1 Pagkatigkas na kadég yeiy, nyamalliꞌ pa uman si Jisus sa kapituwan tag duwa (72) ya utaw. Aw pigsuguꞌ nan silan na tag duwaduwa pada muna kanan adti manga lunsud aw kadég na manga banwa na un nan kadtuwan. 2 Aw sa walaꞌ pa silan indeg, miglong sakanan kanilan, "Dakulaꞌ to-o ya aniyenen, manang tabay ya mag-aniyay. Yanagaw panawagtawag kamu adti Tyumanem na yan ya tagtun sa palangad aniyenen, pada magpadala sakanan sa manga mag-aniyay. 3 Na, panaw da kamu. Manang pakanyegi ya un ku paglongun kamayu: Sugu-un ta kamu adti manga utaw na mangkalatay ya bet. Kasiling kamu saba na manga nati na karniro na piglibedan na manga malyaw na iduꞌ na to-o mangkabulut. 4 Diliꞌ kamu magdala sa kuwalta, aw kabil, aw sandal. Diliꞌ kamu magteneng dun ni dalan na un mangumusta sa utaw, pada diliꞌ kamu masalang. 5 Pangkay kanyan balay ya datengan mayu, maynini ya una mayu paglongun kanilan: ‘Atagan na kalinaw ya kadég na utaw asini balay ini.’ 6 Aw kun kaliman nilan dumawat sa kalinaw na piglong mayu, atagan saba silan na Tyumanem na kalinaw. Manang kun diliꞌ silan dumawat, diliꞌ uman silan atagan. 7 Aw kun mamasa silan kamayu, dun da kamu pag-eyaꞌ aw diliꞌ kamu mag-alin-alin. Sumambuk kamu kanilan kuman aw minem. Aw pangkay unu ya pakan aw pa-inem nilan kamayu, dawata mayu kay ya utaw na migtalabahu umbaꞌ saba sakanan tandanan. 8 Kun dumateng kamu adti sambuk na lunsud aw dawaten kamu nilan, pangkay unu ya pakan nilan kamayu, kana mayu. 9 Pangguli-a mayu ya magkedel na manga utaw dun ni lunsud aw paglonga mayu silan, ‘Malapit da adti kamayu ya Paghariꞌ na Tyumanem sa Kasakupan nan.’ 10 Manang pangkay kinunu kamu dateng adti sambuk na lunsud aw diliꞌ kamu nilan dawaten, na, kadtu kamu baling ni manga dalan adti lunsud yan aw paglonga mayu silan, 11 ‘Pangkay ya alikabuk na lunsud mayu na dyumeket asini siki nami, un nami taptapen. Manang anenganenga mayu ya ini: Malapit da ya Paghariꞌ na Tyumanem sa Kasakupan nan.’ " 12 Aw miglong pa si Jisus kanilan, "Paglongun ta kamu, dun ni allaw na pag-ukum na Tyumanem kagaya, to-o pa mabegat ya pa-emel-emel nan sa manga lunsud na diliꞌ dumawat kamayu kay sa pagpa-emel-emel nan sa manga utaw adti Sodoma!"

13 Aw miglong pa uman si Jisus, "Yanagaw, paglonga ya manga utaw na walaꞌ pangintu-u na mig-eyaꞌ adti manga lunsud na Korazin aw Bétsayda na magpakatanaw silan! Kay kun kenneꞌ pa aku nilan kele͡an, diliꞌ silan kallatan na Tyumanem. Kay kyinitaꞌ da nilan ya madég na pigpan-imoꞌ ku na mabatug oloꞌ magi sa katulus na Tyumanem manang tabay kanilan ya migselsel. Kun pig-imoꞌ pa ku yeiy adti manga lunsud na Tiro aw Sidon, madugay da galu saba magselsel ya manga utaw adtu aw sumut sa kayab na saku aw magsabug silan sa abu adti lawas nilan na pangilala sa pagselsel nilan. 14 Yanagaw to-o pa baling mabegat ya pa-emel-emel na Tyumanem adti manga lunsud na Korazin aw Bétsayda kay sa Tiro aw Sidon. 15 Aw silan na mig-eyaꞌ adti Kapirna-um, iman na manga eped kanilan na ma-imoꞌ silan dengganen na walaꞌ ya maka-unawa pangkay adti tas na langit. Manang padalemen silan baling aw dala͡en adti banwa na Kaludukan."*

16 Pagkatigkas yan, miglong si Jisus adti manga umagakan nan, "Ya magpakanyeg kamayu, aku saba uman ya pigpakanyegan nilan. Aw ya kumele kamayu, aku ya tengteng pigkele͡an nilan. Aw ya kyumele kanak, kyumele uman sa migpadala kanak."

