1 Weye one uwile sekulu wangu,

wong'hile matombo ya mami yangu!

One nihakuting'hane uko kunze,

nihakulamse na habule munhu wa kunizeha.

2 Nihakulangulize na kukugala muna ikaye ya mami yangu,

mami yangu iyo yanifunzile.

Nihakwing'hile divai inogile ung'we,

nihakwing'hile mazi ya makomamanga yangu.

3 Ditwi jangu digonela mkono wako wa kumoso,

mkono wako wa kulume unihagatila.

4 Mweye mhambe wa Yelusalemu nowalamba,

sekemukong'hele hebu kulamusa kuilonda,

mbaka lusita lwake vondalufike.

5 Vino yelihi yokwiza kulawa kwiichuwala

kuno komsigamila nyachende wake?

Niye nikulamusa kulawa kuna umbiki wa mpela,

uko mami yako viyapatile wimo,

uko kalumwa usungu kakuvumbula.

6 Unitowe fana muhuli muna umoyo wako,

na fana muhuli muna umkono wako,

kwaviya kuilonda kokala siku zose fana ifa,

na wivu wake wokwamha wanhu fana leme.

Milambi yake yolunguza fana milambi ya moto.

7 Mazi mengi hayadaha kuzima kuilonda,

na nyanda hazidaha kusegeza kuilonda.

One munhu yahageza kugula kuilonda,

na kulava vinhu vake vose kwa ichimu chake,

kezazehigwa muhala.

8 *China lumbu mdodo,

matombo yake hayanamema.

Ivo chizatenda choni siku yondayasoligwe?

9 One yahawile ng'huta,

chahamzengele mhanda ya hela,

na one yahawile lwivi,

chihamzingile mibiki ya mielezi.

10 Niye nikala nabule matombo fana ng'huta,

mbali sambi mhambaga yangu iwa na matombo fana mhanda.

Ivo niwa kuulongozi wa yonimulonda fana munhu yotenda nideng'helele.

11 Sulemani kakala na mgunda wa mizabibu uko Baali Hamoni.

Kazimisha mgunda uwo,

na chila munhu kaliha vihande 1,000 va hela kwa matunda yake.

12 Mbali mgunda wangu wa mizabibu nodaha kuulava niye mwenyewo.

Sulemani, weye uli na vihande 1,000 va hela ni kwa ichimu chako,

na wawo woyakaliza matunda yako weng'higwe vihande magana maidi va hela kulawa umo.

13 Weye ukala muna ichizi,

mbwiya zako wokutegeleza,

lelo nolamba kutegeleza dizi jako.

14 Izo ukimbila yonikulonda,

na weye uwe fana mhala hebu nhohe,

uchanyha ya milima ili na vilungo vinung'hila goya.