1 Kut sot kulo nu sum, O God, kut sot kulo nu sum!

Kut fahkak lupan ku lulap lom

Ac srumun orekma sakirik lom.

2 God El fahk, "Nga oakiya tari pacl in nununku,

Ac nga ac fah nununku ke suwoswos.

3 Ma moul nukewa finne rarrar,

Ac faclu kusrusryak,

Nga ac fah oru tuh pwelung lun faclu in okak na.

4 Nga fahk nu sin mwet filang elos in tia sifacna yukunulos,

5 Ac nu sin mwet koluk elos in tia tungak."

6 Nununku ac fah tia tuku kutulap me, ku roto me,

Ac tia tuku epang me, ku eir me;

7 Tuh God pa ac sang nununku.

El ac fah kalyei kutu selos, ac aksukosokye kutu.

8 Oasr sie cup inpoun LEUM GOD,

Su nwanala ke wain kulana lun kasrkusrak lal.

El okoala, ac mwet koluk nukewa elos nim;

Elos numla nwe ke na lisr.

9 Tusruk nga ac fah tiana tui in sramsramkin God lal Jacob,

Ac yuk on in kaksak nu sel.

10 El ac fah kunausla ku lun mwet koluk,

A ku lun mwet suwoswos fah yokyokelik.