1 O LEUM GOD, kom Leum lasr;

Fulat lom akilenyuk fin faclu nufon!

Kaksakinyom sowak sun kusrao,

2 Onkakinyuk sin tulik srisrik ac tulik fusr.

Kom oakiya sie pot ku in kosrala mwet lokoalok lom

Tuh kom in tulokinya kutena mwet su lain kom.✝

3 Ke nga ngetak ac liye kusrao su kom orala,

Malem ac itu, su kom oakiya in acn selos,

4 Mea mwet, tuh kom in nunku kacl;

Ac mea se mwet uh, tuh kom in saokkin?✝

5 Nwe ouinge, kom oru tuh elos in pusisel kutu srisrik liki kom,

Ac sonelosi ke wolana ac sunak.

6 Kom oru tuh elos in leum fin orekma nukewa lun poum;

Ac filiya ma nukewa ye nialos:✝

7 Sheep ac cow, oayapa kosro nukewa inimae,

8 Won yen engyeng uh, ac ik in meoa,

Ac ma moul nukewa inkof uh.

9 O LEUM GOD, kom Leum lasr,

Fulat lom akilenyuk fin faclu nufon!