1 Siku zikwiza Mndewa Mulungu kezausola mwele wake ukutwa na mdala,

na kuditagusa ng'onyo ditangigwa Lewiasani* dizumha na dizinga.

Mndewa Mulungu kezadikoma dizoka ijo dikulu dodikala muna ibahali.

2 Muna zisiku zikwiza,

imbeni kusonhela mgunda unogile wa mizabibu.

3 Niye Mndewa Mulungu noulolesa,

nowitilila mazi chila lusita.

Noukaliza imisi na ichilo,

muladi munhu yoyose sekeyaubanange.

4 Sipatile ludoko kwa mgunda uwo,

one kuwile na miwa na mbigili va kunikimilila,

nihaitowile navo,

na kuvisoma moto vose.

5 Wehi wa wanhu wangu wahalonda niwakalize,

wolondeka watende tindiwalo na niye.

6 Siku zikwiza welesi wa Yakobo wezakuwa fana mizizi ikwingila hasi ng'hani,

wezakuwa fana mibiki isuka na kwalika maluwa,

na matunda yake yezamema muna iisi yose.

7 Mndewa Mulungu hawatowile ng'hani Waisilaili,

fana viyawatowile wehi wawo.

Waisilaili wakomigwe kuing'hondo,

wakala wadodo kufosa wehi wawo.

8 Kawatagusa wanhu wake kwa kuwahamiza,

kawawinga kwa vulavumbi dilawa ubanzi wa ulawilo wa zuwa,

kawasegeza kwa magayo makulu.

9 Uhasanyi wa welesi wa Yakobo wizalekelelwa.

Uhasanyi wawo wizasegezigwa ng'hani vondawabomole chila lupango lwa mulungu Ashela na milungu imwenga.

10 Mabululu yeli na mhongono yasigala matongo,

yalekigwa bila chinhu fana bwilingu,

umo ng'ombe woja na wotumbala,

na wogudula matambi ya mibiki ili umo.

11 Matambi vondayanyale na kubeneka,

wanaake woyadondola na kuyasoma.

Kwaviya wanhu wawo hawavimanyile chinhu,

ivo Mulungu yawalumbile hezawawonela ubazi na hezawatemela mate.

12 Lusita ulo Mndewa Mulungu kezabeta ngano yake kuna iisi ili hagati ya lwanda lwa Efulati na kolongo da Misili, mweye Waisilaili mwizaduganyigwa imwe imwe. 13 Lusita ulo mhalati ng'hulu izatowigwa. Wanhu wagile muna iisi ya Ashulu na wanhu wakalile kuuhami muna iisi ya Misili wezakwiza na kumtambikila Mndewa Mulungu kuna umulima welile uko Yelusalemu.