1 Niye nilinga fana luwa da kudibawe da Shaloni,

nilinga fana vibesa muna dibawe.

2 Fana luwa da chibesa muna ya mibiki ya miwa,

niivo viyeli nyachende wangu hana iwamhambe wamwenga.

3 Fana mibiki ya matunda kuna mbago,

niivo viyeli yonimulonda hana iwalume wamwenga.

Nodeng'helela kukala hasi ya sisila jake,

tunda jake damulile ng'hani kumwangu.

4 Kanigala mbaka kuna ichiheleto cha dugila,

na kakweza bendela ya kuilonda uchanyha yangu.

5 Muning'he zabibu zinyalile mbaka nigute,

munitende niyadeng'helele matunda,

nomulonda mbaka nolegela.

6 Ditwi jangu digonela mkono wa kumoso wa ija yonimulonda,

na mkono wake wa kulume unihagatila.

7 Nomulambani muilahe, mweye mhambe wa Yelusalemu,

muilahe kwa mhala hebu nhohe wa mchuwala,

kuwa hamwizakong'hela hebu kulamusa kuilonda,

mbaka lusita lwake vondalufike.

8 Nohulika dizi da munhu yonimulonda,

lola kokwiza yokimbila,

kozumha milima,

vilima kovifosa himahima.

9 Yonimulonda kalinga fana mhala,

kalinga fana nhohe.

Kokwima habehi na ng'huta yetu,

kosungulila muna dizonzo,

kololela muna dipanzia.

10 Ija yonimulonda kanilongela,

"Winuke weye nyachende wangu, lumondo wangu wize chihite.

11 Lusita lwa mbeho lufosa,

na mvula imala kutonya.

12 Maluwa yalika chila hanhu,

lusita lwa kwimba lufika,

madizi ya huwa yohulikika muna iisi yetu.

13 Mibiki ya nhini yandusa kwima na mizabibu yalika, yonung'hila goya.

Winuke weye nyachende wangu, lumondo wangu wize chihite."

14 "Weye huwa wangu muna yamafiso ya luwe,

uli kuna yamatuka muna imilima,

lelo nichiwone chihanga chako,

na kuhulika dizi jako, kwaviya dizi jako dinoga na chihanga chako chonogeza."

15 Muchigwilile mbwizi,

waja mbwizi weli wadododo,

wobananga mizabibu yetu ikwalika.

16 Yonimulonda wangu na niye wake.

Yeye kodima bumbila jake kuna ivibesa.

17 Mbaka zuwa vijalika imitondo

na masisila vondayasegele imitondo,

weye yonikulonda, unibwelele fana mhala,

fana nhohe mdodo uchanyha ya milima mitali.