1 Yano malaguso yoyawone Isaya mwana wa Amozi kusonhela isi ya Yuda na bululu da Yelusalemu, lusita lwa mfalume Uzia na lusita lwa mfalume Yosamu na lusita lwa mfalume Ahazi na lusita lwa mfalume Hezekia, wawo wose wakala wafalume wa isi ya Yuda.

2 Tegeleza weye ulanga, kinga digutwi weye isi,

kwaviya Mndewa Mulungu kalonga,

"Niwalisa wana na niwalela,

mbali wawo wanilema.

3 Ng'ombe kommanya yomdima,

na chihongwe kommanya munhu yomwing'ha ndiya.

Mbali Waisilaili hawammanyile mwenevale wawo,

wanhu wangu hawanimanyile."

4 Mwizagaya mweye wanhu mukala muna iisi,

mohasanya ng'hani,

mweye welesi wa wanhu wotenda mbuli zihile,

mukala kwa kubamanya.

Mweye mumulemile Mndewa Mulungu.

Mumzeha Mulungu Yelile wa Isilaili na mumuleka.

5 Habali molonda kutagusigwa kaidi?

Habali mogendelela kuwa watatali?

Ditwi jose doluma na moyo wausungu.

6 Kulawa kuulwayo mbaka kudidosi kwabule ugima,

mbali mawanga na kwiikubula na vilonda vilawa ufila havifungigwe,

na havisunhigwe na havifungigwe na havitoholigwe na mavuta.

7 Isi yenu iwa matongo,

mabululu yenu yotimbuligwa na moto.

Muna iisi yenu wageni wasola vinhu venu,

na isi izanangigwa na wageni kuno mweye molola.

8 Bululu da Sayuni* dilekigwa fana chiheha kumgunda,

dilekigwa fana chiheha muna umgunda wa matanga,

bululu da Sayuni dizingigwa na wehi.

9 One Mndewa Mulungu Yeli na Udahi sigambeyachileke wamwenga chisulupuke,

chahatimbuligwe fana mabululu ya Sodoma na Gomola.

10 Tegelezeni mbuli ya Mndewa Mulungu,

mweye mulingile fana watawala wasede wa Sodoma,

Tegelezeni mafundizo ya Mulungu wetu,

mweye mulingile fana wanhu wasede wa Gomola.

11 Mndewa Mulungu kalonga,

"Vino nhosa zenu nyingi zonifaya choni?

Nizilegela nhosa zenu za mabebelu ya ng'hondolo wa kutimbula,

na mabambala ya wanyama wenu wanenehe.

Silonda damu ya ng'ombe walume,

hebu silonda damu ya wanang'hondolo hebu luti.

12 Vino lusita vimwiza kumwangu kunitambikila,

yelihi yawalongele mubojoge muna ulubuga lwangu na wanyama wenu?

13 Sekemunigalile kaidi nhosa zenu hazifaya,

nowihila ng'hani ubani wenu.

Madugila ya Mwezi Ukwima na Siku ya Mhumulo na vomuiting'hana kutambika,

sidaha kuvifunyila umoyo.

14 Moyo wangu woyehila Madugila yenu ya Mwezi Ukwima na madugila yamwenga.

Yawa mbahasha izamile kumwangu,

nilegela kuyafunyila umoyo.

15 Vimwinula makono yenu kutambika,

nogubika chihanga changu sekenimuwoneni.

Muhapula mbuli, sizamtegelezani.

Makono yenu yamema damu za wanhu muwakomile.

16 Isafyeni,

lekeni sang'hano zenu zihile haulongozi wangu,

lekeni kutenda mbuli zihile.

17 Ifunzeni kutenda mbuli zinogile,

iyoheni kutenda voilondeka,

watazeni wawoneligwe,

weng'heni wana wachiwa haki yawo,

wagombeleni wanaake wagane."

18 Mndewa Mulungu kolonga, "Izoni chilonganye,

uhasanyi wenu uhawa mdung'hu ng'hani,

wizagaluka mzelu fana seluji,

uhawa mdung'hu ng'hani fana damu,

wizakuwa mzelu fana pamba.

19 One muhatogola na kunitegeleza,

mwizatemeligwa mate muna iisi.

20 Mbali muhalema na kunileka,

mwizakomigwa na panga."

Mndewa Mulungu kolonga ivo.

21 Bululu diya dikalile dokwaminika,

sambi digaluka kuwa fana mgoni,

lusita lumwe haki itawala umo,

mbali sambi dimema wakomaji.

22 Hela yenu iwa unyolodo,

divai yenu ihanganyigwa na mazi.

23 Wakulu wako wonilema niye,

woilumba na wabavi,

chila munhu kozahila chitumetume na lushwa,

kuno wanaake wagane na wachiwa hawagesigwa.

24 Ivo Mndewa Mulungu, Mulungu wa Isilaili,

mulangulizi yeli na nguvu wa Isilaili, kolonga,

"Nizawawonela ludoko wehi wangu,

nizawalihiza chisasi waja wonilema.

25 Nizamtagusani,

nizasegeza wihi wenu fana viya zahabu voilunguzigwa na moto muladi kusegeza nhaka,

nizausegeza wihi wenu wose.

26 Nizaweng'ha wasemi walingile wa mwanduso,

na vinyandama walingile wa mwanduso.

Baho Yelusalemu dizatangigwa bululu ditenda voilondeka na bululu dikwaminika."

27 Sayuni izakomboligwa kwa viya wanhu wake viwozindilila malagilizo ya Mulungu,

waja weli mgati yake wasamile wezakomboligwa.

28 Mbali wanhu wonilema na wahasanyi wose wezanangigwa,

waja weli hawamtegeleza Mndewa Mulungu wezakomigwa.

29 Mwizawona chinyala kwaviya mutambikila nyang'hiti muna imibiki ya miyaloni,

mwizawona chinyala kwaviya mutambikila nyang'hiti muna imigunda yomuisagule.

30 Mwizakuwa fana mbiki wa mwaloni unyalile,

fana mgunda upuwile mvula.

31 Wene nguvu wezatakamila fana mayani yanyalile,

sang'hano zawo zizakuwa fana sese za moto.

Wezatakamila hamwe na sang'hano zawo.

Habule munhu yondayadahe kuuzima moto uwo.