1 Na, talana ni Jisus migpalna-u sa madég na utaw, awun utaw dun na mig-ubat kanan sa nya-imoꞌ sa manga taga Galiliya na pigpapatay ni Pilato talana nilan migdugsuꞌ sa manga ayep adti Tyumanem. 2 Aw nyusip si Jisus kanilan, "Unu, mig-anenganeng kamu na yan ya du-an na malatay ya kyagamakan nilan kay to-o pa silan makasasalaꞌ kay sa manga eped na taga Galiliya? 3 Bekeꞌ saba! Manang paglongun ta kamu: Kun diliꞌ mayu selselan ya kamayu manga salaꞌ, malatay uman ya un mayu datengan. 4 Aw unu ya anenganeng mayu sa sampuluꞌ tag walu (18) ya utaw na nyangkamatay asuntu na kyagettanan silan na torré na Silo-am? Pagaw mig-anenganeng kamu uman na to-o pa dakulaꞌ ya kanilan manga salaꞌ kay sa kadég na manga eped na nyeyaꞌ dun ni seled na Jérusalim? 5 Diliꞌ saba! Manang paglongun ta kamu: Maynan uman, malatay ya datengan mayu kun diliꞌ kamu magselsel sa kamayu manga salaꞌ."

6 Tigkas yan, miglong si Jisus kanilan sa pundinganan, "Awun sambuk na utaw na nyakatanem da sa kawuy na igira dun ni kanan parasan. Pagdateng da na bulan na mamunga la, pigkadtuwan nan ya kawuy na igira na un nan tanawun. Manang walaꞌ ya kyinitaꞌ nan na bunga. 7 Yanagaw piglongan nan ya utaw na pigtaliguwan nan migtalabahu dun ni kanan parasan, law nan, ‘Seled da na tulungka͡umay ya pagliku-likuꞌ ku asini migtanaw kun nyamunga ya igira ini, manang walaꞌ ya kyinitaꞌ ku na bunga. Madyaw pa baling utudun da yeiy kay migsapadsapad oloꞌ sa tabaꞌ na lupaꞌ.’ 8 Manang tyumubag ya utaw na pigtaliguwan nan, ‘Kay Sir, pabaya-i pa adun na umay ini. Un pa ku palibedan na kutkut ya punu-an nan aw dayaw abunuwi. 9 Aw kun munga salut na umay, madyaw yan, manang kun diliꞌ, pa-utudan da.’ "

10 Sambuk na Allaw na Paglagdeng, migpalna-u si Jisus adti sinagoga. 11 Aw awun ka͡ubayan dun na nyasakung asuntu na pigpamulayaman na busaw seled da na sampuluꞌ tag walu (18) ya umay aw diliꞌ nan mabatug tuliden ya bagakwang nan. 12 Sa pagkitaꞌ ni Jisus kanan, pigtawag nan sakanan aw piglongan nan, "Kaguli-an da kaw." 13 Aw pigpandungan ni Jisus na kanan palad ya ka͡ubayan, aw dayaw nyatulid ya bagakwang nan aw to-o nan pigdeyen ya Tyumanem. 14 Manang nyadaman ya magdadumala͡ay sa sinagoga, asuntu na migguliꞌ si Jisus sa utaw dun ni Allaw na Paglagdeng. Yanagaw miglong ya magdadumala͡ay adti manga utaw, "Seled na sangka simana, awun enemengallaw na pagtalabahu tadun. Aw yan galu ya manga allaw na pagkadi mayu kun malim kamu kaguli-an, manang diliꞌ galu Allaw na Paglagdeng!" 15 Manang tyumubag si Jisus kanan, "Migtallalingu kamu! Endaꞌ, pangkay singalan kamayu ya awun baka aw asnu, pigtumbay mayu saba na alinen aw pigguyud adti pa-inemanan pangkay Allaw na Paglagdeng. 16 Kun maynan ya pig-imoꞌ mayu sa kamayu manga ayep, na, anangaꞌ walaꞌ mayu tumbayan na paluwa-en ya ka͡ubayan ini sa pagti-is nan pangkay Allaw na Paglagdeng? Buwadbuwad saba sakanan ni Abraham, manang kasiling na pig-eketan sakanan ni Satanas seled na sampuluꞌ tag walu (18) ya umay." 17 Sa paglong ni Jisus seiy, nyamulamula ya manga mig-ampang kanan kay kyatinawan silan. Aw migleya ya kadég na manga utaw sa manga pigpan-imoꞌ nan na to-o madyaw.

