1 O God, kom God luk,

Ac nga kena apkuran nu sum.

Nga suk kom ke insiuk nufon;

Ngunik malukin kom

Oana sie acn paola ac pulamlamla ke sripen wangin kof we.

2 Lela tuh nga in liye kom in lohm mutal;

Lela nga in liye lupan ku ac wolana lom.

3 Tuh lungse kawil lom wo liki na moul lun mwet uh,

Ke ma inge nga fah kaksakin kom.

4 Nga fah sot kulo nu sum ke lusenna moul luk;

Ac nga ac fah sralak pouk in pre nu sum.

5 Ngunik ac fah kihp, oana sie mwet su mongo ke sie kufwa.

Ac nga ac fah onkakin on engan ac kaksak nu sum.

6 Ke nga oan fin mwe oan kiuk, nga esam kom;

Nga nunku keim ke fong fon,

7 Ke sripen kom mwe kasru luk in pacl nukewa.

Ye lulin poum, nga on ke engan.

8 Nga fungwot nu sum,

Ac kom karinginyu ke po ku lom.

9 Elos su suk in uniyuwi

Ac fah oatula nu infulan misa.

10 Elos ac fah misa ke mweun,

Ac kosro wolf ac fah kangla manolos.

11 Tokosra el ac fah engan

Mweyen God El sang kutangla nu sel.

Elos su oru wulela ke Inen God elos fah kaksakunul,

A oalin mwet kikiap fah kauli.