1 Ichilo vinigonile mudikomwa jangu,

nimzahila ija yonimulonda,

nimzahila mbali simpatile.

2 Nilamuka na nigendagenda muna dibululu,

na muna zinzila na hanhu ha kwiiting'hanila,

kuno nomzahila ija yonimulonda.

Nimzahila mbali simpatile.

3 Wakalizi wa bululu waniwona viwakalile wozunguluka muna dibululu.

Baho niwauza, "Vino mweye mumuwona yonimulonda?"

4 Lusita ludodo viniwalekile,

nimuwona ija yonimulonda.

Nimwamhisa na simulekese

mbaka vinimgalile kuna ikaye ya mami yangu,

muna ichiheleto cha mwanamke yanyeleke.

5 Nomulambani muilahe, mweye mhambe wa Yelusalemu,

muilahe kwa mhala hebu nhohe wa mchuwala,

kuwa hamwizakong'hela hebu kulamusa kuilonda,

mbaka lusita lwake vondalufike.

6 Yelihi iyo yokwiza kulawa kwiichuwala?

Kalinga fana mhanda za yosi,

konung'hila manemane na ubani,

na mavuta yose yanogile yochuuzigwa na wachuuzi.

7 Lola Sulemani, kopapigwa kuna ichigoda chake cha chifalume,

kozungulukigwa na wakalizi malongo sita, magalu wa Isilaili.

8 Chila imwe wawo kamhisa zele,

chila imwe wawo galu wa kuitowa ng'hondo.

Chila imwe wawo kana zele jake mchigudi,

waisasala kwa kuitowa ng'hondo na wehi ichilo.

9 Mfalume Sulemani kaitendela chigoda cha kupapiligwa,

kwa mbao za mibiki inogile kulawa uko Lebanoni.

10 Mhanda zake kazitenda kwa hela,

hanhu ha kusigamila hahakigwa zahabu,

chigoda chigubikigwa na vitambala va langi ya zamablau,

mgati muhambigwa na mhambe wa Yelusalemu,

muladi kulagusa kulonda kwawo.

11 Lelo mwize mweye mhambe wa mulima Sayuni,

uli muna dibululu da Yelusalemu,

mwize mumulole mfalume Sulemani.

Kavala kombelo diyayawazigwe na mami yake,

siku iyo viyasolile muke,

moyo wake udeng'helela.