa Matas na Pangulu

pada tagilanen ya un nan agiyan.

77 Pa-ede-en mu ya kanan manga utaw na mabatug da silan paluwa-en

magi sa paglanas nan sa kanilan manga salaꞌ

78 asuntu sa kallat na kanaten Tyumanem.

Aw ya Magpaluwa-ay na un nan padala,

kasiling na sega na bagu syumilat adti silatan

79 na un mag-atag sa kalalamdag adti kadég na nyeyaꞌ dun ni kangitngitan

aw sa manga kyalandungan na alung na kamatayen.

Aw yan ya magpalna-u kanaten sa dalan na un tadun agiyan pasinan adti kalinaw."

80 Aw ya iseꞌ na si Juan tyumulin, aw migkabagseg ya ginawa nan aw migkasalig ya kanan pagpangintu-u. Aw nyeyaꞌ sakanan adti kaligbinan na oloꞌ nan sayda mendaꞌ sa allaw na migpalekat sakanan migpalna-u sa manga utaw na Isra-él.