1 Weye mndele wa mwana wa mfalume, lola magulu yako yanogile viivala vilatu,

magulu yako yanogile yalinga fana viya mabwe ya bei ng'hulu,

sang'hano isang'hanigwe na fundi galu.

2 Kuvu jako dilinga fana hamha hadiswela divai ihanganyigwe.

Munda wako waubulunge fana bugulu da ngano dizungulusigwe vibesa.

3 Matombo yako yalinga fana wana mhala waidi,

mambasa wa mhala.

4 Singo yako nhali fana mhanda ya meno ya nhembo,

meso yako yalinga fana malamba ya Heshiboni,

habehi na lwivi lwa bululu da Besilabi,

mhula yako ima fana mhanda ya Lebanoni ilozile Damasiki.

5 Ditwi jako dilinga fana mulima wa Kalimeli,

nyele zili muna iditwi jako zitililika ng'hani,

mfalume kanogelwa nazo.

6 Weye yonikulonda kunoga ng'hani,

koninogela.

7 Utali wako ulinga fana viya mtende,

na matombo yako yalinga fana viya vipambo va matunda.

8 Nilonga, "Nizauhanda mtende uwo

na kuyamha matunda yake."

Matombo yako yalinga fana vipambo va zabibu,

na mnung'ho wa mhumuzi yako fana mapela,

9 na mulomo wako fana viya divai inogile.

Weye yonikulonda, kunonela kwako kwamulile fana divai,

voikilima muna imilomo yangu.

10 Niye wa yonimulonda,

nayo konimelela mate.

11 Weye yonikulonda, izo chihite kuna imigunda,

chikagone kuna ivibululu.

12 Chilopole kuhita kuna imigunda ya mizabibu,

chilole fana mzabibu walika,

na maluwa yake yagubuka,

chilole fana mikomamanga ilava maluwa,

uko nizakulonda.

13 Maluwa yolava mnung'ho unogile,

na matunda yanogile yotinga uchanyha yetu,

matunda ya sambi na matunda ya umwaka ya chila modeli,

yonikwikile yonikulonda.