1 Ke LEUM GOD El folokinkutme nu Jerusalem,

Oana kut in mweme!

2 Kut israsr, ac kut on ke engan!

Na mutunfacl saya elos fahk,

"LEUM GOD El oru ma na yohk nu selos."

3 Aok pwaye, El oru ma na yohk nu sesr;

Kut tuh arulana engan kac!

4 LEUM GOD, sifilpa folokonak kasrpasr in oana meet,

Oana ke af uh sifilpa use kof nu ke infacl ma paola.

5 Lela tuh elos su tung ke pacl elos taknelik,

Elos in kosrani ke engan!

6 Elos su tung ke elos fahla ac us fita in taknelik

Fah foloko ke pusren on in engan

Ke elos us fokin kosrani lalos.