17 Na, lyumikuꞌ da ya kapituwan tag duwa (72) ya pigsuguꞌ ni Jisus, aw to-o silan migleya. Aw miglong silan, "Kay Magpalna-uway, pangkay ya manga busaw pigka͡agadan kami nilan dun ni pag-alilin nami magi sa kanmu ngalan!" 18 Aw miglong si Jisus kanilan, "Kyinitaꞌ ku saba si Satanas na biglaꞌ nyolug lekat adti langit kasiling na kilat. 19 Na, pakanyegi ya un ku kamayu paglongun: Pig-atagan ku kamu sa katundanan pada degen ya katulus ni Satanas, aw pangkay kun makaginaꞌ kamu sa manga ulud aw manga sangalan, diliꞌ kamu ma-unu. 20 Manang diliꞌ mayu pagleya͡an na pigka͡agadan kamu na manga busaw, yan baling ya pagleya͡an mayu na nyasulat da ya kamayu manga ngalan adti tas na langit."

21 Na, idtu na udas yan, pigpaleya si Jisus na Ispiritu Santo aw nyanawagtawag sakanan, law nan, "Kay Ama, ikaw ya tagtun sa kadég na awun ni tas na langit aw asini kadakulaꞌ na banwa. Pigpasalamatan ta kaw kay pigtaguꞌ mu ya kanmu palpa lekat adti manga utaw na matas kunu ya katadeng manang pigbukasan mu baling adti manga utaw na syumalig kanmu kasiling na tagbiꞌ na iseꞌ. Yeiy saba kay Ama ya kanmu pagkaliman."

22 Pagkatigkas yan, miglong si Jisus adti manga utaw, "Pigtumbay da na Ama adi kanak ya kadég. Ya kanaken Ama, yan oloꞌ ya nyaka-edeꞌ kanak. Aw aku oloꞌ ya nyaka-edeꞌ kanan, aw pangkay singalan uman na tumbay ku na maka-edeꞌ sa Ama, bukasan adti kanilan ya pagpaka-edeꞌ kanan."

23 Aw nyatubang si Jisus adti manga umagakan nan, aw miglong kanilan, "Madyaw ya kamayu kay kyinitaꞌ da mayu ya pigpan-imoꞌ ku! 24 Paglongun ta kamu na awun madég na manga propita na Tyumanem aw manga hariꞌ asini muna na kaliman nilan galu kita-en ya kyinitaꞌ da mayu, aw kaliman nilan galu dengegen ya dyengeg da mayu, manang walaꞌ nilan kita-a aw walaꞌ nilan dengega."

25 Na, ya sambuk na magpalna-uway sa Uldin, kaliman nan tanda-en si Jisus magi sa usip. Yanagaw nyindeg sakanan aw miglong, "Kay Magpalna-uway, unu ya ka-ilangan ku imo-un pada matagtun ku ya ginawa na walaꞌ ya katigkasan?" 26 Aw tyumubag si Jisus kanan, "Unu ya awun ni Uldin na pigpasulat na Tyumanem? Unu ya kyalabetan mu lekat adti pigbasa mu?" 27 Aw tyumubag ya magpalna-uway, "Yan ya nyakasulat dun ni Uldin na ‘Ginawa͡an mu ya kanmu Tyumanem sa kadakulaꞌ na pagka-utawun mu, aw sa kadakulaꞌ na ginawa mu, aw sa kadakulaꞌ na kabagseg mu, aw sa kadakulaꞌ na anenganeng mu,’* aw ‘Ginawayi ya sumbalay mu kasiling na pagginawa mu sa kanmu pagka-utawun.’ "* 28 Aw miglong si Jisus kanan, "Matinaw saba ya tubag mu. Kun imo-un mu yeiy, matagtun mu ya ginawa na walaꞌ ya katigkasan."

