1 Na, nyagi si Jisus adti syudad na Jériko. 2 Dun ni banwa yan awun sambuk na eseg na pigngalanan na si Zakiyo. Sambuk sakanan na mangkatas na manga mangungubla͡ay sa buwis, aw mayaman sakanan. 3 Aw kaliman ni Zakiyo na kumitaꞌ kan Jisus. Manang diliꞌ nan mabatug kay makagpaꞌ sakanan aw madég ya manga utaw na nyaka-una kanan. 4 Yanagaw dyumalagan si Zakiyo adti ma-una aw nyanik adti kawuy na sikamoro pada kita-en nan si Jisus kay dun sakanan agi. 5 Aw sa pag-agi la ni Jisus dun, lyumangad sakanan aw miglong, "Kay Zakiyo, kaksay kaw panog! Kay adun na allaw yeiy ka-ilangan na madtu aku ni balay mu." 6 Yanagaw maksay nyanog si Zakiyo aw migleya sakanan dyumawat kan Jisus adti balay nan. 7 Aw ya kadég na kyumitaꞌ kanan migpanggumudgumud silan na miglong, "Anangaꞌ si Jisus lumabaꞌ adti balay na utaw na makasasalaꞌ?" 8 Manang nyindeg si Zakiyo aw miglong, "Kay Magpalna-uway, atag ku adun adti manga utaw na walaꞌ ya pagkamangan ya katengaꞌ na nyatagtun ku. Aw kun awun kyalimbungan ku na pangkay singalan, uliꞌ ku kanan na upat ka piluꞌ." 9 Sa pagdengeg ni Jisus seiy, miglong sakanan, "Adun na allaw yeiy, ikaw aw ya ka-epedanan mu asini balay pigpaluwaꞌ da kamu na Tyumanem. Kay nyangintu-u la kaw, kasiling ni Abraham na kanaten tyugbulan. 10 Aw yan saba ya pigkadi ku na Iseꞌ na Utaw asini tas na lupaꞌ ya pagpaninaw sa manga utaw na nyakasuway aw ya pagpaluwaꞌ kanilan."Si Zakiyo adti tas na kawuy

11 Aw sa kenneꞌ pa na manga utaw migpakanyeg sa piglong ni Jisus, mig-ubat-ubat sakanan sa sambuk na pundinganan, kay malapit da sakanan adti Jérusalim aw iman na manga utaw aw agpet da magpalekat ya Paghariꞌ na Tyumanem sa Kasakupan nan. 12 Yanagaw miglong si Jisus adti kanilan, "Na, awun dengganen na utaw adti sambuk na banwa. Aw nyanaw sakanan adti mawat na banwa pada dumawat sa katundanan sa pagkahariꞌ dun ni kanan kasakupan, aw tigkas yan, muliꞌ uman sakanan. 13 Manang sa walaꞌ pa sakanan panaw, pigpatawag nan ya sampuluꞌ ya sugu-anen nan, aw pigtaliguwan nan ya tagsambuksambuk kanilan sa kuwalta, aw unawa ya alagaꞌ na nyadawat nilan. Aw piglongan nan silan, ‘Balikwata mayu ya kuwalta ku ini taman na pag-uliꞌ ku.’

14 "Manang pigkalatan sakanan baling na ginawa na manga utaw dun ni kanan banwa. Yanagaw, sa pagpanaw da nan, awun manga utaw na pigsuguꞌ nilan adti un nan kadtuwan pada maglong, ‘Diliꞌ kami malim na maghariꞌ ya utaw yeiy kanami.’ 15 Pangkay maynan ya piglong nilan manang kenneꞌ sakanan ya pig-imoꞌ hariꞌ. Aw sa pag-uliꞌ da nan, pigpatawag nan ya tagsambuksambuk na sugu-anen na pigtaliguwan nan sa kuwalta pada ka-ede-an nan kun pila ya nyabalikwat nilan. 16 Ya nyaka-una dyumateng, miglong sakanan, ‘Kay Sir, ya kuwalta na pigtaligu mu kanak, nyakaginansiya aku sa sampuluꞌ ka piluꞌ.’ 17 Aw miglong kanan ya hariꞌ, ‘Madyaw to-o ya pig-imoꞌ mu! Madyaw kaw saba na sugu-anen. Na, asuntu na kasaligan kaw sa tagbiꞌ, atagan ta kaw sa pagdumala sa sampuluꞌ ya syudad.’ 18 Pagkatigkas yan, dyumateng uman ya kadwa na sugu-anen aw miglong, ‘Kay Sir, ya kuwalta na pigtaligu mu kanak, nyakaginansiya aku uman sa lima ka piluꞌ.’ 19 Aw miglong kanan ya hariꞌ, ‘Madyaw yan! Atag ku kanmu ya pagdumala sa lima ya syudad.’ 20 Pagkatigkas yan, dyumateng uman ya sambuk na sugu-anen aw miglong, ‘Kay Sir, ini la ya kuwalta mu. Dayaw ku pigputus na panyuꞌ aw pigtaguꞌ ku pada diliꞌ malagak, 21 kay nyallek aku kanmu asuntu na maksay kaw magkadaman. Magpangamang kaw sa walaꞌ mu talabahuwi aw pag-aniyen mu ya kana eped na bekeꞌ mu ya migtanem.’ 22 Aw tyumubag ya hariꞌ, ‘Walaꞌ ya katukanan sa pagkasugu-anen mu! Ya kanmu tingeg, yan uman ya gamiten ku sa pag-ukum kanmu. Kya-ede-an mu na maksay aku magkadaman aw magpangamang sa walaꞌ ku talabahuwi aw pag-aniyen ku ya kana eped na bekeꞌ ku ya migtanem. 23 Anangaꞌ walaꞌ mu baling betangan adti bangku ya kanak kuwalta pada dun ni kanak paglikuꞌ awun ginansiya?’ 24 Pagkatigkas yan, miglong ya hariꞌ adti manga eped na sugu-anen nan, ‘Kamanga mayu ya kuwalta adti kanan aw atagan adti sugu-anen na nyakaginansiya sa sampuluꞌ ka piluꞌ.’ 25 Manang miglong silan, ‘Kay Sir, awun da saba ginansiya nan na sampuluꞌ ka piluꞌ.’ 26 Tyumubag kanilan ya hariꞌ, ‘Paglongun ta kamu: Ya utaw na migpakadyaw sa pigtaligu kanan, taliguwan pa uman sakanan sa madég. Manang ya utaw na walaꞌ nan pakadyawa ya pigtaligu kanan pangkay tagbiꞌ, kamangen pa baling lekat adti kanan. 27 Aw ya manga po-on ku asini kanak kasakupan na diliꞌ malim na maghariꞌ aku kanilan, pa-agadan mayu silan adi aw pamataya asini asdangan ku.’ "

