1 Insewowo elos su ma koluk lalos nunak munas nu selos,

Su ma koluk lalos tuleyukla.✝

2 Insewowo el su LEUM GOD El tia esam orekma tafongla lal

Ac su wangin kutasrik in el.

3 Ke nga tuh tia fahkak ma koluk luk,

Nga foroti ke nga tung len nufon.

4 LEUM GOD, kom kaiyu ke len ac fong;

Ku luk wanginla na pwaye,

Oana ke aunfong uh wanginla ke pacl fol.

5 Na nga fahkak ma koluk luk nu sum;

Nga tia okanla orekma koluk luk.

Nga sulela in fahkak nu sum,

Ac kom nunak munas ke ma koluk luk nukewa.

6 Ke ma inge, lela mwet inse pwaye lom nukewa in pre nu sum in pacl in enenu;

Tuh in pacl ma koluk tuku oana sronot,

Ac fah tia ku in sonolos.

7 Kom nien wikla luk;

Kom ac fah moliyu in pacl in ongoiya.

Nga onkakin molela lom ke pusra lulap

Tuh kom karinginyu.

8 LEUM GOD El fahk, "Nga fah lun kom inkanek kom in fahsr kac;

Nga fah aketeya nu sum ac kasrekom.

9 Nik kom lalfon oana soko horse ku soko miul,

Su enenu sie mwe kapir inwalulos

Ac soko sucl in kifasulos."

10 Fal mwet koluk in keok,

A elos su lulalfongi in LEUM GOD

Elos karinginyuk ke lungse kawil lal.

11 Kowos su suwoswos, kowos in engan ac insewowo

Ke sripen orekma lun LEUM GOD.

Kowos su aksol, kowos in sasa ke engan!