1 Nokwingila muna ichizi changu, mndele wangu, mhambe wangu.

Noduganya manemane na vilungo vinung'hila,

noja lala jangu da uki.

Nong'wa divai yangu na maziwa yangu.

Muje na mung'we mweye wambwiya,

mung'we ng'hani womuilonda.

2 Nikala nigonile mbali moyo wangu haugonile mbee.

Nihulika yonimulonda kohodiza!

Kolonga, "Univugulile mndele wangu, mhambe wangu,

huwa wangu utelele.

Ditwi jangu ditapagala nhungwe,

na nyele zangu zipata mawaga ya ichilo."

3 Nihambula walo jangu, lelo niyawale kaidi?

Nimala kunawa magulu yangu,

nizafilaze kaidi?

4 Maabaho yonimulonda kadalisa lwivi,

nideng'helela mbaka moyo wangu udinhila kwa ichimu chake.

5 Ninuka kumvugulila yonimulonda.

Makono yangu yamema mavuta ya manemane,

na vidole vangu vilagaza manemane,

nyamhisa mhalalingwe kwa kufungula lwivi.

6 Nimvugulila lwivi yonimulonda,

mbali kakala kasegela.

Moyo wangu udeng'helela viyakalile kolonga!

Nimzahila mbali simpatile.

Nimtanga mbali hanidike.

7 Wakalizi wa bululu wanifika,

viwakalile wozunguluka muna dibululu.

Wanitowa na wanilumiza,

wakalizi wa ng'huta ya bululu wanihoka walo jangu.

8 Nowalamba mweye mhambe wa Yelusalemu,

muhamuwona yonimulonda,

mulongeleni kumulonda kunitenda nilumwe.

9 Weye younogeza kufosa wandele wose,

iyo youmulonda kana choni cha kongeza cha wamwenga,

mbaka weye uchilambe ivo?

10 Yonimulonda kanoga na katelela,

komanyika ng'hani mwa iwawo walume elufu longo.

11 Ditwi jake dinoga fana zahabu inogile,

nyele zake ziipilinga na nhitu fana howe.

12 Meso yake yalinga fana ya huwa mumgwazogwazo wa lwanda,

walinga huwa wazelu fana maziwa wowokala mumgwazogwazo wa dilamba.

13 Makanza yake yalinga fana chizi chimemile vilungo vonung'hila goya,

Milomo yake ilinga fana vibesa,

yolagaza madwende mengi ya manemane.

14 Makono yake yalinga fana mhete za zahabu,

zozihambigwa mabwe ya bei ng'hulu.

Lukuli lwake lulinga fana meno ya nhembo,

yahambigwe kwa mabwe ya bei ng'hulu yatangigwe samawati.

15 Magulu yake yalinga fana mhanda za mabwe madala,

zisimikigwe muna ivandusilo va zahabu.

Kokwima chigangamavu fana viya mulima wa Lebanoni,

fana viya mibiki ya mielezi.

16 Mulomo wake wamulile.

Yeye konogelwa ng'hani.

Tegelezeni mweye mhambe wa Yelusalemu,

niiyo ino yonimulonda na mbwiyangu.