1 Wila wa Solomoni unogile kufosa nyila zose.

2 Nokulamba uninonele kwa mulomo wako,

kwaviya kunilonda kwako kunoga kufosa divai.

3 Mavuta yako yonung'hila goya,

zina jako dilinga fana mavuta yonung'hila goya yagidigwe,

lekamana mhambe wokulonda.

4 Uniwinze, chihite himahima,

mfalume wangu unigale muna iviheleto vako.

Chizadeng'helela na kusekelela hamwe,

kunilonda kwako kunoga kufosa divai.

Sazanywa kuwona mhambe wokulonda!

5 Mweye mhambe wa Yelusalemu,

niye na mtitu na ninoga.

Nilinga fana mahema ya Kedali,

nilinga fana mapanzia ya Sulemani.

6 Sekemunilole kwaviya namtitu,

kwaviya zuwa dinisoma.

Wana wa mami yangu waniwonela ludoko,

wanika niwe mkalizi wa migunda ya mizabibu.

Mbali mgunda wangu wa mizabibu siukalize.

7 Lelo nilongele weye yonikulonda,

ng'hondolo wako kowadima kulihi?

Vino ng'hondolo wako wezahumula kulihi ihafika imisi?

Vino habali nikuzahile,

muna yamabumbila ya wayago?

8 One huvimanyile weye muke lumondo kufosa wose,

sondelela mapaga ya ng'hondolo,

na udime wanaluti wako, habehi na mahema ya wadimaji.

9 Weye nyachende wangu,

nokulinganyiza na falasi zike hagati ya falasi walume wobulula matololi ya mfalume wa Misili.

10 Makanza yako yahambigwa vinogile,

singo yako yonogeza kwa mikufu ya mabwe ya hela nyingi.

11 Chizakutendela heleni za zahabu,

zihambigwe na hela.

12 Mfalume wangu viyakalile muna dikomwa jake,

mnung'ho wa mavuta yangu yonung'hila goya yenela chila hanhu.

13 Weye kumwangu kulinga fana chigelo cha ubani,

chikigwa hagati ya matombo yangu.

14 Weye yonikulonda, kulinga fana maluwa ya hina yokwalika,

cholawa kuna imigunda ya mizabibu ya Engedi.

15 Weye yonikulonda, chihanga chako chinoga.

Meso yako yanoga fana huwa!

16 Weye yonikulonda, kweli chihanga chako chinoga,

mayani mabisi yezakuwa komwa jetu,

17 mibiki ya mielezi izakuwa mhanda za kaye yetu,

mibiki ya mibeloshi izakuwa gulu jake.