18 Pagkatigkas yan, miglong si Jisus, "Unu ya un tadun kapa-unawa͡an sa Kasakupan na Pighari-an na Tyumanem? Aw unu ya madyaw na pundinganan seiy? 19 Ya Kasakupan na Tyumanem kasiling na sambuk na biniꞌ na mustardo* na pigtanem na utaw dun ni tanemanan nan. Tyumulin aw migkatas kasiling na kawuy, aw pigpugadan na manga langgam ya manga sanga nan."

20 Aw miglong pa si Jisus, "Unu pa uman ya un tadun kapa-unawa͡an sa Kasakupan na Pighari-an na Tyumanem? 21 Ya Kasakupan nan kasiling na tagbiꞌ na patulinay na pigdaliꞌ na ka͡ubayan adti dakulaꞌ na harina, aw ya tagbiꞌ na patulinay, yan ya magpatulin sa kadakulaꞌ na harina na pigmasa nan."

22 Aw migpadeleg si Jisus nyanaw pasinan adti Jérusalim, aw migpalna-u sakanan adti manga lunsud aw manga baranggay na kya-agiyan nan. 23 Aw nyusip kan Jisus ya sambuk na utaw, "Kay Magpalna-uway, unu, tabay kaꞌ oloꞌ ya manga utaw na paluwa-en na Tyumanem?" Aw miglong si Jisus kanilan, 24 "Talana na awun pa selat, tibagsegi mayu ya pagseled magi sa suwangan na mapeyet na yan ya agiyanan pasinan adti ginawa na walaꞌ ya katigkasan. Madég galu ya malim sumeled manang diliꞌ da makaseled. 25 Kay paglongun ta kamu: Kun takepen da na tagtun ya tatakep, madég kamayu ya mindeg adti luwaꞌ aw magtatawag na maglong, ‘Kay Sir! Uwangi beg kami!’ Manang tumubag sakanan kamayu, ‘Walaꞌ ta kamu kilala͡a, aw walaꞌ ku uman ka-ede-i kun ayin kamu lekat.’ 26 Pagkatigkas yan, magpalekat kamu maglong, ‘Kay Sir, kami saba ya kyuman aw nyinem dun ni tampid mu. Aw migpalna-u kaw adti banwa nami.’ 27 Manang tumubag sakanan, ‘Walaꞌ ta kamu saba kilala͡a. Aw walaꞌ ku uman ka-ede-i kun ayin kamu lekat. Pagpakawat kamu kanak, kadég mayu na gayed mig-imoꞌ sa malatay!’ 28 Aw kita-en mayu si Abraham aw si Isa-ak aw si Jakub, aw ya kadég na manga propita dun ni seled na Kasakupan na Pighari-an na Tyumanem. Aw to-o kamu magsugaw, aw magsipanguliteb ya untu mayu asuntu na walaꞌ kamu paseleda. 29 Manang madég ya manga Héntil na lekat adti silatan aw adti sallepan aw adti balabagan, aw mingkud silan adti dakulaꞌ na katipun dun ni Kasakupan na Pighari-an na Tyumanem. 30 Pakanyegi mayu: Awun manga utaw na nyakamoli adun manang maka-una silan kagaya. Aw awun uman manga nyaka-una adun manang makamoli silan kagaya."*

31 Na, dun ni udas yan, awun manga Parisiyo na dyumulud kan Jisus aw miglong kanan, "Kaksay kaw palaguy kay kaliman ni Hérodés Antipas na patayen kaw." 32 Manang tyumubag si Jisus kanilan, "Kadtuwi mayu ya utaw yan na gayed maggaway aw magpakalat sa manga utaw. Paglonga mayu sakanan na padelegen ku ya pag-alilin sa manga busaw aw ya pagpangguliꞌ sa manga kyedelan adun na allaw yeiy taman kunallaw. Aw sa katlu na allaw, matigkas ku ya kanak imo-unun. 33 Manang ka-ilangan ku padelegen ya kanak panaw adun aw kunallaw, aw sangkallaw. Kay diliꞌ umbaꞌ patayen ya propita na Tyumanem adti eped na banwa, manang dun oloꞌ ni Jérusalim."

34 Aw migpadeleg pa si Jisus miglong, "Kamu na taga Jérusalim, pigpatay mayu ya manga propita na Tyumanem, aw pigpamintu mayu na batu ya manga pigsuguꞌ nan adti kamayu. Malikit da aku galu magtameng kamayu kasiling na minsaꞌ na migtatawag sa manga unsuy nan na un nan tipunun adti dalem na manga panid nan, manang walaꞌ kamu kalim! 35 Na, un da kamu na Tyumanem pabaya-an. Aw paglongun ta kamu: Diliꞌ da aku mayu kita-en mendaꞌ na dumateng ya allaw na maglong kamu, ‘Ini la ya pigpadala na Tyumanem dun ni kanan ngalan, aw umbaꞌ sakanan deyen!’ " *