1 Na, sambuk na allaw, migpalna-u si Jisus sa manga utaw dun ni pamanag na Témplo aw migpa-edeꞌ sa Madyaw na Ubat-ubat. Aw dyumulud kanan ya manga mangkatas na magdadugsu-ay, aw ya manga magpalna-uway sa Uldin, aw manga magdadumala͡ay sa manga Judiyu. 2 Aw nyusip silan kanan, "Ubatan kanami: Unu ya katundanan mu na imo-un mu ya kadég yeiy? Aw singalan kaꞌ ya nyatag kanmu sa katundanan yan?" 3 Aw miglong si Jisus kanilan, "Usipen ta kamu uman. Ubatan mayu kanak kun 4 ayin lekat ya katundanan ni Juan sa pagba͡utismu nan sa manga utaw? Unu, lekat adti Tyumanem aw oloꞌ lekat adti utaw?" 5 Aw mig-usip-usipay silan, "Unu ya un tadun tubag kanan? Kun tubagen tadun na ‘lekat adti Tyumanem,’ maglong sakanan kanaten, ‘Anangaꞌ walaꞌ kamu pangintu-u kanan?’ 6 Manang kun tubagen tadun uman ‘lekat adti utaw,’ na, pamintuwun kitadun baling na manga utaw na batu, kay pyangintu-uwan nilan na si Juan propita sakanan na Tyumanem." 7 Yanagaw tyumubag silan kan Jisus, "Enday, walaꞌ nami ka-ede-i." 8 Aw miglong si Jisus kanilan, "Diliꞌ ta kamu uman ubatan kun singalan ya nyatag kanak sa katundanan na ma-imoꞌ ku ya maynan."

9 Aw migpalekat si Jisus mig-ubat-ubat sa pundinganan adti manga utaw, "Awun sambuk na eseg na migpatanem sa madég na balagen na paras adti lupaꞌ nan, aw pigpasa-up nan ya parasan aw nyadtu sakanan adti sambuk na banwa aw nyeyaꞌ pa dun na madugay. 10 Pagdateng na allaw na migpa-ipuꞌ da sa bunga na paras, pigsuguꞌ na tagtun ya sambuk na kanan sugu-anen adti manga pigpasa-up nan sa parasan kay kaliman nan kamangen ya kanan bagiꞌ. Manang pagdateng na sugu-anen nan dun, byadasan nilan pyanumbag, aw pigpa-uliꞌ nilan na walaꞌ ya dyala. 11 Aw migsuguꞌ da uman ya tagtun sa sambuk na sugu-anen nan. Manang byadasan nilan pyanumbag aw pigmulamula. Aw pigpa-uliꞌ nilan na walaꞌ ya dyala. 12 Tigkas yan, pigsuguꞌ nan uman ya katlu na sugu-anen nan, manang pigpali-an nilan baling aw pig-alilinan. 13 Pagkatigkas yan, miglong ya tagtun sa parasan, ‘Unu la ya un ku imo-un? Na, sugu-un ku baling ya kanak iseꞌ na eseg na to-o ku pigginawa͡an pagaw yeiy ya basa͡an nilan.’ 14 Manang sa pagkitaꞌ na manga sa-up kanan, migbalawbalaw silan na maglong, ‘Ini la ya iseꞌ na tagtun! Na! Naten sakanan patayen pada matagtun da tadun ya parasan na un ayawan kanan.’ 15 Aw pigdala nilan sakanan adti luwaꞌ na parasan aw pigpatay nilan."

Aw nyusip si Jisus sa manga utaw, "Na, unu ya imo-un na tagtun sa parasan sa manga utaw na pigpasa-up nan? 16 Kadtuwan nan saba silan aw alag nan pamatayen! Aw pasa-up nan ya parasan adti eped na manga utaw." Pagkatigkas ni Jisus maglong sa pundinganan yeiy, miglong ya manga utaw na migpakanyeg, "Diliꞌ yan tumbay na Tyumanem!"

17 Manang nyinunu si Jisus kanilan aw nyusip, "Kun maynan, unu saba ya kakawasan na pigpasulat ini na Tyumanem? ‘Ya dakulaꞌ na batu na iman na manga panday aw walaꞌ ya guna, yan baling ya batu na sumalem na nya-imoꞌ tullukanan sa balay.’* 18 Ya utaw na pagsungkul adti batu yan aw pakadakdak, madugdug sakanan. Aw ya pangkay singalan na kolugan na batu yan, madupuk saba."

