1 "Mbali tegelezeni mweye welesi wa msang'hani wangu Yakobo,

Tegelezeni mweye wanhu wa Isilaili wonimsaguleni.

2 Niye nimuumbileni kwandusila muna izinda za mami zenu,

niye nilonda kumtazani nolonga,

sekemudumbe mweye welesi wa msang'hani wangu Yakobo,

na mweye wonimsaguleni sekemudumbe.

3 Nizaitilila mazi isi ili na ng'hilu,

na kukilima mazi hanhu hanyalile.

Nizawitila muhe wangu fana mazi muna uwelesi wako,

nizawatemela mate wanago.

4 Wezasuka fana mayani hana yamazi mengi,

fana mibiki mumgwazogwazo wa vizanda.

5 Wamwenga wezalonga, ‘Niye wa Mndewa Mulungu,’

wezaitanga kwa zina da Yakobo,

iviya wezayandika muna yamakono yawo, ‘Niye wa Mndewa Mulungu,’

na kuitanga kwa zina da Isilaili."

6 Mndewa Mulungu yeli mfalume na mkombola wa Isilaili,

Mndewa Mulungu Yeli na Udahi kolonga,

"Niye wa mwanduso na uhelelo,

habule Mulungu imwenga ila niye.

7 Vino yelihi yeli Mulungu fana niye?

Muleke yagong'onde na kulonga ukweli haulongozi wangu.

Vino yelihi yagong'onde baho umwaka mbuli zondazilawilile?

Yachilongele mbuli zondazilawilile na wazigong'onde.

8 Mweye wanhu wangu sekemudumbe na sekemuwe na lugano.

Vino simulongeleni umwaka mbuli zondazilawilile?

Mweye wakalangama wangu.

Vino kauko Mulungu imwenga hebu niye muhala?

Vino kuna mulungu imwenga yeli na nguvu hebu niye muhala?

Habule."

9 Wanhu wose wosongola nyang'hiti za milungu ni wabozi,

vinhu ivo viwovideng'helela haviwafaya chochose.

Wanhu woihuwila milungu iyo ya uvwizi watulika yameso na wabozi.

Ivo wanhu wawo wezagumigwa chinyala.

10 Vino yelihi yotenda nyang'hiti ya mulungu ili haidaha kumtaza chochose?

11 Kweli wanhu wose wotambikila nyang'hiti wezagumigwa chinyala.

Nyang'hiti zosongoligwa na wanhu muhala.

Lelo waiting'hane wose na wailaguse,

wezadumba na kupata chinyala.

12 Muhunzi kosola madini,

koyalumbula muna umoto na kufuwa nyang'hiti,

koihondahonda na nyundo muladi kuitenda itelele kwa makono yake yeli na nguvu.

Lusita ulwo lose kowona nzala na kolegela,

kowona ng'hilu na komalilwa nguvu.

13 Selemala kolinga chihande cha mbao,

kochichola na sizi jake,

maabaho kochisongola na kuchitenda chiwe fana munhu.

Maabaho koika nyang'hiti iyo ya mulungu hana ihanhu hoyotambikila.

14 Kokanha mbiki wa mwelezi muladi yausang'hanile,

na kosagula mbeloshi hebu mwaloni.

Kouleka ukule hamwe na mibiki ya kumbago,

iviya kohanda msonobali,

nayo mvula youtenda ukule.

15 Kosang'hanila chihande cha mbiki uwo kuwa ngodi,

muladi yabwinhe moto yotele,

kobwinha moto na kokoka magate.

Kosang'hanila chihande chimwenga cha mbiki uwo muladi kuisongolela nyang'hiti ya mulungu,

koiteleza na kuitambikila.

16 Maabaho kosola ngodi zake na kubwinha moto,

kokoka nyama,

koja na kokwiguta,

maabaho kokala baho na kokotela moto kuno kolonga,

"Kweli mhata vuke, uwo niuwo moto!"

17 Kosang'hanila chihande chisigale cha mbiki uwo, muladi kuisongolela nyang'hiti yake ya mulungu,

maabaho koihuwila na kuitambikila.

Koipula, kolonga,

"Weye niiyo mulungu wangu."

18 Wanhu wawo hawamanyile chinhu chochose,

wagubikigwa yameso sekewalole,

iviya nzewele zawo sekewavimanye chinhu.

19 Habule yodaha kugelegeza hebu kuwa na nzewele na kulonga,

"Nusu ya mbiki uwo nikwachila moto,

maabaho nyoka magate muna yamasizi na nyoka nyama nija.

Vino nisang'hanile chihande chisigale kutenda nyang'hiti na kuitambikila?"

20 Koja maivu, moyo womvwizila na womwagiza,

hadaha kuikombola mwenyewo hebu kulonga,

"Chinhu chino choniwa nacho muna umkono wangu ni uvwizi muhala."

21 Mndewa Mulungu kolonga vino,

"Mweye welesi wa Yakobo,

muvimanye kuwa mweye Waisilaili wasang'hani wangu.

Niwalumba muladi muwe wasang'hani wangu,

niye sizawazimiza hata chidogo.

22 Nizilava mbuli zako zihile,

nazo zizasegela fana mawingu,

niusegeza uhasanyi wako,

nawo wizasegela fana kungugu.

Bweleni kumwangu kwaviya niye niwakombola."

23 Imbeni kwa deng'ho kulu mweye ulanga,

kwa mbuli iyatendile Mndewa Mulungu.

Mutowe nyangi mweye milima.

Mutowe ng'henze mweye mbago na mibiki.

Kwaviya Mndewa Mulungu kawakombola welesi wa Yakobo,

na kaulagusa ukulu wake.

24 Niye Mndewa Mulungu, mkombola wako,

nikulumbile muna umunda wa mami yako, nolonga,

"Niye niiyo Mndewa Mulungu nilumbile vinhu vose.

Niye muhala niyanzanza mawingu,

nizilumba zisi zose kwa makono yangu.

25 Niye nolagusa kuwa walotezi wa uvwizi wolonga mbuli hazifaya.

Iviya nolagusa kuwa wanhu wose wosang'hanila mbuli za uhawi kulonga mbuli zondazilawilile hazifaya.

Noyatenda magesa ya wanhu weli na ubala kuwa ubozi.

Wanhu wogesa kuwa mbuli zawo za chibozi.

26 Mbali nizaugangamiza usenga wa wasang'hani wangu,

na kufikiza malungilo ya wasenga wangu.

Niye niiyo nidilongele bululu da Yelusalemu,

‘Weye Yelusalemu, wanhu wezakala mgati yako kaidi.’

Na yoniyalongele mabululu ya Yuda,

‘Mweye mwizazenga kaidi,

matongo yenu yezazengigwa kaidi.’

27 Niye nilagiliza bahali, ‘Nyala,

nizanyaza nyanda zenu.’

28 Niye nilonga kusonhela mfalume Koleshi,

‘Weye uwadima wanhu kwa ichimu changu,

weye kwizafikiza malungilo yangu.’

Niye nilonga kusonhela bululu da Yelusalemu,

‘Weye Yelusalemu kwizazengigwa kaidi,

kaye yako ya nhambiko izazengigwa kaidi.’ "