1 Pagkatigkas yan, piglongan ni Jisus ya kanan manga umagakan sa pundinganan pada palna-uwan silan na gayed manawagtawag adti Tyumanem aw diliꞌ magkalumay ya ginawa nilan. 2 Yanagaw miglong si Jisus kanilan, "Adti sambuk na syudad awun mag-ukumay na walaꞌ ya pagkallek sa Tyumanem aw walaꞌ uman ya pagpamasa nan sa manga utaw. 3 Dun uman ni syudad yan awun sambuk na ka͡ubayan na balu na gayed migliku-likuꞌ adti asdangan na mag-ukumay aw nyanginayuꞌ kanan, law nan, ‘Tamengi aku beg lekat adti kanak po-on, aw pakadyawa ya pag-usay kanami.’ 4 Na, madugay pigpalipaslipasan na mag-ukumay ya pigsekat nan, manang sa kadugayan nyilab sakanan sa pagpanginayuꞌ na balu, aw miglong adti anenganeng nan, ‘Pangkay walaꞌ ya pagkallek ku sa Tyumanem aw walaꞌ ya pagpamasa ku sa manga utaw, 5 manang asuntu na gayed gyumelgel kanak ya balu ini, yanagaw tamengan ku sakanan. Kay kun diliꞌ ku imo-un yeiy, gayed pa aku nan liku-liku-an aw mabus baling ya kanak pasinsiya.’ " 6 Aw miglong pa uman si Jisus adti kanilan, "Anenganenga mayu ya piglong na mag-ukumay na walaꞌ dalug sa pagkaliman na Tyumanem. 7 Aw dakulaꞌ pa saba dun ya pagtameng na Tyumanem sa manga utaw na pigpamalliꞌ da nan na nyanginayuꞌ kanan allaw aw gabi. Aw diliꞌ nan pakadugayen ya manga pigsekat nilan. 8 Paglongun ta kamu, maksay nan saba silan tabangan. Manang aku na Iseꞌ na Utaw, sa paglikuꞌ ku kagaya asini tas na lupaꞌ, unu, awun pa kaꞌ kita-en ku na manga utaw na awun pagpangintu-u?"

9 Na, awun manga utaw na migpatastas kay adti kanilan anenganeng walaꞌ ya salaꞌ nilan, manang pigna-naꞌ nilan ya kanilan manga eped. Yanagaw pig-ubat-ubatan silan ni Jisus sa pundinganan, 10 law nan, "Awun duwa ya utaw na nyadtu ni Témplo na un manawagtawag adti Tyumanem. Ya sambuk Parisiyo aw ya sambuk mangungubla͡ay sa buwis. 11 Nyindeg ya Parisiyo na sayda nan, aw maynini ya kanan pagpanawagtawag: ‘Kay Tyumanem, to-o aku migpasalamat kanmu na diliꞌ aku kasiling na manga utaw na matilimbungay aw malatay ya bet aw maglakadenen, aw diliꞌ aku kasiling na utaw iyan na mangungubla͡ay sa buwis. 12 Kada simana makadwa aku magpuwasa. Aw nyatag aku kanmu sa kasampuluꞌ na kadakulaꞌ na pagkamangan ku.’ 13 Manang ya mangungubla͡ay sa buwis nyindeg adti mawatawat, aw walaꞌ sakanan langad adti langit. Pigbug nan baling ya aba nan kay to-o sakanan migselsel aw nyanawagtawag, law nan, ‘We… Tyumanem, kallati beg aku kay makasasalaꞌ aku.’ 14 Paglongun ta kamu: Pagsi-uliꞌ da nilan, ya mangungubla͡ay sa buwis yan oloꞌ ya pigdawat na Tyumanem kasiling na walaꞌ da ya salaꞌ, aw bekeꞌ na Parisiyo. Kay pangkay singalan ya magpatastas, padalemen saba, aw ya utaw na magpadalem, patasen sakanan."

15 Na, sambuk na allaw, awun manga utaw na nyandala adti kan Jisus sa mangkayantek na mangayseꞌ nilan na un nan silan pan-awidan pada atagan silan na kadyawan. Manang sa pagkitaꞌ na manga umagakan nan, pigsagda nilan baling ya manga utaw na nyandala sa manga mangayseꞌ nilan. 16 Manang pigtawag ni Jisus ya manga mangayseꞌ, aw piglongan nan ya kanan manga umagakan, "Pakadiya kanak ya manga mangayseꞌ aw ya-i mayu silan pagtageni! Kay ya manga utaw na dyumawat kanak kasiling na manga mangayseꞌ ini, silan saba ya maka-akup adti Kasakupan na Pighari-an na Tyumanem. 17 Matinaw saba ya un ku paglongun kamayu: Pangkay singalan ya diliꞌ malim dumawat kanak kasiling na pagdawat kanak na manga mangayseꞌ ini, diliꞌ saba silan makaseled adti Kasakupan na Pighari-an na Tyumanem."