28 Pagkatigkas ni Jisus maglong sa pundinganan yeiy, nyindeg sakanan aw migpadeleg sa panaw nan pasinan adti Jérusalim. 29 Na, sa malapit da silan adti manga baranggay na Bétpagi aw Bétaniya dun ni kilid na Buntud na Manga Olibo, pigsuguꞌ nan ya duwa ya umagakan na muna silan, 30 law nan, "Kadtu kamu dun ni baranggay adti dipag. Aw sa pagseled mayu dun, kita-en mayu ya sambuk na nati na asnu na walaꞌ pa kasakayi na utaw. Ubada mayu ya eket nan aw guyuda mayu adi. 31 Pagaw awun musip kamayu, ‘Anangaꞌ mayu ubadan ya nati yeiy?’ paglonga mayu sakanan, ‘Ya Magpalna-uway ka-ilangan nan ya nati ini.’ " 32 Yanagaw nyanaw ya duwa aw kyinitaꞌ nilan ya nati na asnu kasiling na piglong ni Jisus. 33 Sa talana nilan pig-ubad ya eket, nyusip kanilan ya manga tagtun sa asnu, "Anangaꞌ mayu yan ubadan?" 34 Aw tyumubag silan, "Ka-ilangan na Magpalna-uway nami." 35 Aw pigguyud nilan ya nati adti kan Jisus aw pig-apidan nilan na kanilan kadégkadég aw pigpasakay nilan si Jisus. 36 Sa pagpasinan da nan adti Jérusalim, migpansiladlad ya manga utaw dun ni dalan sa kadégkadég na yan ya palangad pagpamasa nilan kan Jisus. 37 Aw sa pagtubang ni Jisus dun ni Buntud na Manga Olibo na malapit da adti Jérusalim, to-o madég ya manga utaw na dyumalug kanan. To-o silan migleya aw migpansideyen silan sa Tyumanem sa dakulaꞌ na tingeg asuntu sa manga milagru na kyinitaꞌ nilan. 38 Miglong silan, "Ini la ya Hariꞌ na pigpadala na Tyumanem dun ni kanan ngalan aw umbaꞌ sakanan deyen! Awun kalinaw adti tas na langit, aw deyen ya Tyumanem!"

39 Na, dun ni kadég na manga utaw, awun manga Parisiyo na miglong kan Jisus, "Kay Magpalna-uway, patinepa ya kadég na manga utaw na dyumalug kanmu." 40 Manang tyumubag si Jisus kanilan, "Paglongun ta kamu: Kun matinep ya manga utaw, batu baling ya magdeyen kanak."

41 Sa malapit da si Jisus adti Jérusalim aw sa pagkitaꞌ da nan sa syudad, migsugaw sakanan asuntu sa manga utaw na nyeyaꞌ dun, 42 aw law nan, "Kaliman ku galu na ka-ede-an mayu adun na allaw yeiy ya un maka-atag kamayu sa kalinaw. Manang adun, nyataguꞌ yeiy baling adti kamayu. 43 Un saba dumateng ya manga allaw na palibedan na manga po-on mayu ya syudad aw mag-imoꞌ silan sa inalad pada diliꞌ kamu maka-agi aw diliꞌ kamu uman makapalaguy. 44 Agba-en nilan ya kadakulaꞌ na syudad mendaꞌ na walaꞌ da ya manga batu na pig-ilantulantu pangkay sambuk. Ka-ampugan kamu aw pangkatabunan dala ya mangayseꞌ mayu. Alag yeiy ma-imoꞌ asuntu na pigpalipaslipasan mayu ya pagkadi na Tyumanem na un magpaluwaꞌ kamayu."

45 Pagdateng da ni Jisus adti Jérusalim, syumeled sakanan adti pamanag na Témplo aw pigpalekat nan ya pag-alilin sa manga utaw na nyampamaligyaꞌ dun. 46 Aw piglongan nan silan, "Yeiy ya pigpasulat na Tyumanem asini muna: ‘Ya kanak balay pagtawagen na panawagtawaganan.’* Manang pig-imoꞌ mayu baling tagu-anan na manga mangkatakaw."*

47 Aw kada allaw migpalna-u si Jisus adti Témplo. Manang ya manga mangkatas na magdadugsu-ay, aw manga magpalna-uway sa Uldin, aw ya manga mangkalangkaw na manga Judiyu, byantakan nilan si Jisus na patayen. 48 Manang walaꞌ silan pakaselat pagpatay kanan kay madég to-o ya manga utaw na migpakanyeg sa palna-u nan.