29 Manang diliꞌ malim ya magpalna-uway sa Uldin na mamulamula sakanan, yanagaw pig-usip pa nan uman si Jisus, "Singalan ya sumbalay ku na umbaꞌ ku ginawa͡an?" 30 Aw tyumubag si Jisus magi sa pundinganan, "Awun sambuk na utaw na Judiyu na tyumubang lekat adti Jérusalim na migpasinan adti Jériko. Talana nan nyanaw, byanganan sakanan na manga mangkatakaw. Pigluwasan nilan sa kadégkadég aw pyangamang nilan ya manga pametang nan. Aw tigkas yan, pigbadasan nilan pyamunalan aw pig-ayawan nilan na dakman tag sambuk ya ginawa. 31 Yan uman na udas, nyaka-agi dun ya sambuk na magdadugsu-ay na lekat adti Témplo na Tyumanem. Sa pagkitaꞌ nan sa utaw na nyakakulang adti kilid na dalan, pig-aliwes nan baling aw nyagi adti sangkilid na dalan. 32 Maynan uman ya sambuk na buwadbuwad ni Libi na magtabang sa imo-unun adti Témplo. Sa pagkitaꞌ nan sa utaw na nyakakulang dun ni kilid na dalan, pig-aliwes nan uman. 33 Manang awun uman sambuk na utaw na Samariyanen* na nyaka-agi dun ni dalan. Aw sa pagkitaꞌ nan sa utaw na nyakakulang, to-o sakanan nyallat. 34 Yanagaw, pigdulud nan ya utaw aw pigbulung nan. Pig-asagan nan na bino aw lana ya manga paliꞌ aw dayaw nan bedbedi. Tigkas yan, syagupu nan aw pigpasakay adti kanan asnu aw pigdala nan adti balay na bantukanan aw to-o nan pigdiyaga͡an. 35 Pagkasalut da na allaw, pig-atagan nan ya tagtun sa balay na duwangka dinariyo ya kuwalta aw law nan, ‘Dayaw kanak diyagayi ya utaw ini. Aw kun diliꞌ pa maka-umbaꞌ ya pigbayad ku kanmu, sa paglikuꞌ ku asini dugangan da ku.’ "Ya pundinganan ni Jisus sa utaw na magkallat sa eped nan na utaw

36 Pagkatigkas ni Jisus maglong sa pundinganan, pig-usip nan ya magpalna-uway sa Uldin, "Na, dun ni kanmu anenganeng, ayin sa tulu kanilan ya tengteng mig-imoꞌ sa pag-imo-un na sumbalay nan?" 37 Aw tyumubag ya magpalna-uway, "Ya idtu na nyallat kanan." Aw miglong si Jisus, "Yanagaw, imo-a uman ya maynan."

38 Migpadeleg si Jisus nyanaw aw ya kanan manga umagakan aw dyumateng silan adti sambuk na baranggay. Awun sambuk na ka͡ubayan na nyamasa kan Jisus adti balay nan, aw ya ngalan nan si Marta. 39 Na, si Marta awun mangud nan na si Maria. Aw si Maria, nyingkud sakanan adti sayid ni Jisus aw to-o migpakanyeg sa palna-u nan. 40 Manang si Marta, nyasagunut to-o ya kanan anenganeng asuntu sa kadég na imo-unun nan sa pagsanggilaꞌ kanilan. Yanagaw dyumulud si Marta adti kan Jisus aw miglong, "Kay Magpalna-uway, unu, pabaya-an da mu gayed si Maria na diliꞌ aku nan tabangan sa manga imo-unun ku?" 41 Manang tyumubag si Jisus kanan, "Kay Marta, tay sa kadég na pig-anenganeng mu! 42 Sambuk da saba oloꞌ ya ka-ilangan aw yan ya pigpamalliꞌ ni Maria. Aw diliꞌ saba makamang lekat adti kanan."