18 Na, nyusip kan Jisus ya sambuk na malangkaw na manga Judiyu, "Kay Magpalna-uway na to-o madyaw, unu ya ka-ilangan ku imo-un pada matagtun ku ya ginawa na walaꞌ ya katigkasan?" 19 Aw tyumubag si Jisus kanan, "Anangaꞌ aku mu tawagen na madyaw? Walaꞌ saba ya utaw na madyaw. Sambuk da oloꞌ ya tengteng madyaw, aw yan ya Tyumanem. 20 Na, kya-ede-an mu ya manga suguꞌ dun ni Uldin: ‘Diliꞌ kaw maglakadenen, aw diliꞌ kaw magpatay sa eped na utaw, aw diliꞌ kaw magpanakaw, aw diliꞌ mu pagmatinawun ya galuꞌ adti asdangan na mag-usayay, aw pagbasa͡an mu ya kanmu ama aw ina.’ "* 21 Aw tyumubag ya eseg, law nan, "Alag da ku yeiy pigdalug lekat pa na pagkatagbiꞌ ku." 22 Aw sa pagdengeg ni Jisus sa tubag nan, miglong sakanan, "Dakman sambuk ya imo-un mu: Galina ya kadég na nyatagtun mu. Tigkas yan, atagan ya kuwalta adti manga utaw na walaꞌ ya pagkamangan. Kun imo-un mu yeiy, dun da kaw pagluduk sa ka-unan adti tas na langit. Aw pagkatigkas yan, likuꞌ kaw adi aw dalug kaw kanak." 23 Manang sa pagdengeg nan sa piglong ni Jisus, migkalat ya ginawa nan kay to-o sakanan mayaman.

24 Aw sa pagkitaꞌ ni Jisus na migkalat ya ginawa nan, miglong sakanan, "Malug saba sa utaw na mayaman ya pagpaka-akup adti Kasakupan na Pighari-an na Tyumanem. 25 Molas pa ya pag-agi na ayep na kamilyo adti gawang na dagem kay sa pagpaka-akup na utaw na mayaman dun ni Kasakupan na Pighari-an na Tyumanem." 26 Aw ya manga utaw na nyakadengeg sa piglong ni Jisus, nyusip silan kanan, "Na, kun maynan, singalan kaꞌ ya paluwa-en na Tyumanem?" 27 Aw tyumubag si Jisus, "Ya diliꞌ mabatug na utaw mabatug saba na Tyumanem."

28 Aw miglong si Pédro kanan, "Inunuwa ya kanami ini! Nyabus da nami pig-ayawan ya kadég na nyatagtun nami pada magad kanmu." 29 Aw miglong si Jisus kanilan, "Matinaw ya un ku paglongun kamayu: Pangkay singalan ya mag-ayaw sa balay nan, aw sa ka͡ubayan nan, aw kaylug nan aw mangkatikadeng nan aw mangayseꞌ nan, asuntu sa Kasakupan na Pighari-an na Tyumanem, 30 na, makadawat ya utaw yan asini tas na lupaꞌ sa to-o pa madég kay sa idtu na pig-ayawan nan. Aw matagtun nan uman ya ginawa na walaꞌ ya katigkasan."

31 Pagkatigkas yan, pigtani ni Jisus ya sampuluꞌ tag duwa (12) ya umagakan nan aw piglongan nan silan, "Pada ka-ede-an mayu, migpasinan da kitadun adti Jérusalim aw adtu la katuman ya kadakulaꞌ na pigsulat na manga propita sa ma-imoꞌ kanak na Iseꞌ na Utaw. 32 Kay tumbay aku adti manga Héntil, aw odoy-odoyun aku nilan aw eleb-eleban aw mulamula͡en, 33 aw badasan labeten, aw tigkas yan, patayen aku nilan. Manang pagdateng da na katlu na allaw, mataw aku lekat adti pagkamatay." 34 Manang walaꞌ na manga umagakan nan kalabeti ya kakawasan na piglong nan, kay pigtaguꞌ pa adti kanilan.

35 Na, sa malapit da si Jisus adti syudad na Jériko, awun eseg na buta na nyingkud dun ni kilid na dalan aw gayed migsekat sa kuwalta. 36 Aw sa pagdengeg nan sa madég na manga utaw na lyumabay dun, nyusip sakanan, "Unu yangadi?" 37 Aw miglong ya manga utaw kanan, "Lyumabay si Jisus na taga Nazarit!" 38 Yanagaw to-o sakanan migtatawag, "We… Jisus na buwadbuwad ni Dabid, kallati beg aku!" 39 Aw pigsagda sakanan na manga utaw na nyaka-una kan Jisus, law nilan, "Katinep kaw!" Manang to-o pa nan baling pigpakadakulaꞌ ya kanan tingeg, "We… Buwadbuwad ni Dabid, kallati beg aku!" 40 Yanagaw tyumeneng si Jisus, aw syumuguꞌ na pa-agad ya eseg na buta adti kanan. Aw sa malapit da sakanan, nyusip kanan si Jisus, 41 "Unu ya kaliman mu na imo-un ku kanmu?" Aw tyumubag ya eseg yan, "Kay Sir, kaliman ku beg na kumitaꞌ salut." 42 Aw miglong pa si Jisus kanan, "Kumitaꞌ da kaw. Asuntu sa pagpangintu-u mu kanak, kyaguli-an da kaw." 43 Aw dayaw sakanan kyumitaꞌ aw dyumalug kan Jisus na to-o migdeyen sa Tyumanem. Aw sa pagkitaꞌ na manga utaw sa nya-imoꞌ yeiy, pigdeyen nilan uman ya Tyumanem.