1 Siku izo Hezekia kaugula ng'hani na kawa habehi kudanganika. Baho mulotezi Isaya mwana wa Amozi kahita kumwake kumulongela, "Mndewa Mulungu kolonga, ‘Ika vinogile vinhu vako, kwaviya hwizahona mbali kwizadanganika.’ "

2 Hezekia kahindukila ubanzi umwenga na kampula Mndewa Mulungu, kalonga, 3 "Weye Mndewa Mulungu, nokulamba ukumbuke viya vinikusang'hanile kwa waminika na kwa moyo wangu wose na vinitendile mbuli zinogile haulongozi wako." Hezekia kalila kwa usungu.

4 Maabaho Mndewa Mulungu kamulongela Isaya, 5 "Hita ukamulongele Hezekia, ‘Mndewa Mulungu, Mulungu wa wasaho yako Daudi kolonga, "Nizihulika mbuli ziunipulile na niyawona masozi yako. Nizakongezela miyaka longo na mitano ya kuwa mgima. 6 Nizakukombola hamwe na bululu dino kulawa muna yamakono ya mfalume wa Ashulu. Nizadikaliza bululu dino. 7 Chilaguso chino cholagusa kuwa niye Mndewa Mulungu nofikiza mbuli iniilagane. 8 Nizaditenda sisila da zuwa kuna ividando vizengigwe na mfalume Ahazi dibwele hachisogo migulu longo." ’ " Ivo sisila da zuwa dibwela hachisogo migulu longo.

9 Mfalume Hezekia viyahonile, kemba wila uno wa kumtogoza Mulungu.

10 "Nilonga, ‘Nilondeka nidanganike ning'hali mbwanga.

Niye nilungiligwa kuhita kuzimu siku zangu za kuwa mgima zing'hali.’

11 Nilonga, ‘Sizamuwona kaidi Mndewa Mulungu muna iisi ya wagima,

iviya sizamulola kaidi munhu hebu kukala na wanhu wokala muna iisi ino.

12 Ugima wangu udumuligwa na kukomelezigwa fana hema vidibomoligwa,

fana munhu viyodumula luzi lwa lili dimalile kusonigwa.

Imisi na ichilo Mulungu kakomeleza ugima wangu.

13 Nigozela kwa kufunya umoyo mbaka imitondo,

mbali kaibena mivuha yangu yose fana simba.

Imisi na ichilo Mulungu kakomeleza ugima wangu.

14 Niye nilila fana chinega,

nilila fana huwa viyolila.

Nilola ng'hani kuulanga ivo nilegela.

Weye Mndewa Mulungu, niye nogaya, izo unitaze.’ "

15 Lelo nilonge choni?

Yeye mwenyewo kanilongela na katenda mbuli izo.

Nizagenda kwa kuinyendanyenda miyaka yose ya ugima wangu,

kwaviya moyo wangu una usungu ng'hani.

16 Mndewa Mulungu, wanhu wokala kwa mbuli ziutendile,

niye iviya nokala kwa mbuli izo,

weye kunihonya,

muladi nikale goya.

17 Nipata manhesa ng'hani kwa faida yangu,

mbali kwaviya kunilonda,

kuukombola ugima wangu kulawa muna dikombo da kunangila,

kunilekelela uhasanyi wangu.

18 Kwaviya uko kuzimu munhu hadaha kukutogoza,

wanhu wadanganike hawadaha kukwing'ha hewela.

Iviya hawadaha kuhuwila uwaminika wako.

19 Munhu yeli mgima iyo yondayakutogoze weye,

fana niye vonitenda diyelo.

Chila welesi wizaulongela welesi ukwiza uwaminika wako.

20 Mndewa Mulungu kezanikombola,

Cheye chizakwimba kwa via va wila vili na usingija siku zose za ugima wetu muna Ikaye ya Mndewa Mulungu.

21 Isaya kalonga, "Galeni ng'hambili ya nhini na muike muna diihu da mfalume, nayo kezahona."

22 Hezekia kauza, "Vino chilaguso chaki chondachilaguse kuwa nizafika muna ikaye ya Mndewa Mulungu?"