1 Kwa ichimu cha Sayuni sizanyamala,

na kwa ichimu cha Yelusalemu sizakala hupi,

mbaka haki yake vondaimulike fana ichilo vichikunguzuka,

ivo ulopozi wake fana chitasa vichikwaka.

2 Wanhu wa zisi zose wezaiwona haki yako weye Sayuni.

Wafalume wose wezauwona ukulu wako,

iviya kwizatangigwa zina da sambi,

zina dondadilavigwe na Mndewa Mulungu mwenyewo.

3 Na weye kwizakuwa kombelo dinogile muna umkono wa Mndewa Mulungu,

kombelo da chifalume muna umkono wa Mulungu wako.

4 Hawezakutanga kaidi, "Yalekigwe."

Iviya isi yako haizatangigwa, "Uchiwa."

Mbali kwizatangigwa, "Mulungu kanogeligwa nayo."

Nayo isi yako izatangigwa, "Yoyasoligwe na mulume,"

kwaviya Mndewa Mulungu kanogeligwa na weye,

nayo kezakuwa fana mulume wa isi yako.

5 Fana viya mbwanga viyomsola mhambe,

niivo wanago vondawakusole weye Sayuni,

fana munhu yosola viyomdeng'helela mhambe wake,

niivo Mulungu wako vondayakudeng'helele weye.

6 Kuchanyha ya ng'huta zako weye Yelusalemu niweka wakalizi,

imisi na ichilo hawezanyamala hupi.

Mweye womumkumbusa Mndewa Mulungu chilagano chake, sekemunyamale hupi.

7 Sekemumuleke yahumule,

mbaka vondayadibweleze bululu da Yelusalemu,

na kuditenda ditogoligwe na wanhu wa zisi zose.

8 Mndewa Mulungu kailaha kwa ukulu wake,

kailaha kwa mkono wake wili na nguvu, kalonga,

"Sizaweng'ha kaidi wehi wako ndiya yako,

iviya wageni hawezakung'wa kaidi divai yako ya sambi youilavile vuke.

9 Mbali wawo wahunile ngano iyo wezaija na kuditogoza zina jangu niye Mndewa Mulungu,

wawo woduganya zabibu wezakung'wa divai yake,

wezakung'wa divai yake muna uluwa lwa kaye yangu yelile."

10 Mweye wakaya wa Yelusalemu vuguleni nyivi mulawe,

muwasasalile nzila wanhu wenu wobwela.

Limeni, limeni, kulugumbi na musegeze yamabwe.

Simikeni bendela iwe chilaguso kwa ichimu cha wanhu wa zisi waimanye nzila.

11 Mndewa Mulungu kagong'onda mbaka muna uhelelo wa iisi,

walongeleni vino wandele wa Sayuni,

"Lola mulopozi wenu kokwiza,

yeye kokwiza na maliho mumkono wake,

na maliho yake ni wawo wanhu wakomboligwe."

12 Wawo wezatangigwa wanhu welile,

wanhu wakomboligwe na Mndewa Mulungu.

Iviya bululu da Yelusalemu dizatangigwa, "Bululu dodizahiligwe na Mulungu,"

na "Bululu ijo Mulungu hadilekile."