1 Kweli chihanga chako chinoga, weye nyachende wangu, kweli chihanga chako chinoga.

Meso yako yalinga fana mahuwa, mgati ya gubiko jako.

Nyele zako zilinga fana viya bumbila da luti,

wohumuluka kulawa kuna imilima ya Gileadi.

2 Meno yako mazelu fana bumbila da ng'hondolo dikanhigwe mazoya,

meno yako yela fana viya bumbila da ng'hondolo wowolawa kuna yamazi kogezigwa,

chila zino dina miyage fana viya ng'hondolo wolela mbasa,

na hupuwa zino dimwe.

3 Milomo yako ilinga fana lusingija ludung'hu,

na mulomo wako unoga,

na makanza yako yalinga fana viya vihande vidi va komamanga,

mgati ya gubiko yako.

4 Singo yako ilinga fana viya mhanda ya Daudi,

yoisimikigwa kwa kukaliza via va ng'hondo,

ngao 1,000 zitumbikigwa baho,

zose za magalu.

5 Matombo yako yalinga fana wana mhala waidi,

fana viya woidima hagati ya vibesa.

6 Mbaka zuwa disomoze na masisila yakimbile,

nizagona habehi na matombo yako,

yalingile fana milima igubikigwe na mavuta yonung'hila goya.

7 Weye nyachende wangu,

kunoga ng'hani,

kunoga kunda na kumgongo.

8 Weye mhambe wangu izo kumwangu kulawa Lebanoni,

na chiileke kutali iyo milima ya Lebanoni.

Humuluka kulawa kuludonho lwa mulima wa Amana,

kulawa kuludonho lwa mulima wa Senili na Helimoni,

kulawa matuka ya simba, iviya kuna imilima yowokala duma.

9 Mndele wangu kuusangalaza moyo wangu,

mhambe wangu kuusangalaza moyo wangu,

kwa kunilola mwanza umwe muhala,

na kwa usalu umwe wa mkufu wako wouvalile mwiisingo.

10 Mndele wangu, mhambe wangu lola, kunilonda kwako kunoga kufosa divai,

mavuta yako yonung'hila goya, kufosa vilungo vose.

11 Mhambe wangu, mulomo wako wolagaza umulile fana lala da uki,

maziwa na uki va hasi ya lulimi lwako.

Viwalo vako vonung'hila goya fana vilungo va Lebanoni.

12 Mhambe wangu, mndele wangu,

weye niiyo chizi chiidumwe,

weye niiyo nzasa izingigwe,

weye niiyo nzokwe yangu iidumwe.

13 Mizukila yako ilinga fana vizi va makomamanga,

vili na matunda yanogile kufosa yose,

na hina na mavuta yonung'hila goya,

14 na mkegeni na mchai na mdalasini na ubani na udi,

na vilungo vose vimwenga vili na mnung'ho unogile.

15 Weye niiyo nzasa ya chizi,

weye niiyo sima da mazi hayanyala,

weye niiyo vizanda vikilima kulawa Lebanoni.

16 Beho da kasikazi na beho da kusi,

dize dibume uchanyha ya chizi changu,

diutende ulanga unhung'he goya.

Yeye yonimulonda yeze muna ichizi chake,

yalanze matunda yanogile ng'hani.