19 Ya manga magpalna-uway sa Uldin aw manga mangkatas na magdadugsu-ay, sa pagdengeg nilan sa pundinganan ni Jisus, kaliman nilan galu dakepen sakanan, kay kya-ede-an nilan na silan ya pigpalabet dun ni pundinganan nan. Manang nyallek silan sa manga utaw dun. 20 Yanagaw gayed nilan pigbantayan si Jisus aw migsuguꞌ silan sa manga utaw na un manilib na sallong kunu madyaw ya tud nilan. Manang yan ya tengteng tud nilan na kalitagan si Jisus dun ni tubag nan, pada awun kalimanda nilan kanan aw tumbay adti gubirnador. 21 Aw nyusip ya manga nyanilib kan Jisus, "Kay Magpalna-uway, kya-ede-an nami na ya kadég na piglong aw pigpalna-u mu alag matinaw aw walaꞌ ya pigkibang mu. Aw gayed mu pigpalna-u ya tengteng pagkaliman na Tyumanem. 22 Yanagaw, awun usip nami kanmu: Unu, umbaꞌ kanaten na manga Judiyu ya pagbayad sa buwis adti kan César aw ya diliꞌ?" 23 Manang kya-ede-an ni Jisus ya kapandayan nilan, aw piglongan nan silan, 24 "Pakita͡an kanak ya kuwalta. Kan yeiy gya ya ini? Aw kan yeiy uman ngalan ya nyakasulat asini?" Tyumubag silan, "Kan César."* 25 Aw miglong si Jisus kanilan, "Na, atagan mayu adti kan César ya umbaꞌ kan César aw atagan adti Tyumanem ya umbaꞌ sa Tyumanem." 26 Yanagaw dun ni asdangan na kadég na manga utaw walaꞌ nilan kabatug kalitagi si Jisus dun ni tubag nan. Manang nya-enneng-enneng silan baling sa tubag nan aw nyatinep da silan.

27 Na, awun dyumulud kan Jisus na manga Sadusiyo. Ya manga utaw yeiy walaꞌ silan pangintu-u na awun pagkataw na manga utaw lekat adti pagkamatay. 28 Yanagaw miglong silan kanan, "Kay Magpalna-uway, pigsulat kanaten ni Moysis ya suguꞌ yeiy adti Uldin tadun: ‘Kun awun eseg na nyatay, aw kun walaꞌ silan ya ka͡ubayan nan paka-iseꞌ, ka-ilangan ya nyabalu pangugnanen na inulug na eseg nan pada ya mangayseꞌ nilan ma-imoꞌ da buwadbuwad na eseg na nyatay da.’* 29 Na, awun pitu ya mangkaylug na eseg. Ya magulang sa kadég nilan nyangugnan sa ka͡ubayan, manang nyatay ya eseg yan na walaꞌ silan paka-iseꞌ. 30 Yanagaw ya balu pigpangugnan na mangud na eseg nan, aw nyatay da uman ya eseg yan na walaꞌ silan paka-iseꞌ. 31 Aw maynan uman ya nya-imoꞌ adti katlu taman adti kapitu, alag silan nyatay na walaꞌ paka-iseꞌ. 32 Pagkatigkas yan, nyatay da uman ya ka͡ubayan. 33 Na, kun dumateng ya allaw na panmatawun ya manga utaw lekat adti nyangkamatay, singalan ya tengteng eseg na ka͡ubayan yan? Kay awun pitu ya eseg na nyangugnan kanan."

34 Aw tyumubag si Jisus kanilan, "Adun na manga allaw yeiy, nyampangugnan ya manga utaw asini tas na lupaꞌ. 35 Manang kagaya moli na allaw, dun ni Kasakupan na Tyumanem, ya manga utaw na umbaꞌ nan panmatawun lekat adti nyangkamatay, diliꞌ da silan mangugnan. 36 Aw diliꞌ da silan matay, kasiling na manga anghil. Silan saba ya mangayseꞌ na Tyumanem na pigmataw da. 37 Pangkay ya pigsulat ni Moysis sa pagtawag kanan na Tyumanem lekat adti tagbiꞌ na kawuy na lyumaga, dun nan bangala na mataw uman salut ya manga utaw. Miglong ya Tyumanem kan Moysis, ‘Aku ya Tyumanem ni Abraham aw ya Tyumanem ni Isa-ak aw ya Tyumanem ni Jakub.’ * 38 Yan ya kakawasan nan, pangkay nyatay da silan manang adti asdangan na Tyumanem kenneꞌ na utaw pa silan." 39 Aw awun manga magpalna-uway sa Uldin na miglong, "Kay Magpalna-uway, madyaw saba ya tubag mu." 40 Aw walaꞌ da silan paka-eles usip kanan.

41 Pagkatigkas yan, miglong si Jisus kanilan, "Anangaꞌ silan gayed maglong na ya Misiyas, yan ya buwadbuwad ni Dabid? 42 Si Dabid saba ya migsulat asini muna dun ni libru na Manga Salmo, law nan:

‘Miglong ya Tyumanem adti kanaken Matas na Pangulu:

"Ingkud kaw apit adi kalintu ku

43 mendaꞌ na mabus ku degen ya manga po-on mu aw alag ku silan betang adti salad na manga siki mu." ’*

44 Na, dun da si Dabid paglong na ya Misiyas yan ya kanan Matas na Pangulu. Yanagaw kun pigtawag ni Dabid ya Misiyas na ‘Matas na Pangulu,’ pig-unu na Misiyas ya pagka-imoꞌ buwadbuwad ni Dabid?"

45 Aw sa talana pa migpakanyeg kanan ya madég na utaw, miglong si Jisus adti kanan manga umagakan, 46 "Magpakatadeng kamu sa manga magpalna-uway sa Uldin. Magkalim silan magsut sa malawig na sa-ul. Aw magleya silan kun pagbasa͡an silan adti palingki. Aw dun uman ni manga sinagoga aw manga dakulaꞌ na pista, pagkaliman nilan ya mag-ingkud adti pag-ingkudan na manga utaw na dengganen. 47 Madugay silan magpanawagtawag pada kita-en na manga utaw, manang pig-agaw baling nilan ya ka-unan na manga balu. Ya manga utaw yeiy, to-o mabegat ya pa-emel-emel na Tyumanem kanilan."