1 Weye younogeza kufosa wandele wose,

Vino youmulonda kahita kulihi?

Kakulihi youmulonda,

muladi chiumbe na weye kwa kumzahila?

2 Yonimulonda kahita kuna ichizi chake,

kuna imibiki ya vilungo inung'hila goya,

muladi kudeng'helela ichizi,

na kusola vibesa.

3 Niye wa yonimulonda, nayo wangu,

yeye kodima bumbila jake kuna ivibesa.

4 Nyachende wangu chihanga chako chinoga fana bululu da Tiliza,

konogeza fana Yelusalemu,

kodeng'heleza fana watowang'hondo weli na bendela.

5 Nokulamba sekeunilole,

kwaviya meso yako yanogeza ng'hani.

Nyele zako zilinga fana bumbila da luti,

wohumuluka kuna imilima ya Gileadi.

6 Meno yako mazelu fana viya bumbila da ng'hondolo,

wowolawa kuna yamazi kogezigwa,

chila zino dina miyage fana viya ng'hondolo wolela mbasa,

na hupuwa hata zino dimwe.

7 Makanza yako yalinga fana vihande vidi va komamanga,

mgati ya gubiko yako.

8 Hana nyang'ongwe malongo sita na wanaake wadodo malongo manane,

na wandele hawapeteka!

9 Mbali habule yeli fana huwa wangu yatelele,

mwana wa chike yaidumwe kwa mami yake.

Niiyo yopendeleigwa na mami yake yamweleke.

Wandele womulola na womtanga yotemeligwa mate,

nyang'ongwe na wake iwadodo womtogoza.

10 Vino ino yelihi yalingile fana mhwani yau,

kanoga fana mwezi na kumelemeta fana zuwa,

na kodeng'heleza fana watowang'hondo weli na bendela?

11 Ningila muna ichizi cha mibiki ikwima matunda,

kulola masukila muna dikolongo,

kulola fana mizabibu yokwalika,

na fana mikomamanga yalika maluwa.

12 Ning'hali sinavimanya,

hamu yangu inika muludonho lwa matololi ya chifalume yobululigwa na falasi.

13 Weye Mshulami bwela,

ubwele muladi chikulole.

Vino molonda kumulola mwanamke Mshulami,

fana kulola mabumbila maidi ya watowang'hondo viyovina?