1 Wezagaya wasemi hawahumiza voilondeka,

waja wolava malagilizo ya kuwonela.

2 Wowema ngayengaye haki zawo

na kuwakimilila wanhu wangu wawoneligwe sekewahumizigwe voilondeka,

muladi wawateke wagane,

na wawahoke wachiwa vinhu vawo.

3 Mwizatenda choni siku ya nhaguso,

lusita mahulo vondayamwizileni kulawa isi ya kutali?

Mwizamkimbilila yelihi kumpula yamtazeni?

Vino utajili wenu mwizauleka kulihi?

4 Hakwizasigala chinhu chochose,

mbali kuinywata hamwe na wanhu watekigwe,

na kudanganika na wanhu wakomigwe.

Mbali Mndewa Mulungu halekile kuwawonela ludoko,

kagendelela kuwatagusa.

5 Mndewa Mulungu kolonga, "Kezagaya mfalume wa Ashulu, niijo balati da ludoko lwangu,

muna umkono wake kamha lungu da ludoko lwangu.

6 Nomtuma kwa wanhu hawanimanyile,

nizamulagiliza yawatowe wanhu woniguma ludoko,

yawateke na yavisole vinhu vawo,

na yawabojoge fana nhope muna inzila.

7 Mbali mfalume wa Ashulu hailungila mbuli izo,

yeye kana lungilo dimwenga,

koilunga kuzinanga na kuzitimbula zisi nyingi ng'hani.

8 Kwaviya mfalume wa Ashulu kalonga,

‘Wakulu wa watowang'hondo wangu iviya vinyandama muna uufalume wangu.

9 Chidihuma bululu da Kalino fana vichidihumile bululu da Kalikemisi,

chidihuma bululu da Hamasi fana vichidihumile bululu da Alipadi na bululu da Samalia na bululu da Damasiki?

10 Fana viya vinizinangile zisi zimwenga na nyang'hiti za milungu yawo,

milungu mikulu ifosile nyang'hiti izo za bululu da Yelusalemu na Samalia,

11 lelo nizainanga Yelusalemu na nyang'hiti zake za milungu, fana viniinangile Samalia na nyang'hiti zake za milungu?’ "

12 Mndewa Mulungu vondayakomeleze kuwatagusa wanhu kuna umulima Sayuni na Yelusalemu, kezalonga, "Nizamtagusa mfalume wa Ashulu, kwaviya koigoda na koitogoza.

13 Kwaviya mfalume wa Ashulu kolonga,

‘Nitenda mbuli ino kwa nguvu zangu

na kwa ubala wangu,

kwaviya novimanya.

Nisegeza mhaka za zisi na nizihoka ngama zawo.

Kwa nguvu niwahumulusa wakalile muna ivigoda va chifalume.

14 Fana munhu viyoguma mkono muna ichisanza,

niivo mkono wangu viusolile vinhu va wanhu wa zisi zose.

Fana wanhu viwoduganya mafinga yasigale,

niivo viniwaduganye wanhu wa zisi zose.

Habule munhu yoyose yadahile kuipugunha hebu kulonga.’ "

15 Mndewa Mulungu kolonga, "Vino nhemo yodaha kumgodela munhu yoisang'hanila,

hebu msumeno wodaha kumgodela munhu yokanha?

Vino balati dodaha kumwinula munhu yajamhile,

hebu mhome yodaha kumwinula munhu yoisang'hanila?"

16 Mndewa Mulungu Yeli na Udahi kezawagalila watowang'hondo magalu utamu usokeza,

ukulu wawo wizalunguzigwa fana kulunguzigwa na moto.

17 Mulungu yeli bung'hulo da Isilaili kezakuwa fana moto,

Mulungu Yelile wa Isilaili kezakuwa fana milambi ya moto,

woulunguza chila chinhu kwa siku dimwe,

na kuwananga wehi wake fana kutimbula miwa ing'eng'ezale.

18 Mndewa Mulungu kezavinanga vose,

mbago zake zing'hulu na migunda yake inogile.

Izakuwa fana munhu yosoka na utamu mbaka kodanganika.

19 Mibiki yondaisigale muna imbago yake izakuwa midodo ng'hani,

mwana mdodo kodaha kuipeta.

20 Siku zikwiza Waisilaili wondawasigale hawezawahuwila kaidi wanhu wawatowile,

mbali wezamuhuwila Mndewa Mulungu, Mulungu Yelile wa Isilaili.

21 Wanhu wadodo wondawasigale muna uwelesi wa Yakobo wezambwelela Mndewa Mulungu Yeli na Udahi.

22 Sambi Waisilaili wawa wengi fana msanga wa bahali,

mbali waja wondawabwele wadodo ng'hani.

Walungiligwa kunangigwa kwa haki.

23 Kwaviya Mndewa Mulungu Yeli na Udahi kezafikiza chilagano chake cha kuwananga wanhu wa isi yose.

24 Ivo Mndewa Mulungu Yeli na Udahi kolonga,

"Mweye wanhu wangu womukala Sayuni,

sekemuwadumbe Waashulu,

womtowani na balati na womwinulilani lungu fana viwatendile Wamisili.

25 Kwaviya lusita ludodo nizaleka kumuwonelani ludoko,

mbali nizawawonela ludoko Waashulu na nizawananga.

26 Niye Mndewa Mulungu nili na udahi,

nizawalanha mibalati fana viya viniwalanhile wanhu wa Midiani kuna uluwe lwa Olebu.

Nizakwinula balati jangu uchanyha ya bahali fana vinitendile kuna iisi ya Misili.

27 Siku iyo nizaisegeza mbahasha iwampapizeni Waashulu,

na kuibena nila iwaikile muna zisingo zenu,

kwaviya muneneha ng'hani."

28 Waashulu wafika Ayasi, wafosela Migiloni,

mbahasha zawo wazileka Mikimashi.

29 Waloka lwanda kuno wolonga,

"Chizakala bululu da Geba chilo chose."

Wanhu wa bululu da Lama wogudemeka,

Wanhu wa bululu da Gibea ya Sauli wokimbila.

30 Guteni nyangi mweye wanhu wa bululu da Galimu,

tegelezeni mweye wakaya wa bululu da Laisi,

mwizagaya mweye wanhu wa bululu da Anasosi.

31 Wanhu wa bululu da Madimena wokimbila,

wanhu wa bululu da Gebimu woifisa.

32 Diyelo Waashulu wezakwima Nobu na kutingisa makono yawo kuwadumbiza,

kuna umulima wa wanhu wa Sayuni, kuna ichilima cha Yelusalemu.

33 Lola Mndewa Mulungu Yeli na Udahi kezawakanha Waashulu fana munhu viyokanha matambi kwa nguvu ng'hulu,

fana viyokanha mibiki mitali ng'hani.

34 Kezakanha mibiki na nhemo,

mbago za Lebanoni na mibiki yake inogile ng'hani ya mielezi izakugwa hasi.